ގާޒާގެ ހޮސްޕިޓަލަށް ހަމަލާ ދިނުމުން، އިޒްރޭލުގެ ފުލުހުންނަށް ޔުނީފޯމް ފަހައިދިނުން އިންޑިއާގެ ކުންފުންޏަކުން ހުއްޓާލައިފި އެވެ.
ދެހާސް ފަނަރަ ވަނަ އަހަރުން ފެށިގެން އިޒްރޭލުގެ ފުލުހުންނަށް ޔުނިފޯމް ސަޕްލައިކޮށްދޭ އިންޑިއާގެ ކުންފުންޏަކީ، ކެރެލާގެ ކަންނޫރު ޑިސްޓްރިކްޓައި ހިންގާ މަރްޔަން އެޕެރަލް ޕްރައިވެޓް ލިމިޓެޑެވެ.
ހަމާސް އާއި އިޒްރޭލުން މިހާރު ކުރިޔަށް ގެންދާ ހަނގުރާމަ ފެށި ފަހުން ވެސް ޔުނިފޯމު އޯޑަރެއް އެ ކުންފުންޏަށް ލިބިފައިވެ އެވެ.
ނަމަވެސް ގާޒާގެ އަލް އަހްލީ އަރަބް ހޮސްޕިޓަލަށް އިޒްރޭލުން ބޮން އަޅައި 500 މީހުން މަރާލުމާ ގުޅިގެން، އިޒްރޭލު ފުލުހުންގެ ޔުނިފޯމުގެ އިތުރު އޯޑަރެއް ބަލައި ނުގަތުމަށް މަރްޔަން އެޕެރަލްއިން ވަނީ ނިންމައިފަ އެވެ.
އެ ކުންފުނީގެ މެނޭޖިން ޑިރެކްޓަރު ތޯމަސް އޮލިކަލް މީޑިއާއަށް ވިދާޅުވީ ހޮސްޕިޓަލަށް ހަމަލާދީ ކުޑަކުދިންނާއި އަންހެނުން އަދި އާންމު ރައްޔިތުން މަރާލުމުން ވަރަށް ބޮޑު ހިތްދަތި ކަމެއް ލިބިގެން ދިޔަ ކަމަށެވެ.
ކާބޯތަކެއްޗާއި ކަރަންޓާއި ސިއްހީ ފަރުވާ ފޯރުކޮށް ދޭން އިޒްރޭލުން ދެކޮޅު ހެދުމަކީ އަދި އާންމުން މެރުމަކީ ބަލައިގަނެވޭނެ ކަމެއް ނޫން ކަމަށް އޭނާ ވިދާޅުވި އެވެ.
އެހެންވެ އިޒްރޭލު ފުލުހުންނަށް ޔުނިފޯމު ފަހައިދިނުމުގެ އިތުރު އޯޑަރެއް ނަގާނީ "ހަމަޖެހުން ގާއިމުވުމުން" ކަމަށް ތޯމަސް ވިދާޅުވި އެވެ.
މަރްޔަން އެޕެރަލް ޕްރައިވެޓް ލިމިޓެޑުން އިޒްރޭލު ސިފައިންނަށް އަހަރަކު ލައްކައެއްހާ ޔުނިފޯމު ފަހައިދެ އެވެ.
މި މަހުގެ ހަތް ވަނަ ދުވަހު ފެށި ހަނގުރާމައިގައި މިހާތަނަށް ފަލަސްތީނުގެ 4،400 އަށް ވުރެ ގިނަ މީހުން ޝަހީދުކޮށްލައިފައިވެ އެވެ.
