ފަލަސްތީނުގެ ބިންތަކަށް ވެރިވެގަނެފައިވާ އިޒްރޭލާ ދެކޮޅަށް އެ ގައުމުން އިއްޔެ ދޭން ފެށި ހަމަލާތަކަށް ކުރީގެ ރައީސް މައުމޫން އަބްދުލްގައްޔޫމު ސާބަސް ވިދާޅުވެއްޖެ އެވެ.
މިއަދު 'އެކްސް' ގައި ކުރެއްވި ޕޯސްޓެއްގައި މައުމޫން ވިދާޅުވީ ފަލަސްތީނުގެ ރައްޔިތުން މަސައްކަތް ކުރަމުން އެ ގެންދަނީ އެ މީހުންގެ އަސާސީ ހައްގުތައް ހޯދުމަށް ކަމަށެވެ.
"ފަލަސްތީނުގެ ރައްޔިތުންގެ އަސާސީ ހައްގުތައް އަނބުރާ ހޯދުމަށްޓަކާ ފަލަސްތީނުގެ ހިތްވަރުގަދަ މުޖާހިދުން އިއްޔެ އޮކްޓޫބަރު 7، ގައި އާހިތްވަރަކާއެކު ފެށި ވަރުގަދަ ޖިހާދަށް އައްސަރިބަހާއި ސާބަސް ރައްދު ކުރަން،" މައުމޫން ލިޔުއްވާފައިވެ އެވެ.
މައުމޫނުގެ އިތުރުން ރައީސް އިބްރާހިމް މުހައްމަދު ސޯލިހު އަދި އިންތިހާބީ ރައީސް ޑރ. މުހައްމަދު މުއިއްޒުވެސް 'އެކްސް' ގައި ކުރެއްވި ޕޯސްޓުތަކެއްގައި ވަނީ ފަލަސްތީނާ އެކުގައި ދިވެހިން ތިބިކަން ކަށަވަރުކޮށްދެއްވާފަ އެވެ.
ރައީސް ސޯލިހު މިއަދު ކުރެއްވި ޕޯސްޓެއްގައި ވަނީ ދިފާއު ވެވޭނެ ގޮތެއް ނެތް ފަލަސްތީނުގެ އާންމު ރައްޔިތުންނާ ދެކޮޅަށް އިޒްރޭލުން ނުބައްދަލު ބާރުގެ ބޭނުން ކުރުން ކުށްވެރި ކުރައްވާފަ އެވެ. އަދި ސުލްހަ ޔަގީން ކުރެވޭނެ ހަމައެކަނި ގޮތަކީ ފަލަސްތީނާއި އިޒްރޭލަކީ ދެ ދައުލަތުގެ ގޮތުގައި ބަލައިގަތުން ކަމަށް ވެސް އެމަނިކުފާނު ވިދާޅުވި އެވެ.
އިންތިހާބީ ރައީސް މުއިއްޒު ލިޔުއްވި ޕޯސްޓުގައި ގޮވައިލެއްވީ 1967 ވަނަ އަހަރު އޮތް ސަރަހައްދީ ރޮނގާ ހަމައަށް އިޒްރޭލު ފަހަތަށް ޖެހުމާއެކު ފަލަސްތީނުގެ މިނިވަން ދައުލަތް ބަލައިގަތުމަށެވެ. އަދި އެ ދައުލަތުގެ ވެރިރަށަކީ އިރުމަތީ ގުދުސްކަމަށް ވާން ޖެހޭނެ ކަމަށް ވެސް އެމަނިކުފާނު ވިދާޅުވި އެވެ.
"އަދި [ފަލަސްތީނުގެ] ރެފިއުޖީން އެނބުރި އެމީހުންގެ ވަޒަނަށް ދިއުމުގެ ފުރުސަތު ވަގުތުން ދޭން ޖެހޭނެ،" ސޯޝަލް މީޑިއާގައި ލިއުއްވި ލިއުއްވުމުގައި މުއިއްޒު ވިދާޅުވި އެވެ.
ބައިނަލްއަގުވާމީ މީޑިއާތަކުން ރިޕޯޓްކޮށްފައިވާ ގޮތުގައި އިޒަރޭލުން ގާޒާއަށް ދިން ހަމަލާތަކުގައި ޝަހީދުވި މީހުންގެ އަދަދު މިހާރު ވަނީ 256 އަށް އަރައިފަ އެވެ.
ހަމާސް އިން ދިން ހަމަލާގައި އިޒްރޭލުގެ 300 އަށްވުރެ ގިނަ މީހުން މަރުވި ކަމަށް ވެސް މީޑިއާތަކުން ރިޕޯޓުކޮށްފައިވެ އެވެ.
އިޒްރޭލުން ބުނާ ގޮތުގައި ހަމާސްގެ އިތުރުން ފަލަސްތީނުގެ ހަނގުރާމަވެރި ޖަމާއަތެއް ކަމަށްވާ ހިޒްބުﷲ އިންވެސް މިހާރު ދަނީ ހިފާފައިވާ ބިންތަކަށް ހަމަލާދެމުންނެވެ.
ފުރަތަމަ ބޮޑުހަނގުރާމައިގަައި އިނގިރޭސިން ފަލަސްތީނު ހިފުމަށް ފަހު ވަޒަންވެރިވި ޔަހޫދީން 1948 ވަނަ އަހަރު އުފެއްދި ދައުލަތުގެ ސަރަހައްދު 1967 ވަނަ އަހަރާ ހަަމައަށް އޮތީ މިހާރަށް ވުރެ އެތައް ގުނައެއް ކުޑަކޮށެވެ. އދ. އިން އެ ދައުލަތް ބަލައިގަތީ އޭރު އޮތް ސަރަހައްދީ ރޮނގުގެ ތެރޭގަ އެވެ. އޭގެ ފަހުން 1967 ވަނަ އަހަރު ކުރި ހަ ދުވަހުގެ ހަނގުރާމައިގައި އިތުރު ބިންތައް ހިފައި، އޭގެ ފަހުން ވެސް އިޒްރޭލުން އަންނަނީ މެދު ނުކެނޑި ފަލަސްތީނުގެ ބިންތައް ހިފަމުންނެވެ.
