އިޒްރޭލުން ފަލަސްތީނުގައި ހިންގަމުންދާ ގަތުލުއާންމާ ގުޅިގެން ބޮލީވިއާއިން އިޒްރޭލާއެކު އޮތް ޑިޕްލޮމެޓިކް ގުޅުން ކަނޑާލައިފި އެވެ.
އެކަން ހާމަކޮށް ބޮލީވިއާގެ ސަރުކާރުން ނެރުނު ބަޔާނެއްގައި ބުނެފައިވަނީ އިޒްރޭލާ އެކު އޮތް ގުޅުންތައް ކަނޑާލަން ނިންމީ އިޒްރޭލުގެ އަސްކަރިއްޔާއިން ފަލަސްތީނުގައި، ހާއްސަކޮށް ގާޒާގައި ކުރިއަށް ހިންގަމުންދާ ލާއިންސާނީ އަމަލުތަކާއި ހަނގުރާމައިގެ ޖަރީމާތަކުގެ ސަބަބުން ކަމަށެވެ.
"ގާޒާގެ އެތައް ހާސް އާންމުންނެއް މަރަލާ ގެދޮރު ދޫކޮށްލުމަށް މަޖުބޫރުކުރުވާފައިވާ އިޒްރޭލުގެ ހަމަލާތައް މިހާރުން މިހާރަށް ހުއްޓާލުމަށް ގޮވާލަން," އެ ބަޔާނުގައިވެ އެވެ.
މިއީ ދެކުނު އެމެރިކާގެ މި ގައުމުން އިޒްރޭލާއެކު އޮތް ގުޅުން ކަނޑާލި ފުރަތަމަ ފަހަރެއް ނޫނެވެ. އެގޮތުން 2019 ގައި އިޒްރޭލުން ގާޒާއަށް ވަދެގަނެ ހިންގި ހަނގުރާމައިގެ ޖަރީމާތަކާ ގުޅިގެން ވެސް ބޮލީވިއާއިން އިޒްރޭލާއެކު ގުޅުންތައް ކަނޑާލައިފި އެވެ.
އެ ގައުމުގެ މި ނިންމުމާއެކު ދެކުނު އެމެރިކާގެ އެހެން ދެ ގައުމެއް ކަމަށްވާ ކޮލަމްބިއާ އަދި ޗިލީއިން ވަނީ އެ ގައުމުތަކުން އިޒްރޭލަށް ކަނޑައަޅާފައިވާ ސަފީރުން އަނބުރާ ގެނައުމަށް ވަނީ ނިންމާފަ އެވެ. އެ ސަރަހައްދުގެ އެހެން ގައުމުތަކުންވެސް އިޒްރޭލާ ދެކޮޅަށް ފިޔަވަޅުތަކެއް އަޅާނެ ކަމަށް ބެލެވޭ ކަމަށް އަލް ޖަޒީރާއިން ވަނީ ރިޕޯޓުކޮށްފަ އެވެ.
ދެކުނު އެމެރިކާ ގައުމުތަކުގެ މި ނިންމުންތަކާއެކު ގިނަ ބަޔަކު ދަނީ އަރަބި އަދި އިސްލާމީ ގައުމުތަކުން އިޒްރޭލާ ދެކޮޅަށް އެކަށީގެންވާ ފިޔަވަޅުތަކެއް ނާޅާ ކަމަށް ބުނެ ވަރަށް ބޮޑަށް ފާޑުކިޔާފަ އެވެ.
މިދިޔަ މަހު ހަތެއްގައި ފަލަސްތީނުގެ ހަމާސް ޖަމާއަތުން ދިން ހަމަލާތަކުގެ ބަދަލުގައި ހަނގުރާމަ އިއުލާންކޮށް، ވޭތުވެދިޔަ 75 އަހަރު އިޒްރޭލުން ހިންގަމުންދާ ގަތުލުއާއްމު ވަރުގަދަކޮށް ދެމުންދާ ހަމަލާތަކުގައި ގާޒާއިން ޝަހީދުވި މީހުންގެ އަދަދު ވަނީ 8،500 އިން މައްޗަށް އަރާފަ އެވެ. އިޒްރޭލުގެ ހަމަލާތަކުގައި ހުޅަނގު އައްސޭރިން ޝަހީދުވި މީހުންގެ އަދަދު ވަނީ 124 އަށް އަރާފަ އެވެ.
އިޒްރޭލުން ވަނީ ގާޒާއިން ފެނާއި ކަރަންޓު އަދި ތެޔޮ ލިބޭނެ މަގުތައް ބަންދުކޮށްފަ އެވެ. ގާޒާގެ މުވާސަލާތީ ގުޅުންތައްވެސް 24 ގަޑިއިރަށް އިޒްރޭލުން ކަނޑާލި އެވެ. އިޒްރޭލިގެ ސިފައިން މިހާރު ދަނީ އުތުރު ގާޒާއަށް ބިމުގެ މަގުން އަރައިގަތުމަށް މަސައްކަތް ކުރަމުންނެވެ.
ބައިނަލްއަގުވާމީ އެކި ޖަމްއިއްޔާތަކުންނާއި ގައުމުތަކުން ގާޒާއަށް ފޮނުވި އެހީ ރަފާހު ބޯޑަރުގައި ތޮއްޖެހިފައި ވީ ނަމަވެސް އިޒްރޭލުން އެ އެހީގެ އުޅަނދުތައް ވެއްދުމަށް ވަނީ ދެކޮޅުހަދާފަ އެވެ. މި މަހުގެ ހަތަކުން ފެށިގެން މިއަދާ ހަމައަށް ގާޒާއަށް ވަދެފައިވަނީ 100 އެއްހާ އެހީގެ އުޅަނދެވެ. މިއަދު އިތުރު 66 އުޅަނދު ވަންނާނެ ކަމަށް ރިޕޯޓުތައް ބުނެ އެވެ.
