މި މަހުގެ 30 ވަނަ ދުވަހު އޮންނަ ރިޔާސީ އިންތިހާބުގެ ދެވަނަ ބުރުގައި ރާއްޖެއިން ބޭރުގައި ވޯޓުލާން، އިންތިހާބުގެ ފުރަތަމަ ބުރާ އަޅާބަލާއިރު ގާތްގަނޑަކަށް ދެ ގުނަ އިތުރަށް މީހުން ރަޖިސްޓްރީކޮށްފި އެވެ.
ރިޔާސީ އިންތިހާބުގެ ދެވަނަ ބުރުގައި އެހެން ތަންތަނުގައި ވޯޓުލާ މީހުންގެ ރީ-ރަޖިސްޓްރޭޝަން މަސައްކަތް ނިންމައި ވޯޓާސް ލިސްޓަށް ޝަކުވާ ހުށަހަޅަން އިލެކްޝަން ކޮމިޝަން (އީސީ)އިން ދިން 48 ގަޑިއިރުގެ މުއްދަތު ހަމަވީ މިދިޔަ ހޮނިހިރު ދުވަހު އެވެ.
އިލެކްޝަންސް ކޮމިޝަނުގެ ނައިބު ރައީސް އިސްމާއިލް ހަބީބު ކުރެއްވި ޓްވީޓެއްގައި ވިދާޅުވީ، އިންތިހާބުގެ ފުރަތަމަ ބުރުގައި، ރާއްޖޭން ބޭރުގައި ވޯޓުލާން 3327 މީހުން ރަޖިސްޓްރީކުރި އިރު ދެވަނަބުރުގައި، ރާއްޖޭން ބޭރުގައި ވޯޓުލާން ރަޖިސްޓަރީ ކޮށްފައިވަނީ 6223 މީހުން ކަމަށެވެ.
ވޯޓު ފޮށި ބަހައްޓާ ގައުމުތަކާއި ކޮންމެ ގައުމަކަށް ދެ ބުރުގައި ރަޖިސްޓްރީވި މީހުންގެ ހިސާބުތައް އޭނާ ހިއްސާކުރެއްވި އެވެ. އެ ހިސާބުތަކުން އެނގޭ ގޮތުގައި ރާއްޖެއިން ބޭރުގައި ބަަހައްޓާ ހުރިހާ ފޮއްޓަކަށް ވެސް ރަޖިސްޓްރީވި މީހުންގެ އަދަދު ވަނީ އިތުރުވެފަ އެވެ.
ރިޔާސީ އިންތިހާބުގެ ފުރަތަމަ ބުރުގައި ވޯޓުލުމުގެ ހައްގު ލިބިގެންވާ ގާތްގަނޑަކަށް 60،000 މީހުން ވޯޓުލާފައި ނުވެ އެވެ. އެހެންވެ، ދެވަނަ ބުރުގައި ވާދަ ކުރާ ޕީޕީއެމް/ޕީއެންސީ އަދި އެމްޑީޕީން ވެސް ވޯޓުނުލާ މީހުންގެ ރަޖިސްޓްރޭޝަން ހަމަޖެއްސުމުގެ މަސައްކަތް ކޮށްފައިވެ އެވެ.
ގިނަ އަދަދެއްގެ ބަޔަކު ދެވަނަ ބުރުގައި ވޯޓުލާން ރީ-ރަޖިސްޓްރީވާން ފޯމު ހުށަހެޅުމުން، އޮޅުވާލުންތަކެއް އުޅޭ ކަމަށް ބުނެ އިދިކޮޅު ޕީޕީއެމް/ޕީއެންސީ އާއި އެ ޕާޓީއާ ގުޅިފައިވާ އެމްއެންޕީ އިން ވަނީ ކަންބޮޑުވުން ފާޅުކޮށްފަ އެވެ.
ނަމަވެސް އެފަދަ ކަމެއް ނުހިނގާ ކަމުގެ ޔަގީންކަންދީ އެ އީސީން ވަނީ ކޮންމެ މީހަކު ވެސް ސައްހަ ތަނުގައި ރަޖިސްޓްރީވެފައިވޭތޯ އަމިއްލައަށް ބަލައި ޝަކުވާ ހުށަހެޅުމަށް އޮންނަ މުއްދަތުގައި ހުށަހެޅުމަށް އެދިފަ އެވެ.
