ފަލަސްތީނުގެ ހަމާސް ޖަމާއަތުގެ ހަނގުރާމަވެރިން އިޒްރޭލުގެ ބައެއް ސަރަހައްދުތަކަށް މިއަދު ދިން ހަމަލާތަކުގެ ބަދަލުހިފުމުގެ ނަމުގައި، ހިސާރުކޮށްފައިވާ ޣައްޒާގައި އާއްމުން ދިރިއުޅޭ އިމާރާތްތަކަށް އިޒްރޭލުން ބޮން އެޅުމުގެ ސަބަބުން 160 މީހުން ޝަހީދުވެ، 1،000 އަށް ވުރެ ގިނަ މީހުން ޒަހަމްވެއްޖެ އެވެ.
ފަލަސްތީނުގެ ސިއްހީ އޮފިޝަލުންނާ ހަވާލާދީ އަލްޖަޒީރާ ބުނީ މިހައިތަނަށް މަދުވެގެން 160 މީހުން ޝަހީދުވެފައިވާ ކަމަށާއި ޒަހަމްވި މީހުންގެ އަދަދު ހާހަކަށް ވުރެ މަތިވެފައިވާ ކަމަށެވެ. ޣައްޒާގެ އާއްމުން ދިރިއުޅޭ ތަންތަނަށް އިޒްރޭލުން މެދުނުކެނޑި ދެމުން ގެންދާ ހަމަލާތަކުގެ ތެރެއިން ހަމަލާއެއް ފަލަސްތީނުގެ ރެޑްކްރެސެންޓްގެ އެމްބިއުލާންސަކަށް އަމާޒުކުރި ކަމަށް ވެސް އެ އެޖެންސީން ބުންޏެވެ.
ފަލަސްތީނުގެ ނިއުސްއެޖެންސީއެއްގެ މުރާސިލަކާ ހަވަލާދީ އަލްޖަޒީރާ ބުނި ގޮތުގައި އިޒްރޭލުގެ މަތިންދާބޯޓަކުން ފޮނުވައިލި މިސައިލު ސީދާ އަމާޒުކުރީ އެމްބިއުލާންސަށެވެ. އެހަމަލާގައި ޒަހަމްވި މީހުންގެ ތެރޭގައި ރެޑްކްރެސެންޓްގެ ޕެރަމެޑިކުން ހިމެނެ އެވެ.
ހަމާސްގެ ހަމަލާތަކުގައި އިޒްރޭލުގެ 40 މީހުން މަރުވި
އިޒްރޭލުން ހިފާފައިވާ އިރުމަތީ ގުދުސްގައި ހުރި އަލްޖަޒީރާގެ މުރާސިލާ ހަވާލާދީ އެ އެޖެންސީން ބުނީ އިޒްރޭލުގެ ތެރެއަށް ވަދެ، ހަމާސްގެ ހަނގުރާމަވެރިން މިއަދު ދިން ހަމަލާތަކުގައި އިޒްރޭލުގެ 40 މީހަކު މަރުވިކަން އިޒްރޭލުން ސަރުކާރުން ވަނީ ކަށަވަރުކޮށްދީފަ އެވެ. އިޒްރޭލު ސަރުކާރުން ބުނެފައިވާ ގޮތުގައި އެ ހަމަލާތަކުގައި 750 މީހުން ޒަހަމް ވެސް ވި އެވެ.
ހަމާސްގެ ހަނގުރާމަވެރިން އިޒްރޭލުގެ ސަރަހައްދުގެ ތެރެއަށް ވަނީ މޮޓޮރައިޒްޑް ގްލައިޑް ފަދަ ވަސީލަތްތައް ބޭނުންކޮށްގެންނެވެ. އެގޮތަށް ވަންނަ މަންޒަރު ފެންނަ ވީޑިއޯތައް ސޯޝަލް މީޑިއާގައި އާއްމުކޮށްފައި އެބަހުއްޓެވެ.
ހަމާސް އިން މިއަދު ބުނި ގޮތުގައި އިޒްރޭލަށް އެމީހުން ހަމަލާ ދިނީ މަސްޖިދުލް އަޤުސާގައި އިޒްރޭލުން ހިންގި ޖަރީމާތަކާއި ހިފާފައިވާ ހުޅަނގު އައްސޭރީގައި ފަލަސްތީނު މީހުންނަށް ދިން ހަމަލާތަކުގެ ބަދަލުހިފުމުގެ ގޮތުންނެވެ.
ހަމާސްއިން ހަމަލާތައް ދިނުމާ އެކު އިޒްރޭލުން ވަނީ ހަނގުރާމަ އިއުލާނުކޮށްފަ އެވެ.
އިޒްރޭލަކީ ފަލަސްތީނުގެ ބިމުގައި 1948 ވަނަ އަހަރު އުފެއްދި ޔަހޫދީ ދައުލަތެކެވެ. އެ ދައުލަތް އުފެއްދި އިރު އޮތް ސަރަހައްދަށް ވުރެ އެތައް ގުނައެއް އިތުރަށް ހިފީ އޭގެ ފަހުން ކުރި ހަނގުރާމަތަކުގަ އެވެ. މަސްޖިދުލް އަގުސާ އެ ތަނެއްގައިވާ އިރުމަތީ ގުދުސަކީ ވެސް އިޒްރޭލު އުފެއްދި ފަހުން ހިފި ސަރަހައްދެކެވެ.
