އިޒްރޭލުން ގާޒާއިން ކަރަންޓާއި ފެން ކަނޑާލާ ތެޔޮ ފަދަ އިންސާނީ އެހީ އެތެރެކުރުން ހުއްޓުވިތާ މިއަދަށް 15 ދުވަސް ވެފައިވާއިރު، މުޅި އެކުގައި ކަރަންޓު ކެނޑުމާ ގުޅިގެން ގާޒާގެ 30 އިންސައްތަ ހޮސްޕިޓަލުގެ ހިދުމަތް ހުއްޓިފައިވާ ކަމަށް އދ. އިން ބުނެފި އެވެ.
މި މަހުގެ ހަތެއްގައި ފަލަސްތީނުގެ ހަމާސް ޖަމާއަތުން ދިން ހަމަލާތަކުގެ ބަދަލުގައި ހަނގުރާމަ އިއުލާންކޮށް، ވޭތުވެދިޔަ 75 އަހަރު އިޒްރޭލުން ހިންގަމުންދާ ގަތުލްއާމު ވަރުގަދަކޮށް ގާޒާއަށް އެހީ ފޯރުކުރުން އެކީހެން އިޒްރޭލުން ވަނީ ހުއްޓުވާފަ އެވެ.
އޭގެ ފަހުން 50 އަށް ވުރެ މަދު އެހީގެ އުޅަނދު، މިސްރުގެ ރަފާހު ބޯޑަރު ހުރަސްކޮށް ގާޒާއަށް ވަތް ނަމަވެސް އޭގެން އެއްވެސް އުޅަނދަކުންވެސް ތެލުގެ އެހީ ނުލިބޭ ކަމަށް ހަމާސްއިން ވަނީ މީގެ ކުރިން ބުނެފަ އެވެ.
މި ހަމަލާތަކުގެ ކުރިން ދުވާލަކު ގާޒާއަށް 100 އަށްވުރެ ގިނަ އެހީގެ އުޅަނދު ވަދެ އެވެ. މިހާރުވެސް އެތައް ސަތޭކަ އެހީގެ އުޅަނދެއް އެ ބޯޑަރުގައި އޮތް ނަމަވެސް އިޒްރޭލުން ހުއްދަނެތި ގާޒާއަށް ވަންނަން އުޅެފި ނަމަ ހަމަލާދޭނެ ކަމަށް ބުނެފަ އެވެ.
އދ. އިން މިއަދު ބުނި ގޮތުގައި ގާޒާގައި ހުރި 35 ހޮސްޕިޓަލުގެ ތެރެއިން 12 ހޮސްޕިޓަލު އަދި 72 ކްލިނިކުގެ ތެރެއިން 46 ކްލިނިކު މިހާރު ވަނީ ޖަނަރޭޓަރުތަކުން ތެޔޮ ހުސްވުން ނުވަތަ އިޒްރޭލުގެ ހަމަލާއެއް އަމާޒުވުމުގެ ސަބަބުން ހިދުމަތް ނުދެވޭ ހާލަތައް ގޮސްފަ އެވެ.
"ގާޒާގައި ހުރި ހުރިހާ ހޮސްޕިޓަލަކާއި ކްލިނިކެއްގެ ހިދުމަތް ދިނުން ތެޔޮ ހުސްވުމުގެ ސަބަބުން ކުރިއަށް އޮތް 48 ގަޑީރުގެ ތެރޭގައި ހުއްޓޭނެ، މިއީ އިންސާނީ ކަރިސާއެއް" ގާޒާގައި ހުރި އދ. ގެ އޮފިޝަލަކު ގަތަރުގެ އަލްޖަޒީރާއަށް ބުނެފައިވެ އެވެ.
އިޒްރޭލުން ދިން ހަމަލާތަކުގައި މިހާތަނަށް 24 އެމްބިއުލާންސެއް ހަލާކުވެފައިވާއިރު ތެޔޮ ހުސްވުމުގެ އިތުރު އެމްބިއުލާންސްތަކަށް ވެސް ވަނީ ހިދުމަތް ދިނުމަށް ހުރަސްއެޅިފަ އެވެ.
ގާޒާގެ ސިއްހީ ނިޒާމު ފެއިލްވުމުގެ ތުންފަތްމަތީގައި ވާއިރު، އެ ސަރަހައްދުގެ ހޮސްޕިޓަލުތަކުގައި ދުވަސްނުފުރާ ވިހާފައިވާ 130 ކުޑަކުއްޖަކު އިންކިއުބޭޓަރުތަކުގައި ފަރުވާދެމުންދާއިރު ހާހަކަށްވުރެ ގިނަ މީހުން ދަނީ ކިޑްނީ މައްސަލަތަކުގައި ޑަޔަލަސިސް ގެ ފަރުވާ ހޯދަމުންނެވެ. ކަރަންޓު ކެނޑުމާއެކު މި ހުރިހާ އެންމެންގެ ފުރާނައަށް ވެސް ނުރައްކާވާނެ އެވެ.
މި މަހުގެ ހަތްވަނަ ދުވަހު ފެށި މި ހަމަލާތަކުގައި ފަލަސްތީނުގެ 6،050 އަށްވުރެ ގިނަ މީހުން ވަނީ ޝަހީދުކޮށްލާފަ އެވެ. އިއްޔެ އެކަނިވެސް ފަލަސްތީނުގެ 700 އަށްވުރެ ގިނަ މީހުން ވަނީ ޝަހީދުކޮށްލާފަ އެވެ.
އެ ދުވަހުން ފެށިގެން ހަމާސްއިން ދިން ހަމަލާތަކުގައި މިހާތަަނަށް އިޒްރޭލުން 1400 އަށްވުރެ ގިނަ މީހުން ވަނީ މަރުވެފަ އެވެ. އޭގެ ތެރޭގައި 300 ސިފައިން ހިމެނެ އެވެ.
