މ. އަތޮޅުގެ ތިން މަޝްރޫއެއް ޖުމުލަ 281.8 މިލިއަން ރުފިޔާ އަށް އެމްޓީސީސީ އާއި އާރުޑީސީއާ މިއަދު ހަވާލުކޮށްފި އެވެ.
ސަރުކާރުގެ ބަޖެޓުން ހަރަދުކޮށްގެން ހިންގާ މި މަޝްރޫއުތައް ހަވާލުކުރީ ޕްލޭނިން މިނިސްޓްރީގައި ބޭއްވި ރަސްމިއްޔާތުގަ އެވެ.
މުލި-ނާލާފުށި ކޯޒްވޭ މަޝްރޫޢުގެ މަސައްކަތް ހަވާލުކުރީ 125.5 މިލިއަން ރުފިޔާ އަށް އެމްޓީސީސީ އާއެވެ. ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދުގެ ތެރޭގައި ހިމެނޭ މި މަޝްރޫއުގެ މަސައްކަތް ހަވާލުކުރީ 600 ދުވަސްތެރޭގައި ނިންމުމަށެވެ.
މުލަކު ބަނދަރު ބޮޑު ކުރުމާއި ނެރުފައި ކަށި ހެދުމުގެ މަސައްކަތް އެއް އަހަރާއި ތިން މަސްދުވަހާއި 28 ދުވަހުގެ ތެރޭގައި ނިންމަން ޖެހޭނެ އެވެ. އެމްޓީސީސީއާ ހަވާލުކުރި އެ މަސައްކަތުގެ އަގަކީ 62.6 މިލިއަން ރުފިޔާ އެވެ.
ކޮޅުފުށީގެ މަގުތަކުގައި ތާރު އެޅުމުގެ މަސައްކަތް 93.7 މިލިއަން ރުފިޔާއާ އާރުޑީސީއާ ހަވާލު ކުރީ ދެ އަހަރު ދުވަހުގެ ތެރޭގައި ނިންމާށެވެ.
