މެޑްރިޑް (އޮކްޓޫބަރު 10) - ޗެލްސީ އާއި ރެއާލް މެޑްރިޑަށް ކުޅެފައިވާ ބެލްޖިއަމް ގައުމީ ޓީމުގެ ކުރީގެ ކެޕްޓަން، އެޑެން ހަޒާޑް ކުޅުން ހުއްޓާލައިފި އެވެ،
އުމުރުން 32 އަހަރުގައި ހަޒާޑް ކުޅުން ހުއްޓާލިއިރު، މިދިޔަ ސީޒަނަށް ފަހު ރެއާލް އިން ވަނީ އޭނާ ދޫކޮށްލައިފަ އެވެ.
ޗެލްސީ ދޫކޮށް 2019 ވަނަ އަހަރު ރެއާލަށް ހަޒާޑް ބަދަލުވީ 89 މިލިއަން ޕައުންޑްގެ ޓްރާންސްފާ ފީއެއްގަ އެވެ. އެކަމަކު، ރެއާލަށް ހަޒާޑް ސްޕެއިން ލީގުގައި ކުޅުނީ 54 މެޗެވެ.
ހަޒާޑްގެ ކްލަބު ކެރިއަރުގައި އެންމެ ވިދާލީ ޗެލްސީގައި ހޭދަކުރި ސީޒަންތަކުގަ އެވެ. ޗެލްސީއާ އެކު ހަޒާޑް ވަނީ ޕްރިމިއާ ލީގު ދެ ފަހަރު ކާމިޔާބުކޮށްފަ އެވެ.
"ސޯޅަ އަހަރުގެ ކެރިއަރެއްގައި 700 އަށްވުރެ ގިނަ މެޗު ކުޅުމަށް ފަހު، އަހަރެން މިއަދު މި ނިންމީ ކެރިއަރު ނިންމާލަން،" ރެއާލް އިން މި އަހަރުގެ ޖޫން މަހު ކޮންޓުރެކްޓް ބާތިލްކުރުމުން ކްލަބަކާ ނުގުޅިހުރި ހަޒާޑް ބުންޏެވެ. "އަމިއްލަ ނަފްސަށް އިތުބާރުކޮށް، އެންމެ ރަނގަޅު ވަގުތުގައި ހުއްޓާލަން އެނގެންޖެހޭ."
ރެއާލްއާ އެކު ހަޒާޑް ވަނީ ޗެމްޕިއަންސް ލީގާއި ކްލަބު ވޯލްޑް ކަޕާއި ޔޫރަޕިއަން ސުޕަ ކަޕް އަދި ސްޕެނިޝް ލީގު ކާމިޔާބުކޮށްފަ އެވެ. އެކަމަކު، ހަޒާޑްގެ ޕާފޯމަންސަށް ބަލާއިރު ރެއާލްގައި ހޭދަކުރީ މާ ކާމިޔާބު ދުވަސްތަކެއް ނޫނެވެ. ރެއާލަށް ކުޅުނު ޖުމްލަ 76 މެޗުގައި ހަޒާޑް ޖެހީ އެންމެ ހަތް ލަނޑެވެ.
ފްރާންސްގެ ލިލްގައި ކެރިއަރު ފެށުމަށް ފަހު ހަޒާޑް ޗެލްސީއާ ގުޅުނީ 2012 ވަނަ އަހަރެވެ. ޗެލްސީ އަށް ކުޅުނު 352 މެޗުގައި ހަޒާޑް ވަނީ 110 ލަނޑު ޖަހައިފަ އެވެ.
މިދިޔަ އަހަރު ގަތަރުގައި އޮތް ފީފާ ވޯލްޑް ކަޕްގެ ގުރޫޕް ސްޓޭޖުން ބެލްޖިއަމް ކެޓުމުން، ހަޒާޑް ވަނީ ގައުމީ ޓީމަށް ކުޅުން ހުއްޓާލައިފަ އެވެ. ބެލްޖިއަމް ގޮވައިގެން ހަޒާޑް އެންމެ މޮޅަށް ކުޅުނު އެއް މުބާރާތަކީ 2018 ވަނަ އަހަރުގެ ފީފާ ވޯލްޑް ކަޕް އެވެ.
