އިނގިރޭސިވިލާތުގެ ބިލިއަނަރު ސަ ރިޗާޑް ބްރޭންސަންގެ ވާޖިން އެޓްލާންޓިކް އެއާލައިނުގެ ދަތުރުތައް ރާއްޖެއަށް މިއަދު ފަަށައިފި އެވެ.
ލަންޑަނުގެ ހީތުރޯ އެއާޕޯޓާއި ވެލާނާ އިންޓަނޭޝަނަލް އެއާޕޯޓާ ދެމެދު ޑައިރެކްޓް ދަތުރުތައްކުރާ މި އެއާލައިނުގެ ފުރަތަމަ ފްލައިޓް ރާއްޖެއަށް ޖެއްސީ މިއަދު ހެނދުނު 07:40 ގަ އެވެ. އެ ފްލައިޓަށް މަރުހަބާ ދެންނެވުމުގެ ގޮތުން ބޮޑުބެރާއެކު ސަގާފީ ހަރަކާތެއް ބޭއްވި އެވެ.
ވާޖިން އެޓްލާންޓިކްގެ ދަތުރުތައް ރާއްޖެއަށް ފެށުން ފާހަގަކުރަން ބޭއްވި އެ ރަސްމިއްޔާތުގައި އިނގިރޭސިވިލާތުން ރާއްޖެއަށް ކަނޑައަޅުއްވާފައި ހުންނަވާ ސަފީރު، ކެރޯން ރޮސްލާ އާއި އެމްއޭސީއެލްގެ އިސް ބޭފުޅުންގެ އިތުރުން އެއާލައިންގެ ރާއްޖޭގެ އެޖެންޓް ވޮޔޭޖަސް މޯލްޑިވްސްގެ އިސް ބޭފުޅުންވެސް ބައިވެރިވެވަޑައިގެންނެވި އެވެ.
އެމްއޭސީއެލް އިން ބުނި ގޮތުގައި ވާޖިން އެޓްލާންޓިކުން ރާއްޖެއަށް ހަފްތާއަކު ތިން ދުވަހު ދަތުރުތައް ބާއްވާނެ އެވެ. އެ ދަތުރުތަކުގައި އެއާލިއުނުން ބޭނުންކުރާނީ ބޮއިން 787 މަރުކާގެ ބޯޑެވެ. މި ބޯޓުތަކުގައި އަޕަ ކްލާސް 31 ސީޓާއި، ޕްރިމިއަމް 35 ސީޓް އަދި އިކޮނޮމީ ޑިލައިޓްގެ 192 ސީޓް ހުރެ އެވެ.
ވާޖިން އެއާލައިން އިން ރާއްޖެއަށް ދަތުރު ފެށުން ފާހަގަ ކުރުމަށް ބޭއްވި ރަސްމިއްޔާތު -- ފޮޓޯ: އެމްއޭސީއެލް
ވާޖިން އެޓްލާންޓިކްސް އަޕާ ކްލާސް ޕަސިންޖަރުންނަށް ނިދާލެވޭނެ ގޮތައް އެނދާއި އޮންބޯޑް މީލް އަދި ބާގެ ހިދުމަތް ލިބޭނެ އެވެ. ޕްރީމިއަމް ކްލާހުގައި ލަގްޒަރީ ލެދާ ގޮނޑިތައް ހުންނައިރު ކެބިން ކަސްޓަމަރުންނަށްވެސް ކޮމްޕްލިމެންޓަރީ މީލް އަދި ބެވަރޭޖް ފޯރުކޮށްދޭނެ އެެވެ.
އެ އެއާލައިންގެ ދަތުރުތައް ފެށުމާއި ގުޅޭގޮތުން އެމްއޭސީއެލްގެ މެނޭޖިން ޑިރެކްޓަރު މަހުޖޫބް ޝުޖާއު ވިދާޅުވި ގޮތުގައި މިއީ އިނގިރޭސިވިލާތާއި ރާއްޖެއާ ދެމެދު ވައިގެ ދަތުރުފަތުރުގެ ގުޅުން ބަދަހިކުރުމަށް ލިބުނު ވަރަށް ބޮޑު ކުރިއެރުމެކެވެ.
އިނގިރޭސިވިލާތުން ރާއްޖެއަށް ކަނޑައަޅުއްވާފައި ހުންނަވާ ސަފީރު، ކެރޯން ރޮސްލާ ވިދާޅުވި ގޮތުގައި ރާއްޖެއާ އެ ގައުމާ ދެމެދު ސީދާ ދަތުރުކުރާ އެއާލައިނުތައް އިތުރު ކުރުމަކީ، ދަތުރު ކުރާ ފަރާތްތަކަށް ލިބޭ ވަރަށް ބޮޑު ފަސޭހައެއް ކަމަށެވެ. އަދި ވާޖިން އެއާލައިންގެ މި ދަތުރުތަކާއެކު ދެގައުމުގެ މެދުގައި ދަތުރުފަތުރުގެ ރޮނގުން ކުރިއެރުން ލިބިގެންދާނެ ކަމަށް ވިދާޅުވި އެވެ.
