މެޑްރިޑް (ޖުލައި 30) - ކުޅޭނެ ކުލަބެއް ނުލިބުމުގެ ސަބަބުން ބެލްޖިއަމްގެ ކުރީގެ ކެޕްޓަން އެޑެން ހަޒާޑް ކުޅުން ހުއްޓާލަން ވިސްނަން ފަށައިފި އެވެ.
ހަޒާޑް, 32, ކުލަބެއް ނެތި ހުންނަން ޖެހިފައި މިވަނީ ސްޕެއިންގެ ރެއާލް މެޑްރިޑާ އެކު ހަދާފައިވާ އެއްބަސްވުން މި ސީޒަނަށްފަހު އުވާލަން ނިންމުމުންނެވެ. މިދިޔަ ސީޒަންގެ ނިޔަލަށް އެކުލަބުގެ ކޮންޓްރެކްޓްގައި ކުރިން ހުރި ހަޒާޑް ކޮންޓްރެކްޓް އުވާލަން ނިންމީ ހިލޭ ޓްރާންސްފާއެއްގައި އެހެން ކުލަބަކަށް ބަދަލުވުމުގެ ބޭނުމުގަ އެވެ.
ނަމަވެސް 2019 ގައި ޗެލްސީ ދޫކޮށް ރެއާލް އަށް ބަދަލުވި ފަހުން ފޯމު ދަށްވެ ޓީމުން ބާކީވެފައި އިންނަން ޖެހި ހަޒާޑުގެ މަގުބޫލުކަންވަނީ ގެއްލިފަ އެވެ. ރެއާލް އަށް ބަދަލުވި ފަހުން ހަޒާޑްގެ ބަރުދަން އިތުރުވެ އޭނާގެ ފިޓްނަސް ދަށްވެ ޓީމުން ފުރުސަތު ލިބޭ މިންވަރު މަދުވި އެވެ. އަދި އޭގެ ފަހުން އަނިޔާގެ މައްސަލަތަކާ ހުރެވެސް ގިނަ މެޗުތަކުގައި ނުކުޅެވުނެވެ.
އާ ސީޒަނުގައި އެހެން ޓީމަކަށް ކުޅުމަށް އުއްމީދުކޮށްގެން ހަޒާޑް މެޑްރިޑާއިއެކު ހަދާފައިވާ އެެއްބަސްވުން އުވާލަން ނިންމީ އެވެ. ހީކުރި ގޮތާ ހިލާފަށް އޭނާ އަށް ޔޫރަޕްގެ އެއްވެސް ކުލަބަކުން ހުށަހެޅުމެއް ނުލިބެ އެވެ.
ބެލްޖިއަމްގެ ގައުމީ ޓީމަށް ވެސް ކުޅުން ހުއްޓާލައިފައިވާ ހަޒާޑް ހޯދަން މަސައްކަތްކުރީ ހަމައެކަނި އެމެރިކާ ލީގުގެ އިންޓަ މިއާމީ އިންނެވެ. ނަމަވެސް ދުނިޔޭގެ އެންމެ މޮޅު ކުޅުންތެރިޔާ ލިއޮނަލް މެސީ ކުޅޭ ޓީމަށް ސޮއިކުރަން އޭނާ ބޭނުމެއް ނުވެ އެވެ. ހަޒާޑް ބޭނުމީ ޔޫރަޕްގައި މަޑުކުރާށެވެ.
މީޑިއާ ރިޕޯޓްތައް ބުނާ ގޮތުން ޔޫރަޕްގެ އެއްވެސް ކުލަބަކުން ހަޒާޑަށް ހުށަހެޅުމެއް ނުލިބުމުން މިހާރު ހަޒާޑްގެ ވިސްނުމަކީ ރިޓަޔާކުރުމެވެ.
ދުނިޔޭގެ އެންމެ މަގުބޫލު ފުޓްބޯޅަ ކުޅުންތެރިންގެ ލިސްޓުގައި ކުރިން ހިމެނޭ ހަޒާޑް ބޭނުންވަނީ ޔޫރަޕްގެ ބޮޑު ލީގެއްގައި ކުޅުމެވެ. ނަމަވެސް މިހާތަނަށް ހަޒާޑްގެ އުފަން ގައުމު ބެލްޖިއަމްގެ ކުލަބަކުން ވެސް އޭނާ އަށް ކުޅެން ހުށަހެޅުމެއް ނުލިބެ އެވެ.
ޗެލްސީގެ އެންމެ ކާމިޔާބު ކުޅުންތެރިންގެ ތެރޭގައި ހިމެނޭ ހަޒާޑަކީ 2018ގެ ވޯލްޑް ކަޕްގެ ތިން ވަނަ ހޯދި ބެލްޖިއަމް ޓީމްގެ އެންމެ މުހިންމު ކުޅުންތެރިޔާ އެވެ. އޭނާ ވަނީ އެ މުބާރާތުގެ ދެ ވަނަ އަށް އެންމެ މޮޅު ކުޅުންތެރިޔާ ނުވަތަ ސިލްވާ ބޯލް އެވޯޑުވެސް ހޯދާފަ އެވެ.
