އިންޑިއާގެ ވިސްތާރާ އެއާލައިންސް އިން ރާއްޖެ އާއި އެގައުމުގެ ވެރިރަށް ނިއުދިއްލާއާ ދެމެދު ސީދާ ދަތުރުތައް ފަށަން ނިންމައިފި އެވެ.
އިންޑިއާގެ ޓާޓާ ކުންފުންޏާއި ސިންގަޕޯ އެއާލައިންގެ ޖޮއިންޓްވެންޗާއަކުން އުފައްދާފައިވާ ވިސްތާރާ އެއާލައިން އިން މިހާރު ވެސް އަންނަނީ އިންޑިއާގެ މުމްބާއީ އާއި ރާއްޖެއާ ދެމެދު ސީދާ ދަތުރުތައް ބާއްވަމުންނެވެ.
އަދި އެ އެއާލައިންގެ ބައިނަލްއަގުވާމީ ނެޓްވޯކަށް އާ ރޫޓެއް އިތުރުކުރުމުގެ ގޮތުން ދިއްލީ އިން ރާއްޖެއަށް ދަތަރުފަށަން ތައްޔާރުވަމުންދާ ކަން މިއަދު ވަނީ އިއުލާނުކޮށްފަ އެވެ.
ވިސްތާރާއިން ނެރުނު ނޫސް ބަޔާނުގައި ބުނެފައިވާގޮތުން ދިއްލީ އާއި ރާއްޖެއާ ދެމެދު ދަތުރުތައް ފަށާނީ އޮކްޓޫބަރު މަހުން ފެށިގެންނެވެ. އަދި މި ދަތުރުތަކުގައި އޭ320ނިއޯ މަތިންދާބޯޓު އޮޕަރޭޓް ކުރާއިރު، އެ މަތިންދާބޯޓުގައި އިކޮނޮމީ، ޕްރިމިއަމް އަދި އަދި ބިޒްނަޒް ކުލާހުގެ ކޮންފިގްރޭޝަން ހުރެ އެވެ.
އޭގެ ތެރެއިން އިކޮނޮމިކް ކުލާހުގެ ދެކޮޅު ޓިކެޓުގެ އަގުތައް ފެށޭނީ 5,036ރ (26،999ރުޕީސް) އިންނެވެ. އަދި ޕްރިމިއަމް ކުލާހުގެ ދެކޮޅު ޓިކެޓުގެ އަގު 6,529ރ (34،999ރުޕީސް) އިން ފެށޭއިރު ބިޒްނަސް ކްލާހުގެ ދެކޮޅު ޓިކެޓުގެ އަގުތައް ފެށޭނީ 15,484ރ (82،999ރުޕީސް) އިންނެވެ.
ވިސްތާރާގެ ޗީފް އެގްޒެކެޓިވް އޮފިސަރު ވިނޯދް ކަންނަން ވިދާޅުވީ ދިއްލީން ރާއްޖެއަށް ދަތުރުތައް ފެށުމުން އެގައުމުގެ ފަތުރުވެރިން ރާއްޖެ އަންނަ ނަންބަރުތައް އިތުރުވާނެ ކަމަށެވެ. އަދި މި ދަތުރުތަކުގެ ސަބަބުން ދެގައުމުގެ ގުޅުން އިތުރަށް ހަރުދަނާވާނެ ކަމަށް ގަބޫލުކުރާ ކަމަށް ވިދާޅުވި އެވެ.
އިންޑިއާއަކީ މި އަހަރުގެ މިހާތަނަށް ރާއްޖެއަށް ދެވަނަ އަށް އެންމެ ގިނަ ޓޫރިސްޓުން އަންނަމުންދާ ގައުމެވެ. އެގޮތުން މި އަހަރުގެ މިހާތަނަށް އިންޑިއާ އިން 131،926 ޓޫރިސްޓުން ރާއްޖެ އައިސްފައިވެ އެވެ.
