މި މަހުގެ ހަތްވަނަ ދުވަހު ހަމާސްއިން އިޒްރޭލަށް ދިން ކުއްލި ހަމަލާގެ މައުލޫމާތު އިޒްރޭލުގެ އިންޓެލިޖެންސްގެ ވެރިން ދީފައި ނުވާ ކަމަށް ބުނުމަށް ފަހު އެ ވާހަކަތައް އަނބުރާ ގެނެސް، އެ ގައުމުގެ ބޮޑުވަޒީރު ބެންޖަމިން ނަތަންޔާހޫ މައާފަށް އެދެފި އެވެ.
ރާއްޖެ ގަޑިން ރޭ ފަތިހު 4:00 ހާއިރު ނަތަންޔާހޫ ކުރި ޓުވީޓެއްގައި ފުރަތަމަ ބުނީ ހަމާސްއިން ހަމަލާއެއް ދިނުމަށް ރާވަމުން ދާކަމުގެ މައުލޫމާތު އެއްވެސް ފަރާތަކުން ނަތަންޔާހޫއާ ހިއްސާ ކޮށްފައި ނުވާ ކަމަށެވެ.
"އަސްކަރިއްޔާގެ އިންޓެލިޖެންސްގެ ވެރިންނާއި ޝިން ބެތުގެ ވެރިން ހިމެނޭހެން ސަލާމަތާ ބެހޭ ހުރިިހާ އޮފިސަރުން ލަފާ ކޮށްފައި އޮތީ ހަނގުރާމައަކަށް ދިއުމުގެ ބަދަލުގައި ހަމާސްއިން ބޭނުން ވަނީ އެއްބަސްވުމެއް އެކުލަވައިލުމަށް ކަމަށް،" ޕޯސްޓު ކުރުމަށްފަހު ޑިލީޓު ކޮށްލި ޓުވީޓުގައި ނަތަންޔާހޫ ލިޔެފައިވެ އެވެ.
އެކްސްގައި ނަތަންޔާހޫ ކުރި އެ ޕޯސްޓާ ގުޅިގެން ސިޔާސީ ހަލަބޮލިކަމެއް އުފެދި އިޒްރޭލުގެ ހަނގުރާމައާ ބެހޭ ކެބިނެޓުގައި ވެސް ބައިބައިވުން އުފެދުނެވެ. އޭގެ 10 ވަރަކަށް ގަޑިއިރުފަހުން ފުރަތަމަ ޓުވީޓު ޑިލީޓުކޮށްލުމަށްފަހު ނަތަންޔާހޫ ވަނީ މައާފަށް އެދި އެހެން ޓުވީޓެއް ކޮށްފަ އެވެ.
ދެވަނަ ޓުވީޓުގައި ނަތަންޔާހޫ ވަނީ އޭނާއަށް ހެދުނީ ގޯހެއް ކަމަށާއި ކުރިން ކުރި ޓުވީޓުގައި ދެއްކި ވާހަކަތަކަކީ ދައްކައިގެން ނުވާނެ ވާހަކަތަކެއް ކަމަށް ބުނެފަ އެވެ. އަދި ސަލާމަތާ ބެހޭ ހުރިހާ ގޮފިތަކެއްގެ ވެރިންނަށް ފުރިހަމަ އެއްބާރުލުން އެބަ އޮތް ކަމަށް ވެސް ނަތަންޔާހޫ ބުނެފައިވެ އެވެ.
ނަތަންޔާހޫ މިފަދައިން ކަން ކޮށްފައި މިވަނީ މިމަހުގެ ހަތްވަނަ ދުވަހު ހަމާސްއިން ދިން ކުއްލި ހަމަލާއާ ގުޅިގެން އިޒްރޭލުގެ އާންމުންގެ ނުރުހުން ވެސް ނަތަންޔާހޫއަށް އަމާޒުވެފައިވާ ދަނޑިވަޅެއްގަ އެވެ.
ހަމާސްއިން ދިން ހަމަލާއާ ގުޅިގެން އިޒްރޭލުގެ އަސްކަރިއްޔާއާއި އިންޓެލިޖެންސް އަދި ސަރުކާރުގެ ބައެއް އިސްވެރިން ވަނީ މަގާމުގެ މަސްއޫލިއްޔަތު އަދާ ކުރުމުގައި ފޭލިވެފައި ވާކަން އަމިއްލައަށް ގަބޫލުކޮށް އިއުލާނު ވެސް ކޮށްފަ އެވެ. ނަމަވެސް މިއަދާ ހަމައަށް ވެސް ނަތަންޔާހޫ އެފަދަ އެއްވެސް ވާހަކައެއް ދައްކައިފައެއް ނުވެ އެވެ.
ނަތަންޔާހޫގެ އަމަލުތަކަށް އިޒްރޭލުގެ ކުރީގެ ސަރުކާރުތަކުގެ ވެރިންނާއި ސިޔާސީ މީހުން ވަރަށް ބޮޑަށް ފާޑު ކިޔައިފައިވާއިރު، ހަމާސްއިން ވަނީ އިޒްރޭލުގެ ސަރުކާރުގައި ބޮޑު ރެނދެއް ލާފައި ވާކަމަށް މީގެ ކުރިން ބުނެފަ އެވެ.
