މެޑްރިޑް (ސެޕްޓެމްބަރު 17) - ރެއާލް މެޑްރިޑްގެ އިނގިރޭސި މިޑްފިލްޑަރު، ޖޫޑް ބެލިންހަމް އަކީ މިހާރު ވެސް ދުނިޔޭގެ ތަރިއެއް ކަމަށް ބުނެ، އޭނާ އަށް އެ ޓީމުގެ ކުރީގެ ކުޅުންތެރިޔާ ލުއިސް ފީގޯ ތައުރީފްކޮށްފި އެވެ.
ބެލިންހަމް، 20، ރެއާލަށް ބަދަލުވީ ޖަރުމަންގެ ބޮރޫޝިއާ ޑޯޓްމުންޑުން 89 މިލިއަން ޕައުންޑްގެ ފީއަކަށެވެ. ރެއާލާ އެކު ކުޅޭ ފުރަތަމަ ސީޒަންގައި ވެސް ބެލިންހަމް އަންނަނީ ތަފާތު ދައްކަމުންނެވެ. އެ ގޮތުން މިހާތަނަށް އެ ޓީމަށް ކުޅުނު ހަތަރު މެޗުގައި އޭނާ ވަނީ ފަސް ގޯލު ޖަހައިފަ އެވެ.
ކުރިން ބާމިންހަމް އަށް ކުޅުނު ބެލިންހަމް އަށް ރެއާލްގެ ގިނަ ކުޅުންތެރިންނާއި ކޯޗުގެ ތައުރީފް ލިބެމުން އަންނައިރު، އެ ޓިމްގެ ކުރީގެ ލެޖެންޑް، ފީގޯ ވެސް ވަނީ ބެލިންހަމްގެ މޮޅު ކުޅުން ފާހަގަކޮށްފަ އެވެ.
ފީގޯ ބުނީ ބެލިންހަމް އަކީ މިހާރު ވެސް ދުނިޔޭގެ ފުޓްބޯޅައިގެ ވަރުގަދަ ތަރިއެއް ކަމަށާއި، ޒުވާން އުމުރުގައި ވެސް އޭނާގެ ފަރާތުން ފެންނަ ކަންތައްތަކަށް ބަލާއިރު ފެންނަނީ މޮޅު ކުޅުންތެރިއެއްގެ ސިފަތައް ކަމަށެވެ.
މާ ބޮޑު އުނދަގޫކަމެއް ނެތި ރެއާލްގެ ސްޓައިލަށް ހޭނި ބެލިންހަމް ދައްކަމުން އަންނަ ކުޅުން ފާހަގަކުރަމުން ފީގޯ ބުނީ ދުނިޔޭގެ ފުޓްބޯޅައިގެ ބޮޑު ޓީމަކަށް އައިސް ރަނގަޅަށް ހޭނި މޮޅު ކުޅުމެއް ދެއްކޭނީ މަދު ކުޅުންތެރިންތަކަކަށް ކަމަށާއި، މި ކަމުން ވެސް ބެލިންހަމްގެ "ކޮލިޓީ" ސާބިތުވާ ކަމަށެވެ.
ރެއާލުން ލީގުގައި މިހާތަނަށް ކުޅުނު ހަތަރު މެޗުން ވެސް މޮޅުވުމުގައި ބެލިންހަމްގެ ދައުރު ބޮޑެވެ. އެ ގޮތުން ފަހު ދެ މެޗުން އެ ޓީމު މޮޅުވީވެސް މެޗުގެ ފަހުކޮޅު ބެލިންހަމް ޖެހި ގޯލުތަކުންނެވެ. އަނެއް ދެ މެޗުގައިވެސް އޭނާ ޖެހި ގޯލްތައް ފާހަގަކޮށްލެވެ އެވެ.
ބެލިންހަމްގެ މޮޅު ކުޅުމަށް މެޑްރިޑްގެ ވައިސް ކެޕްޓަން ޑެނީ ކާވަހާލް ވަނީ ދާދި ފަހުން ތައުރީފްކޮށްފަ އެވެ. އެ ގޮތުން، ތަޖުރިބާކާރު މިޑްފިލްޑަރުން ތިބި ޓީމަކަށް އައިސް ޖެހިލުމެއްނެތި އޭނާ ދައްކަމުން އަންނަ ހުނަރު ކާވަހާލް ވެސް ފާހަގަކުރެ އެވެ.
ރެއާލްގެ ކޯޗު ކާލޯ އޮންޗެލޮޓީ ބުނީ ބެލިންހަމްގެ ފަރާތުން މޮޅު ކުޅުންތެރިއެއްގެ ކިބައިގައި ހުންނަން ޖެހޭ ސިފަތައް ފެންނަކަމަށާއި، އޭނާއަކީ ދުނިޔޭގެ ފުޓްބޯޅައިގެ ވަރުގަދަ ނަމަކަށް ވާނެކަމުގެ ޔަގީންކަން އެބައޮތް ކަމަށެވެ.
ރެއާލާ އެކު ބެލިންހަމް ކުޅޭ ފަސް ވަނަ މެޗުގައި މިރޭ ނުކުންނާނީ ސޮސިއެޑާޑާ ދެކޮޅަށެވެ. އެ މެޗުން މޮޅުވެގެން އަލުން އެއް ވަނަ އަށް އެރޭނެ އެވެ.
