އިޒްރޭލުން ފަލަސްތީނުގައި ހިންގަމުންދާ ގަތުލުއާންމުގެ ތެރެއިން އިއްޔެ ގާޒާގެ ޖަބަލިއާ ރެފިއުޖީ ކޭމްޕަށް ހަމަލާދިން މައްސަލަ ފޮރިން މިނިސްޓަރު އަބްދުﷲ ޝާހިދު ކުށްވެރިކުރައްވައިފި އެވެ.
މިނިސްޓަރު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ޖަބަލިއާ ކޭމްޕަށް ހަމަލާދީ ގިނަ އަދަދެއްގެ އާންމުން ޝަހީދު ކޮށްލާ އެތައް ބަޔަކު ޒަހަމްކޮށްލި މި ހަމަލާ އެންމެ ހަރުކަށި އިބާރާތުން ކުށްވެރިކުރައްވާ ކަމަށެވެ.
އަދި، ރާއްޖެއިން އިޒްރޭލުން އާންމުންނަށް އަމާޒުކޮށް ދޭ ލާއިންސާނީ ހަމަލާތައް ކުށްވެރިކޮށް އިންސާނީ ހައްގުތައް ކަށަވަރުކުރުމަށް ބައިނަލްއަގުވާމީ މުޖުތަމައަށް ގޮވާލާ ގޮވާލުން ޝާހިދު ތަކުރާރުކުރެއްވި އެވެ.
އަދި ހިސާރުކޮށްފައިވާ ގާޒާއަށް އިންސާނީ އެހީ ފޯރުކޮށްދޭނެ މަގުތައް ފަހިކޮށްދިނުމަށްވެސް މީގެ ކުރިން އދ. އާންމު މަޖިލީހުގެ ރިޔާސަތުވެސް ބެލެހެއްޓެވި ޝާހިދު ގޮވާލެއްވި އެވެ.
ރާއްޖެއިން އަބަދުވެސް ފަލަސްތީނާއެކު ބާއްވާ ހާއްސަ ގާތް ގުޅުމުގެ ތެރެއިން މިފަހަރުގެ ހަމަލާތަކާ ގުޅިގެންވެސް ދިވެހިން ދަނީ އަޑުއުފުލާ އެހީތެރިވަމުންނެވެ.
އެގޮތުން ރާއްޖެއިން ވަނީ ފަލަސްތީނަށް ދެ މިލިއަން މަސްދަޅުގެ ހަދިޔާކޮށްފަ އެވެ. އަދި، މާލެއާއި ރަށްތަކުގައި އިޒްރޭލާ ދެކޮޅަށް އަޑުއުފުލާ އެކި ޖަމްއިއްޔާތައް މެދުވެރިކޮށް 25 މިލިއަނަށްވުރެ ގިނަ ރުފިޔާ ފަލަސްތީނުގައި ހާލުގައި ޖެހިފައިވާ ފަރާތްތަކަށް ހަދިޔާކޮށްފަ އެވެ.
ނަމަވެސް، ދިވެހިން އެންމެ ބޮޑަށް ގޮވާލަމުންދާ އިޒްރޭލުގެ ރައްޔިތުން ރާއްޖެ އައުން މަނާކުރުމާމެދު ސަރުކާރުން އަދި ފިޔަވަޅެއް އަޅާފައެއް ނުވެ އެވެ.
އިޒްރޭލުން ޖަބަލިއާއަށް ހަމަލާދިނީ އެ ސަރަހައްދުގައި ހަމާސް ޖަމާއަތުގެ ކޮމާންޑަރަކު ހުރި ކަމަށް ބުނެ އެވެ. މިދިޔަ މަހުގެ ހަތެއްގައި އިޒްރޭލުގެ ގަތުލުއާންމު ވަރުގަދަކޮށް ހަނގުރާމަ އިއުލާންކުރީ ހަމާސްއިން ދިން ހަމަލާއަކާ ގުޅިގެންނެވެ. އެ ހަމަލާގައި އިޒްރޭލުގެ 1400 އަށްވުރެ ގިނަ މީހުން މަރާލި އެވެ.
ބަދަލުގައި އިޒްރޭލުން ދެމުންދާ ހަމަލާތަކުގެ ތެރެއިން އިއްޔެ ޖަބަލިއާއަށް ދިން ހަމަލާގައި 400 އަށްވުރެ ގިނަ އާންމުން ޝަހީދުކޮށްލި އެވެ. މީގެ ތެރޭގައި ގިނަ އާއިލާތަކުގެ ހުރިހާ މެންބަރުން ހިމެނެ އެވެ. ގާޒާގެ އިންޓާނަލް މިނިސްޓްރީން ބުނީ އެމެރިކާގެ ހަ ބޮމެއް ބޭނުންކޮށްގެން އިއްޔެ ދިން ހަމަލާގައި ޖަބަލިއާ ކޭމްޕު އެކީހެން ފުނޑުފުނޑު ވެފައިވާ ކަމަށެވެ.
ވައިގެ މި ހަމަލާތަކުގެ އިތުރުން އިޒްރޭލު ސިފައިން ދަނީ އެއްގަމު މަގުން އުތުރު ގާޒާއަށް އެރުމަށް މަސައްކަތް ކުރަމުންނެވެ. އަދި ކަނޑުގެ މަގުންވެސް ގާޒާއަށް ދަނީ ހަމަލާދެމުންނެވެ. މި ހަމަލާތަކުގައި މަރުވި މީހުންގެ އަދަދު 8،500 އަށް އަރަ އެވެ.
