ދިރިއުޅުމަށް ދޫކުރާ ބަންޑާރަ ގޯތީގެ ރަޖިސްޓްރީ ސަރުކާރުން ކަނޑައަޅާ އިދާރާއަކަށް ދެވޭ ގޮތަށް އިސްލާހު ގެނެސް ގަވާއިދު ރޭ ގެޒެޓުކޮށްފި އެވެ.
ބިންވެރިޔާ ސްކީމުގެ ދަށުން މާލޭގެ ރައްޔިތުންނަށް ހުޅުމާލެ، ގުޅީފަޅު އަދި ގިރާވަރުފަޅުން ބިން ދިނުމަށް ސަރުކާރުން ނިންމިއިރު، ގަވާއިދުގައި ކުރިން އޮތް ގޮތުން ދިރިއުޅުމަށް ދޫކުރާ ގޯތީގެ ރަޖިސްޓްރީ ދޭންޖެހޭނީ ކައުންސިލުންނެވެ.
"ބަންޑާރަ ގޯއްޗާއި އަމިއްލަ ގޯއްޗާއި އެފަދަ ގޯތީގައި ހަދާ އިމާރާތް ރަޖިސްޓަރީ ކުރުމާބެހޭ ގަވާއިދު" އަށް ރޭ ގެނައި ބަދަލުތަކުގެ ތެރޭގައި، ބޯހިޔާވަހިކަން ދިނުމަށް ހިންގާ ޕްރޮޖެކްޓެއްގެ ދަށުން ދޫކުރަންޖެހޭ ގޯތީގެ ރަޖިސްޓްރީ ސަރުކާރުން ކަނޑައަޅާ އިދާރާއަކަށް ދެވޭނެ ގޮތް ހެދުން ހިމެނެ އެވެ.
"[ގޯތީގެ ރަޖިސްޓްރީ ދޫކުރާ އިދާރާއަކީ] ސިޓީއެއްގައި ނަމަ، އެ ސިޓީއެއްގެ ސިޓީ ކައުންސިލުގައ،ި ނުވަތަ އެ ސިޓީއެއްގެ ބިންތަކުގެ ރަޖިސްޓަރީގެ ކަންކަން އެ އިރެއްގައި ބަލަހައްޓަމުން އަންނަ އިދާރާއެއްގައ،ި ނުވަތަ ސަރުކާރުން ވަކި ސަރަޙައްދެއް ތަރައްގީ ކުރުމަށް ކުރިޔަށްގެންދާ ގޯތި ދިނުމުގެ މަޝްރޫއުތަކުގެ ދަށުން ގޯތި ދޫކުރުމަށް ސަރުކާރުން ކަނޑައަޅާ އިދާރާއެއް،" ގަވާއިދަށް ގެނައި އިސްލާހުގައި ބުނެފައިވެ އެވެ.
އެފަދަ ޕްރޮޖެކްޓެއްގެ ދަށުން ރަޖިސްޓްރީ ދޫކުރާއިރު ލިޔުމުގައި ހިމަނަންޖެހޭ ބައެއް އަސާސީ ޝަރުތުތަކަށް ވެސް އިއްޔެ ވަނީ ބަދަލުގެނެސްފަ އެވެ. އަދި, ބޯހިޔާވަހިކަމުގެ އެފަދަ ޕްރޮޖެކްޓެއްގެ ދަށުން ގޯތި ދޫކުރާއިރު ގޯތީގެ ދާއިމީ ރަޖިސްޓްރީ އެމީހަކަށް ދޫކުރަންވާނެ ކަމަށް ވެސް އާ އިސްލާހުގައި ބަޔާންކޮށްފައިވެ އެވެ.
އާ އިސްލާހުގެ ދަށުން ގޯތި ދޫކުރާއިރު، ނުހިއްކާ ނުވަތަ އިން ނުކަނޑާ އޮތް ތަނަކުން ވެސް ގޯތި ދޫކުރެވިދާނެ އެވެ. އެފަދަ ތަނަކުން ގޯއްޗެއް ދުކުރާ ނަމަ އެކަން އަންގައިދޭ ލިޔުމެއް ސަރުކާރުން ދޫކުރަންޖެހެ އެވެ.
ގެދޮރުވެރިޔާ ސްކީމުން ހުޅުމާލޭން 1351 ގޯތި، ގުޅިފަޅުން 2219 އަދި ގިރާވަރު ފަޅު ހިއްކައިގެން 5433 ގޯތި ދިނުމަށް ވަނީ ނިންމައިފަ އެވެ. އެއީ ޖުމުލަ 9003 ގޯއްޗެވެ.
