މެޑްރިޑް (އޮކްޓޫބަރު 12) - ބެލްޖިއަމްގެ ގައުމީ ޓީމުގެ ކުރީގެ ކެޕްޓަން އެޑެން ހަޒާޑް، މީގެ ދެ ދުވަސްކުރިން ފުޓްބޯޅަ ކުޅުން ހުއްޓާލިކަން އިއުލާންކުރިއިރު، އޭނާ އަށް އެމެރިކާ ލީގުންނާއި ސައުދީ ޕްރޯ ލީގުން ފުރުސަތުތަކެއް ލިބުނު މީޑިއާތަކުން ރިޕޯޓްކޮށްފި އެވެ.
ޗެލްސީ އާއި ރެއާލް މެޑްރިޑަށް ކުޅުނު ހަޒާޑް ފުޓްބޯޅަ ކުޅުން ހުއްޓާލީ އުމުރުން 32 އަހަރުގަ އެވެ. އާންމު ގޮތެއްގައި ކުޅުންތެރިން މޮޅަށް ކުޅޭ އުމުރެއްގައި ހަޒާޑް ކުޅުން ހުއްޓާލިކަން އިއުލާންކުރީ މިދިޔަ ސީޒަނަށް ފަހު ރެއާލް މެޑްރިޑުން އޭނާ ދޫކޮށްލުމުންނެވެ.
މެޑްރިޑުން ހަޒާޑް ދޫކޮށްލުމުން އޭނާ ބޭނުންވީ ޔޫރަޕްގެ ބޮޑު ކުލަބަކަށް ކުޅެން ޔޫރަޕްގައި މަޑުކުރާށެވެ. އެހެންނަމަވެސް، އެކަށީގެންވާ ހުށަހެޅުމެއް ނުލިބުމުން އޭނާ ކުޅުން ހުއްޓާލީ އެވެ.
ދުނިޔޭގެ ފުޓްބޯޅައިގެ ޓްރާންސްފާ ހަބަރުތައް ގެނެސްދޭ އެންމެ މަޝްހޫރު ރިޕޯޓަރު ފަބްރީޒިއޯ ރޮމާނޯ ބުނީ ހަޒާޑް ރިޓަޔާކުރިއިރު، އޭނާއަށް އެމެރިކާ ލީގުގެ ކުލަބުތަކުންނާއި، ސައުދީ ޕްރޯ ލީގުގެ ކުލަބުތަކުން ހުށަހެޅުންތަކެއް ލިބިފައިވާކަމަށެވެ.
ފަބްރީޒިއޯ ބުނީ ހަޒާޑަށް ހުށަހެޅުންތައް ލިބުުނު ނަމަވެސް އޭނާ ހިތްހަމަޖެހޭވަރުގެ ހުށަހެޅުމެއް ނުލިބޭތީ ހަޒާޑް ބޭނުންވީ ކުޅުން ހުއްޓާލަން ކަމަށެވެ.
އެމެރިކާ ލީގަކީ ޔޫރަޕްގެ ގިނަ ކުޅުންތެރިންތަކެއް ކެރިއަރުގެ ފަހު އަހަރުތައް ހޭދަކުރާ ލީގެކެވެ. އެ ގޮތުން ކުރީގެ މަޝްހޫރު ތަރިންކަމަށްވާ ސްޓީވެން ޖެރާޑް، ޑޭވިޑް ބެކަމް، ވޭން ރޫނީ، ފްރެންކް ލަމްޕާޑް، އަންދްރޭ ޕިރްލޯ އަދި ތިއެރީ އޮންރީ ފަދަ ކުޅުންތެރިން ކެރިއަރު އެއްކޮށް ނިންމާލީ އެމެރިކާ ލީގުގެ ކުލަބުތަކަށް ކުޅެފަ އެވެ.
ހަޒާޑަށް ދެން ހުށަހެޅުން ލިބުނު ސައުދީ ޕްރޯ ލީގަކީ މިދިޔަ ޖެނުއަރީ މަހު ޔޫރަޕްގެ މަޝްހޫރު ކުޅުންތެރިންނަށް ބޮޑު ހޭދައެއް ކުރި ލީގެކެވެ. މިގޮތުން ދުނިޔޭގެ މަޝްހޫރު ގިނަ ކުޅުންތެރިން މި ވަގުތު ކުޅެމުން އަންނަ ލީގުގެ ދެ ކުލަބަކުން ހަޒާޑަށް ހުށަހެޅުން ލިބުނު ކަމަށް މީޑިއާތަކުން ރިޕޯޓްކުރެ އެވެ.
ގަތަރުގައި 2022ގެ ވޯލްޑްކަޕަށް ފަހު ބެލްޖިއަމްގެ ގައުމީ ޓީމަށް ކުޅުން ހުއްޓާލި ހަޒާޑަކީ އެ ގައުމުގެ ފުޓްބޯޅައިގެ އެންމެ ކާމިޔާބު ކެޕްޓަނެވެ.
މީގެ އިތުރުން ޔޫރަޕްގެ ފުޓްބޯޅައިގައި އެންމެ ގިނަ ކާމިޔާބީތައް ހޯދި ބެލްޖިއަމްގެ ކުޅުންތެރިއަކީ ވެސް ހަޒާޑު އެވެ. އޭނާ ވަނީ އިނގިރޭސި ޕްރިމިއާ ލީގު، ފްރެންޗު ލީގު، ސްޕެނިޝް ލަލީގާ، ޔޫރޮޕާ ލީގު، ޔުއެފާ ޗެމްޕިިއަންސް ލީގު އަދި ފިފާ ކުލަބު ވޯލްޑްކަޕް ވެސް ކުލަބު ލެވެލްގައި އުފުލާލައިފަ އެވެ.
