ބ. ތުޅާދޫ އެއާޕޯޓު އެޅުމަށް ބިން ހިއްކުމުގެ އަމަލީ މަސައްކަތް މިއަދު ފަށައިފި އެވެ.
ސަރުކާރުން އެ މަޝްރޫއު ކުރިއަށްގެންދަނީ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ)އާ ހަވާލުކޮށްގެންނެވެ. އެކުންފުންޏާއި މި މަޝްރޫއު ހަވާލުކުރީ މިދިޔަ ޖުލައި މަހުގެ 12 ވަނަ ދުވަހުއެވެ.
ތުޅާދޫ އެއާޕޯޓަށް ބޭނުންވާ ބިން ހިއްކަން މިއަދު ފަށާފައިވާއިރު ޕްލޭނިން މިނިސްޓްރީން ބުނީ ތުޅާދޫގައި އެއާޕޯޓު އެޅުމަށް 44.70 ހެކްޓަރުގެ ބިން ހިއްކާނެ ކަމަށެވެ. ނަމަވެސް އެ މަސައްކަތް ނިމޭނެ ތާރީހެއް ނުބެނެ އެވެ.
ތުޅާދޫގެ އިތުރުން ށ. ބިލަތްފައްސާއި ތ. ވިލުފުށީގެ އެއާޕޯޓަށް ބޭނުންވާ ބިން ހިއްކުމުގެ މަސައްކަތްވެސް ހަވާލުކޮށްފައި ވަނީ ސީއެމްސީ އާއެވެ. މި ތިން މަޝްރޫއު އެ ކުންފުންޏާ ހަވާލުކުރީ 42.4 މިލިއަން ޑޮލަރު (653 މިލިއަން ރުފިޔާ)ގެ އަގަކަށެވެ.
ތުޅާދޫގައި އެއާޕޯޓެއް އެޅުމަކީ މިދިޔަ ރިޔާސީ އިންތިހާބުގައި ރައީސް ސޯލިހު ވެވަޑައިގެންނެވި ވައުދުފުޅެކެވެ.
