މި އަހަރަށް ދައުލަތުން ކަނޑައަޅާ ބަޖެޓުގެ މަސައްތަކުގެ ތެރެއިން އިލެކްޝަންސް ކޮމިޝަނު (އީސީ) އިން މިދިޔަ އަހަރު ރައްޔިތުންގެ މަޖިލީހުގެ މާލިއްޔަތު ކޮމިޓީއާ އެކު ބޭއްވި ބައްދަލުވުމުގައި ރައްޔިތުންގެ ފެންނަ ނުފެންނަ އާންމު ވޯޓެއް ނަގަން ޖެހިއްޖެ ހާލަތަކަށް އެ އިންތިހާބަށް ބަޖެޓަށް އެދުމުން މަޖިލީހުން އެއްބާރުލުން ދީފައިނުވާ ކަމަށް އީސީއިން ބުނެފި އެވެ.
މި މަހުގެ 30 ގައި ބާއްވާ ރިޔާސީ އިންތިހާބުގެ ދެވަނަ ބުރާ ގުޅޭގޮތުން މައުލޫމާތު ދިނުމަށް މިއަދު އީސީއިން ބޭއްވި ނޫސްވެރިންގެ ބައްދަލުވުމެއްގައި ހަބީބު ވިދާޅުވީ، އެ ބައްދަލުވުމުގައި އާންމު ވޯޓުތަކަކަކީ އީސީގެ ގާނޫނީ ޒިންމާގެ ތެރޭގައި ހިމެނޭ ކަމެއް ކަން ފާހަގަކުރެއްވި ކަމަށެވެ.
ހަބީބު މިހެން ވިދާޅުވެފައި މިވަނީ އަންނަ މަހުގެ 30 ގެ ކުރިން ރާއްޖޭގެ ވެރިކަން ކުރުމުގެ ނިޒާމާ ގުޅޭ ގޮތުން ރައްޔިތުންގެ ފެންނަ ނުފެންނަ ވޯޓެއް ނެގުމަށް މަޖިލީހުން ފާސްކޮށް އީސީގައި އެދިފައިވާ ދަނޑިވަޅެއްގަ އެވެ. އެ އިންތިހާބަށް ބޭނުންވާ ބަޖެޓު އަދި ހަމަޖެހިފައެއް ނުވެ އެވެ.
"އަޅުގަނޑުމެން ބުނިން ކޮމިޝަނުގެ ގާނޫނީ ޒިންމާގެ ދަށުގައި އެބަ ހިމެނެއޭ، ރައްޔިތުންގެ ހިޔާލު ހޯދުމުގެ އާންމު ވޯޓެއް އައިސިއްޔާ އެކަމާ ގުޅޭގޮތުން ހޭލުންތެރިކުރުވުން، އަޅުގަނޑުމެން އެވާހަކަ ދެއްކީމަވެސް އޭތި ކުރިއަށްދާ ގޮތެއް ނުވި އެކަމަށް ސަޕޯޓެއް ނެތް" ހަބީބް ވިދާޅުވި އެވެ.
ވޯޓުލާން އަންގަނީ އަދި ބަޖެޓު ފާސްކުރަނީވެސް މަޖިލީހުން ކަމަށާއި މަޖިލީހުން އެކަމަށް އޭރު އެއްބާރުލުން ނުދިނުމުން އިތުރަށް އެކަމަށް އީސީއިން މަސައްކަތް ނުކުރާ ކަމަށް ވެސް އޭނާ ވިދާޅުވި އެވެ.
އެހެން ނަމަވެސް އޭނާ ވިދާޅުވީ ނިޒާމީ ވޯޓުގެ ގަރާރަށް ޖަވާބުދީ މަޖިލީހަށް ފޮނުވި ސިޓީގައި ވޯޓާމެދު ރައްޔިތުން ހޭލުންތެރިކަން ކުރުވަން ޖެހޭނެކަން އަންގާފައިވާނެ ކަމަށެވެ. އަދި ކުރިއަށް އޮތް 30 ދުވަހަކީ، ބަޖެޓު ލިބިއްޖެ ނަމަ ނުކުރެވޭނެ ކަމެއް ނޫންކަމަށް ބެސް އޭނާ ވިދާޅުވި އެވެ.
ނިޒާމީ ވޯޓާ ގުޅޭގޮތުން އީސީއިން މިހާރު ވަނީ ގާނޫނީ ލަފާ ހޯދުމަށްފަހު މަޖިލީހުން އެދުނު ގޮތަށް ވޯޓު ނެގުމުގެ ކުރިން ޖަވާބު ބޭނުންވާ ކަންކަމަށަށް މަޖިލީހުގައި އެދިފަ އެވެ.
ޑިމޮކްރެޓްސްގެ ރިޔާސީ ކެންޑިޑޭޓު އަދި ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބު ހުށަހެޅުއްވި ގަރާރު ދިރާސާކޮށް މުޅި މަޖިލީހުގެ ކޮމިޓީން އެކުލަވާލި ރިޕޯޓް ފާސްކުރީ 35 މެންބަރުންގެ ވޯޓުންނެވެ. ގަރާރު ފާސްކުރަން ނުފެންނަ ކަމަށް އެއްވެސް މެންބަރަކު ވޯޓެއް ނުދެއްވަ އެވެ. އެ ގަރާރު ފާސްކުރީ ރައްޔިތުންގެ ހިޔާލު ހޯދުމުގެ އާންމު ވޯޓު ނެގުމަށް ގާނޫނު އަސާސީގެ 70 ވަނަ މާއްދާއިން މަޖިލީހަށް ލިބިދޭ ބާރުގެ ދަށުންނެވެ.
މީގެ ކުރިން 2007 ގައި ބޭއްވި ފެންނަ ނުފެންނަ ވޯޓުގައި ވެސް ނަޝީދާއި އޭރު އެމަނިކުފާނު ލީޑުކުރައްވަމުން ގެންދެވި އެމްޑީޕީން ވެސް ތާއީދުކުރީ ބަރުލަމާނީ ނިޒާމަކަށެވެ. އަދި ނަޝީދުގެ ވެރިކަމުގައި ވެސް ނިޒާމު ބަދަލު ކުރުމަށް ތާއީދުކުރައްވައި ވާހަކަ ދައްކަވާފައި ވެ އެވެ.
ވެރިކަމުގެ ނިޒާމުގެ ބަދަލުތަކުގެ ވާހަކަ 2018 ގެ ރިޔާސީ އިންތިހާބާ ދިމާކޮށް ވެސް އެމްޑީޕީން ހުށަހެޅި އެވެ. ނަމަވެސް ކޯލިޝަންގެ ބައިވެރިންގެ ތެރޭގައި އެކަމުގެ ހިޔާލު ތަފާތުވުން ހުރުމުން ކޯލިޝަންގެ މެނިފެސްޓޯގައި އެ ކަން ހިމަނާފައެއް ނުވެ އެވެ.
