އިޒްރޭލުން ގާޒާ ހޮސްޕިޓަލަކަށް ބޮން އަޅައި 500 ފަލަސްތީނު ރައްޔިތުން ޝަހީދުކޮށްލުމަކީ، ގަތުލު އާންމެއް ކަމަށް ބުނެ، އެ ހަމަލާ ދުނިޔޭގެ ލީޑަރުންނާއި ގައުމުތަކުން ކުށްވެރިކޮށްފި އެވެ.
އެ ހަމަލާއާ ގުޅިގެން ބައެއް ގައުމުތަކުން ދަނީ އިޒްރޭލު އަދި އެމެރިކާ އެމްބަސީ ކައިރިޔަށް ޖަމާވެ ނުރުހުން ވެސް ފާޅުކުރަމުންނެވެ.
އޮކްޓޯބަރު ހަތް ވަނަ ދުވަހުން ފެށިގެން މެދުކެނޑުމެއްނެތި އިޒްރޭލުން އަންނަނީ ގާޒާއަށް ބޮން އަޅަމުންނެވެ. ޓެރަރިސްޓުންނާ ދެކޮޅަށް ދެމުންދާ ހަމަލާތަކެއް ކަމަށް އިޒްރޭލުން ބުނި ނަމަވެސް މިއީ ސީދާ ގާޒާގައި އުޅޭ ފަލަސްތީނުގެ ރައްޔިތުން ނައްތާލުމަށް ދެމުންދާ ހަމަލާތަކެކެވެ.
ކަރަންޓު ކަނޑާލުމުގެ ސަބަބުން އަނދިރީގައި އޮތް ގާޒާގައި ހުންނަ އަލް އަހްލީ އަރަބް ހޮސްޕިޓަލަށް އިޒްރޭލުން ރޭ ބޮން އަޅައި ދިން ހަމަލާގައި 500 އަށްވުރެ ގިނަ މީހުން ޝަހީދުވެފައިވާ ކަމަށް ގާޒާގެ ސިއްހީ އިދާރާތަކުން ވަނީ ހާމަކޮށްފަ އެވެ.
ދުނިޔޭގެ ލީޑަރުންނާއި ގައުމުތަކާއި ޖަމިއްޔާތަކުން ވަނީ އެ ހަމަލާ ކުށްވެރިކޮށްފައި ވާއިރު، މިއީ ބައެއް ރައްދު، ކުރުކޮށެވެ.
ފަލަސްތީނުގެ ރައީސް މަހްމޫދު އައްބާސްގެ ތަރުޖަމާނަކު ވިދާޅުވީ އިޒްރޭލުގެ އެ ހަމަލާއަކީ ގަތުލުއާންމެއް ކަމަށެވެ. އަންނަ ބުދަ ދުވަހު އެމެރިކާގެ ރައީސް އިޒްރޭލަށް ވަޑައިގަތުމަށް ނިންމާފައި ވާއިރު، އެ ދަތުރުފުޅުގެ ތެރޭގައި ރައީސް ޖޯ ބައިޑަން ވަނީ އައްބާސްއާ ވެސް ބައްދަލުކުރަން ނިންމަވައިފަ އެވެ. ނަމަވެސް ހޮސްޕިޓަލަށް ދިން ހަމަލާއާ އަށް ފަހު އައްބާސް ވަނީ ބައްދަލުވުން ކެންސަލް ކުރައްވައިފަ އެވެ.
ބަލި މީހުންނާއި ހަނގުރާމައިގެ ސަބަބުން ގެދޮރު ގެއްލިފައިވާ މީހުން ދިރިއުޅެމުން ދިޔަ އަލް އަހްލީ އަރަބް ހޮސްޕިޓަލްގައި ފަލަސްތީނުގެ 500 މީހުން ޝަހީދުކޮށްލި ހަމަލާ، ސައޫދީ އަރަބިއްޔާއިން އެންމެ ހަރުކަށި އިބާރާތުން ވަނީ ކުށްވެރިކޮށްފަ އެވެ.
އެއީ ބައިނަލްއަގްވާމީ ގާނޫނުތަކާއި އިންސާނީ ހައްގުތަކުގެ ގާނޫނުތަކާ ކަނޑައެޅިގެން ހިލާފު ހަމަލާއެއް ކަމަށް ސައުދީ އަރަބިއްޔާގެ ފޮރިން މިނިސްޓްރީން ބުނެ އެވެ. މިފަދަ ދަރަޖައަކަށް އިޒްރޭލުގެ އަމަލުތައް ގޮސްފައިވާއިރު، ޖިނާއީ އެ އަމަލުތައް ދެފުށް ފެންނަ ގޮތެއްގައި ތަހުގީގުކުރަން ބައިނަލްއަގުވާމީ މުޖުތަމައަށް މަޖުބޫރު ކަމަށް ސައޫދީން ބުނެ އެވެ.
އުރުދުންއިން އިން ވެސް ސިފަކުރީ އެއީ ހަނގުރާމައިގެ ޖަރީމާއެއް އަދި ގަތުލުއާންމެއްގެ ގޮތުގަ އެވެ. ފަލަސްތީނުގެ އާންމުންނަށް ބައިނަލްއަގުވާމީ ރައްކާތެރިކަން ފޯރުކޮށްދީ ހަނގުރާމަ ހުއްޓާލަން ޖެހޭ ކަމަށް ގޮވައިލި އެވެ.
މިސްރުގެ ސަރުކާރުން ނެރުނު ބަޔާނެއްގައި ވަނީ ހަމަލާ އެންމެ ހަރުކަށި އިބާރާތުން ކުށްވެރިކޮށް، ބައިނަލްއަގްވާމީ މުޖުތަމައުން އިޒްރޭލާމެދު ފިޔަވަޅު އެޅުމަށާއި ހަނގުރާމައިގެ ޖަރީމާތައް ހުއްޓުވުމަށް ގޮވާލައިފަ އެވެ.
ގަތަރުން ބުނީ ގާޒާގެ އެކި ސަރަހައްދުތަކުގައި އިޒްރޭލުގެ ހަމަލާތައް ފުޅާކޮށް ހޮސްޕިޓަލްތަކާއި ސްކޫލްތަކާއި އެފަދަ އެހެނިހެން ތަންތަން ހިމެނުމަކީ ނުރައްކާތެރި ކަމެއް ކަމަށެވެ.
ހަމަލާ ކުށްވެރިކޮށް ތުރުކީގެ ރައީސް ރަޖަބް ތައްޔިބު އުރުދުޣާން ނެރުއްވި ބަޔާނުގައި ވިދާޅުވީ އަންހެނުންނާއި ކުޑަކުދިންނާއި ކުށެއް ނެތް އާންމުން ތިބި ހޮސްޕިޓަލަކަށް ހަމަލާ ދިނުމަކީ އިންސާނީ އެންމެ އަސާސީ އަސާސްތަކުން ވެސް އެއްކިބާ ވެފައިވާ ކަމުގެ މިސާލެއް ކަމަށެވެ. އެ އަނިޔާ ހުއްޓުވަން މުޅި ދުނިޔެއަށް އުރުދުޣާން ދައުވަތު ދެއްވި އެވެ.
ކެނެޑާގެ ބޮޑުވަޒީރު ޖަސްޓިން ޓްރޫޑޯ ވިދާޅުވީ ހަނގުރާމަ ކުރަމުންދާއިރު ވެސް ބަލަންޖެހޭ ގާނޫނުތަކާއި އުސޫލުތައް އެބަ ހުރި ކަމަށާއި، ހޮސްޕިޓަލަކަށް ބޮން އެޅުމަކީ ބަލައިގަނެވޭނެ ކަމެއް ނޫން ކަމަށެވެ.
އެ ހަމަލާ އދ. ގެ ސެކްރެޓަރީ ޖެނެރަލް އާއި ޑަބްލިއުއެޗްއޯ އިން ވެސް ވަނީ ހަރުކަށި އިބާރާތުން ކުށްވެރިކޮށްފަ އެވެ.
އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ވިދާޅުވީ ހަނގުރާމައިގެ ތެރޭގައި ވެސް ހޮސްޕިޓަލްތަކާއި ސިއްހީ ހިދުމަތްތެރިންނަކީ ބައިނަލްއަގްވާމީ ގާނޫނުތަކުގެ ދަށުން ހިމާޔަތް ލިބިފައިވާ ފަރާތްތައް ކަމަށެވެ.
ޑަބްލިޔޫއެޗްއޯގެ ޑިރެކްޓާ ޖެނެރަލް ޓެޑްރޯސް ވެސް ވިދާޅުވީ އާންމުންނާއި ސިއްހީ ފަރުވާ ދޭ ތަންތަނާއި ހިދުމަތްތެރިންނަށް ހިމާޔަތް ލިބެން ޖެހޭނެ ކަމަށެވެ. އަދި ގާޒާގެ ހޮސްޕިޓަލްތަކުން މީހުން ހުސްކުރުމަށް އިޒްރޭލުން ދޭ އިންޒާރު އަނބުރާ ގެންދިއުމަށް އޭނާ ގޮވާލައިލެއްވި އެވެ.
އަރަބި ލީގުގެ ވެރިޔާ އަހުމަދު އަބޫލް ވިދާޅުވީ އިޒްރޭލުން ދެމުންދާ ހަމަލާތައް ދުނިޔޭގެ ލީޑަރުން ވަގުތުން ހުއްޓުވަންޖެހޭ ކަމަށެވެ. ހޮސްޕިޓަލަކާއި ދިފާއުއެއް ނެތް އާންމުންނަށް ގަސްދުގައި ބޮން އަޅަނީ ކޮން ފަދަ ނުބައި ވިސްނުމަކުންތޯ؟ ކަމަށް އޭނާ ސުވާލު ކުރެއްވި އެވެ.
އޭނާ ވިދާޅުވީ އިޒްރޭލުން ހިންގާ ހަނގުރާމައިގެ ޖަރީމާތައް ލިޔެވޭނެ ކަމަށާއި ސަލާމަތް ނުވެވޭނެ ކަމަށެވެ.
