ޕެރިސް (އޮކްޓޯބަރު 30) - އާޖެންޓީނާގެ ކެޕްޓަން ލިއޮނަލް މެސީއަށް މިފަހަރު ބެލޮންޑިއޯ އެވޯޑު ނުލިބުމަކީ ލޮޖިކަލީވެސް ގަބޫލުނުކުރެވޭ ކަމެއްކަމަށް އެޑެން ހަޒާޑް ބުނެފި އެވެ.
ދުނިޔޭގެ އެންމެ މޮޅު ކުޅުންތެރިޔާއަށްދޭ ބެލޮންޑިއޯ އެވޯޑު ދިނުމުގެ ހަފްލާ އޮންނާނީ ފްރާންސްގެ ވެރިރަށް ޕެރިހުގައި މިރޭ އެވެ. މިފަހަރުގެ އެވޯޑަށް ވާދަކުރަނީ އާޖެންޓީނާގެ ލިއޮނަލް މެސީ އާއި ނޯވޭގެ އާލިން ހާލަންޑް އަދި ފްރާންސްގެ ކިލިއަން އެމްބާޕޭ އެވެ.
ބެލޮންޑިއޯ މިފަހަރު ހޯދާނެ ކުޅުންތެރިއަކާ ގުޅޭ ބަހުސް ގަދަވެފައިވާއިރު، މިފަހަރު މި އެވޯޑު ހޯދުން ގާތްކަމަށް ގިނަ ބަޔަކު ބުނަނީ މެސީ އެވެ. މިކަމަށް ބެލްޖިއަމްގެ ކުރީގެ ތަރި އެޑެން ހަޒާޑްވެސް އެއްބަސްވެ އެވެ.
ދާދި ފަހުން ފުޓްބޯޅަ ކުޅުން ހުއްޓާލި އެޑެން ހަޒާޑް ބުނީ މެސީ އަކީ ދުނިޔޭގައި އުފެދުނު އެންމެ މޮޅު ކުޅުންތެރިޔާ ކަމަށާއި، އޭނާގެ ކާމިޔާބު ކެރިއަރުގައި ވޯލްޑްކަޕް ހޯދި ފަހަރު އެވޯޑު ނުލިބުމަކީ ލޮޖިކަލީ ގަބޫލުނުކުރެވޭނެ ކަމެއް ކަމަށެވެ.
"ދުނިޔޭގައި އުފެދުނު އެންމެ މޮޅު ކުޅުންތެރިޔާ ވޯލްޑް ކަޕް ހޯދި އަހަރު އޭނާއަށް ބެލޮންޑިއޯ ނުލިބުމަކީ ގަބޫލުކުރަން އުނދަގޫކަމެއް" ހަޒާޑް ބުންޏެވެ.
ވޯލްޑްކަޕްގެ ފައިނަލުގައި ފްރާންސް މޮޅުވިނަމަ މަންޒަރު އެއްކޮށް ބަދަލުވީސް ކަމަށާއި، އޭރުން މިފަހަރު ބެލޮންޑޯ އެމްބާޕޭއަށް ލިބެން ޖެހޭނެކަމަށްވެސް ހަޒާޑު ބުންޏެވެ.
މެސީ އާޖެންޓީނާ އާއެކު ވޯލްޑްކަޕް ހޯދިއިރު، ކުލަބު ލެވެލްގައި ފްރާންސްގެ ލީގު ޕީއެސްޖީއާއެކު ހޯދި އެވެ. ހާލަންޑް ވަނީ އޭނާގެ ކުލަބު މެންޗެސްޓާ ސިޓީއާއިއެކު ޔުއެފާ ޗެމްޕިއަންސް ލީގު، އިނގިރޭސި ޕްރިމިއާ ލީގު އަދި އިނގިރޭސި ލީގު ކަޕް ހޯދާފަ އެވެ. އެމްބާޕޭއަށް މިދިޔަ އަހަރު ލިބުނު ހަމައެކަނި ތައްޓަކީ ފްރާންސް ލީގެވެ.
