އަހަރުގެ މިހާތަނަށް ރާއްޖެ އަށް ދޮޅު މިލިއަން ޓޫރިސްޓުން ޒިޔާރަތްކޮށްފި އެވެ.
ޓޫރިޒަމް މިނިސްޓްރީން އާއްމުކޮށްފައިވާ އެންމެ ފަހުގެ ތަފާސް ހިސާބުތައް ދައްކާގޮތުން މިދިޔަ ހޮނިހިރު ދުވަހުގެ ނިޔަލަށް ރާއްޖެ އަށް 1,505,366 ޓޫރިސްޓުން ވަނީ ޒިޔާރަތްކޮށްފަ އެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 13.4 ޕަސެންޓް އިތުރު އަދަދެކެވެ. މިދިޔަ އަހަރުގެ އެ މުއްދަތުގައި ޒިޔާރަތްކުރީ 1.3 މިލިއަން ޓޫރިސްޓުންނެވެ.
ތަފާސް ހިސާބުތަަކަށް ބަލާއިރު އެންމެ ގިނައިން ޓޫރިސްޓުން އަންނަ ގައުމެއްގެ ގޮތުގައި އަދިވެސް އޮތީ ރަޝިޔާ އެވެ. އެގައުމުން މާކެޓުގެ 11.5 ޕަސެންޓު ހިއްސާ ކުރަމުންދާއިރު އަހަރުގެ މިހާތަނަށް 172،472 ޓޫރިސްޓުން ޒިޔާރަތްކުރި އެވެ.
ދެވަނަ އަށް އެންމެ ގިނަ ޓޫރިސްޓުން އަންނަ ގައުމަކީ އަނެއްކާވެސް އިންޑިއާއެވެ. އެ ގައުމުން މިހާތަނަށް 163،513 ޓޫރިސްޓުން ޒިޔާރަތްކޮށްފައިވާއިރު ތިންވަނަ އަށް މިހާރު އޮތް ޗައިނާއިން ޒިޔާރަތްކުރީ 163،063 ޓޫރިސްޓުންނެވެ.
ޓޫރިސްޓުން ޒިޔާރަތްކުރާ އަދަދު މިދިޔަ އަހަރަށްވުރެ އިތުރުވެފައިވާއިރު ސަރުކާރުން އަމާޒު ހިފާފައިވަނީ މި އަހަރު 1.8 މިލިއަން ޓޫރިސްޓުން ރާއްޖެ ގެނައުމަށެވެ. އަދި މާކެޓު ރަނގަޅުނަމަ ދެ މިލިއަނާއި ގާތްކުރާ އަދަދަކަށް ޓޫރިސްޓުން ޒިޔާރަތްކުރާނެ ކަމަށް ސަރުކާރުން ވަނީ ލަފާކޮށްފަ އެވެ.
ޓޫރިސްޓު އެރައިވަލް ނަމްބަރުތަކަށް ބަލާއިރު ސަރުކާރުގެ އަމާޒު ހާސިލުކުރެވޭނެ އެވެ.
ރާއްޖޭގައި މިހާރު 1268 ޓޫރިސްޓް ޕްރޮޕަޓީ ހިންގަމުންދެ އެވެ. އެއީ 174 ރިސޯޓާއި 918 ގެސްޓްހައުސް އާއި 162 ސަފާރީގެ އިތުރުން 14 ހޮޓަލެވެ. މި ތަންތަނުގައި ޓޫރިސްޓުން ބޭނުންކުރަން ހުރި އެނދުގެ އަދަދަކީ 62،814 އެވެ.
