އިޒްރޭލުން ގާޒާގެ އެންމެ ބޮޑު ރެފިއުޖީ ކޭމްޕު ކަމަށްވާ ޖަބަލްޔާ ކޭމްޕަށް ބޮން އަޅައި އެތައް ބަޔަކު ޝަހީދުކޮށްލައިފި އެވެ.
މަންޒަރު ދުށް މީހުން ރިޕޯޓުކުރި ގޮތުގައި ޖެޓުތަކުން އެއްފަހަރާ ހަތެއް ނުވަތަ އަށް މިސައިލް އެ ސަރަހައްދަށް ވައްޓާލި އެވެ. އެއާއެކު ބާރުގަދަ އަޑެއް ގޮވައި އެތައް ބަޔަކު މަރުވެގެންދިޔަ ކަމަށް ރިޕޯޓުތައް ބުނެ އެވެ.
މި ހަމަލާގައި މަދުވެގެން 50 އަށް ވުރެ ގިނަ މީހުން ޝަހީދުވި ކަމަށް ރިޕޯޓުތައް ބުނެ އެވެ. އަދި 20 ގެއެއް އެއްކޮށް ބިމާ ހަމަވި އެވެ.
އިޒްރޭލުން ބުނާ ގޮތުގައި މިއީ އެ ކޭމްޕުގައި ފިލައިގެން އުޅުނު ހަމާސްގެ ލީޑަރަކަށް އަމާޒުކޮށް ދިން ހަމަލާއެކެވެ. ހަމާސްއިން ވަނީ އެ ޖަމާއަތުގެ ލީޑަރަކު އެ ކޭމްޕުގައި ނޫޅޭ ކަމަށް ބުނެފަ އެވެ.
އެ ކޭމްޕު ކައިރީގައި ހުންނަ އިންޑޮނޭޝިއާ ހޮސްޕިޓަލްގެ ބިންމަތީގައި އެތައް ބަޔަކަށް ފަރުވާ ދޭ މަންޒަރު ފެންނަ ވީޑިއޯތައް ދަނީ ދައުރުވަމުންނެވެ.
