ފްރާންސްގައި އަބާޔާ ލައިގެން ސްކޫލަށް ދާ ކުދިން އަނބުރާ ގެޔަށް ފޮނުވަމުންދާ ކަމަށް އެ ގައުމުގެ ސަރުކާރުން ބުނެފި އެވެ.
ޗުއްޓީއަށް ފަހު ސްކޫލްތަކުގެ ކިޔެވުން ހޯމަ ދުވަހު ފެށިއިރު، ސަރުކާރުން ވަނީ މުސްލިމް އަންހެން ދަރިވަރުން އަބާޔާ ނުވަތަ ގަޔަށް ދޫ، ދިގު ހެދުން ލުން މަނާކޮށްފަ އެވެ.
އެހެން ނަމަވެސް އެ ނިންމުމާ މެދު އިހްތިޖާޖް ކުރުމުގެ ގޮތުން 300 އެއްހާ ކުދިން ހޯމަ ދުވަހު ސްކޫލަށް ދިޔައީ އަބާޔާ ލައިގެން ކަމަށް މިނިސްޓަރު ގެބްރިއެލް އަޓަލް ވިދާޅުވި އެވެ.
އޭގެ ތެރެއިން ގިނަ ކުދިން ސްކޫލްގައި އުޅޭ ވަގުތުގައި އަބާޔާ ނެގުމަށް އެއްބަސްވި ނަމަވެސް، އެކަމާ ދެކޮޅު ހެދި 67 ކުއްޖެއް ގެޔަށ ފޮނުވާލި އެވެ.
ތައުލީމީ ކަންކަމުން ދީން ވަކިކުރަން ނުވަތަ ސެކިއުލާވުމަށް ގެންގުޅޭ ސިޔާސަތު ކުރިއެރުވުމަށް ކަމަށް ބުނެ ފްރާންސް ސަރުކާރުން އަބާޔާ މަނާކުރި އިރު، އޭގެ ކުރިން ބުރުގާ ވެސް މަނާކުރި އެވެ.
ފްރާންސްގެ މުސްލިމުން ތަމްސީލް ކުރާ ޖަމިއްޔާއަކުން ވަނީ ސަރުކާރުގެ ނިންމުމާ ދެކޮޅަށް އެންމެ މަތީ ކޯޓަށް މައްސަލައެއް ހުށަހަޅައިފަ އެވެ.
