އުތުރު ގާޒާގައި ދިރިއުޅެމުންދާ އެއް މިލިއަނަށް ވުރެ ގިނަ ރައްޔިތުން އެހެން ސަރަހައްދަކަށް ބަދަލުވުމަށް އިޒްރޭލުގެ އަސްކަރިއްޔާއިން 24 ގަޑިއިރުގެ މުހުލަތެއް ދީފި އެވެ.
އެ ސަރަހައްދުގައި ހަރަކާތްތެރިވަމުންދާ އދ. ގެ އިންސާނީ އެހީދޭ މުވައްޒަފުންނަށް އެތަން ދޫކޮށް ދިޔުމަށް އަންގާފައިވާ ކަމަށް އެ ޖަމާއަތުން ވަނީ ބުނެފަ އެވެ. އަދި, އެ ސަރަހައްދުގައި އުޅެމުންދާ ގައްޒާގެ އާބާދީގެ ދެބައިކުޅަ އެއްބައި ވެސް ގައްޒާގެ ދެކުނަށް ބަދަލުކުރަން ވަނީ އަންގާފަ އެވެ.
ކުރިއަށް އޮތް 24 ގަޑިއިރުގެ ތެރޭގައި މިފަދަ ކަމެއް ނުކުރެވޭނެ ކަމަށާއި އެ މީހުން އެހެން ތަނަކަށް ބަދަލުނުކުރެވޭނެ ކަމަށް އދ. ވަނީ ބުނެފަ އެވެ. އަދި, މިކަމުގެ ސަބަބުން އިންސާނީ ބޮޑު ކާރިސާއަކާ ކުރިމަތިލާން ޖެހިދާނެ ކަމަށް ވެސް ވަނީ ބުނެފަ އެވެ.
އެ އިންޒާރު ދިނީ ރޭގެ ވަގުތެއްގަ އެވެ. ގައްޒާގައި އުޅެމުންދަނީ ދެ މިލިއަނެއްހާ ފަލަސްތީނު ރައްޔިތުންނެވެ. އެ އެންމެން ވެސް ހާލުގައި ޖެހިފައިވާ ކަމަށް ރެޑް ކްރޮސްއިން ވަނީ ކަނޑައަޅާފަ އެވެ.
ގައްޒާގައި ވެރިކަންކުރާ ހަމާސް ޖަމާއަތަށް ނިސްބަތްވާ މީޑިއާތަކުން ވަނީ މިއީ އިޒްރޭލު ސަރުކާރުގެ ޕްރޮޕަގަންޑާގެ ގޮތުގައި ސިފަކޮށްފަ އެވެ. އަދި, އެ ސަރަހައްދު ދޫކޮށް ނުދިޔުމަށް ވަނީ އެދިފަ އެވެ.
އިޒްރޭލުގެ ހަމަލާތަކުގައި ޝަހީދުވި ފަލަސްތީނު މީހުންގެ އަދަދު 1،564 އަށް ވަނީ އަރާފަ އެވެ. އަދި, ހަނގުރާމާގެ ސަބަބުން ގާޒާއިން ގެދޮރު ގެއްލުނު މީހުންގެ އަދަދު 423,378 އަށް އަރައިފި.
