އިޒްރޭލުން ގާޒާއަށް މިހާރު ދެމުންދާ ހަމަލާތަކުގެ ތެރެއިން ހޮސްޕިޓަލަކަށް ބޮން އަޅައި 500 ފަލަސްތީނު ރައްޔިތުން ޝަހީދުކޮށްލައިފި އެވެ.
އޮކްޓޯބަރު ހަތްވަނަ ދުވަހުން ފެށިގެން މެދުކެނޑުމެއްނެތި އިޒްރޭލުން އަންނަނީ ގާޒާއަށް ބޮން އަޅަމުންނެވެ. ޓެރަރިސްޓުންނާ ދެކޮޅަށް ދެމުންދާ ހަމަލާތަކެއް ކަމަށް އިޒްރޭލުން ބުނި ނަމަވެސް މިއީ ސީދާ ގާޒާގައި އުޅޭ ފަލަސްތީނުގެ ރައްޔިތުން ނައްތާލުމަށް ދެމުންދާ ހަމަލާތަކެކެވެ.
ކަރަންޓު ކަނޑާލުމުގެ ސަބަބުން އަނދިރީގައި އޮތް ގާޒާގައި އަލް އަހްލީ އަރަބް ހޮސްޕިޓަލަށް އިޒްރޭލުން މިރޭ ބޮން އަޅައި ދިން ހަމަލާގައި 500 އަށްވުރެ ގިނަ މީހުން ޝަހީދުވެފައިވާ ކަމަށް ގާޒާގެ ސިއްހީ އިދާރާތަކުން ވަނީ ހާމަކޮށްފަ އެވެ. އެންމެ ފުރަތަމަ އަންދާޒާކުރީ 200-300 އާ ދެމެދުގެ އަދަދަކަށް މީހުން މަރުވި ކަމަށެވެ.
އެ ހޮސްޕިޓަލުގެ ގޯތި ތެރޭގައި ވެސް އެތައް ސަތޭކަ ރައްޔިތުންނެއް ދިޔައީ ހިމާޔަތް ހޯދަމުންނެވެ. އެއީ ހޮސްޕިޓަލަކަށް ވުމާ އެކު ހަމަލާ ދިނުމުގެ ފުރުސަތު ކުޑަކަމަށް ބެލުމަށް ފަހު އެވެ.
އެއްވެސް ވަރަކަށް އިންޒާރު ދިނުމެއް ނެތި އިޒްރޭލުން އަންނަނީ ބޮން އަޅައި ބޮޑެތި ގެއްލުންތަކެއް ގާޒާއަށް ދެމުންނެވެ. ހަމަލާތައް ހުއްޓުވުމަށް މިހާތަނަށް އެއްވެސް އަލިމަގެއް ހޯދިފައި ނުވެ އެވެ. އަދި, ދުވަހެއް ދުވަހަކަށް ހަމަލާތައް ގެންދަނީ ވަރުގަދަ ކުރަމުންނެވެ.
