ސައުންޑް އިކުއިޕްމެންޓް ފޯރުކޮށްދިން ކުންފުންޏަށް 752،000ރ. ދައްކަން ޕީއެސްއެމްގެ މައްޗަށް ހުކުމްކޮށްފި

ޕަބްލިކް ސާވިސް މީޑިއާ (ޕީއެސްއެމް) ހިންގާ އިމާރާތް: އެ ކުންފުންޏަށް ސައުންޑް އިކުއިޕްމެންޓް ދިން ކުންފުންޏަަކަށް 752،000ރ. ދެއްކުމަށް ސިވިލް ކޯޓުން ވަނީ ހުކުމްކޮށްފަައި

ޕަބްލިކް ސާވިސް މީޑިއާ (ޕީއެސްއެމް) ހިންގާ އިމާރާތް: އެ ކުންފުންޏަށް ސައުންޑް އިކުއިޕްމެންޓް ދިން ކުންފުންޏަަކަށް 752،000ރ. ދެއްކުމަށް ސިވިލް ކޯޓުން ވަނީ ހުކުމްކޮށްފަައި

ސައުންޑް އިކުއިޕްމެންޓްތަކެއް ސަޕްލައިކޮށްދިން އަމިއްލަ ކުންފުންޏަކަށް ޕީއެސްއެމްއިން ނުދައްކައި އޮތް 752،000ރ. އެއް މަސް ދުވަހުގެ ތެރޭގައި ދެއްކުމަށް މިދިޔަ ހޯމަ ދުވަހު ސިވިލް ކޯޓުން ހުކުމްކޮށްފި އެވެ.

އިންޑޯ އަދި އައުޓްޑޯ ޝޫޓިންތަކުގައި ސައުންޑް ހެދުމަށް ބޭނުންވާ އިކުއިޕްމެންޓް ހޯދުމަށް ޕީއެސްއެމްއިން މެއި 24، 2021 ގައި ހުޅުވާލި ބީލަން ކާމިޔާބު ކުރި ބްރިލިއަންޓް ކޮމްޕެނީ ޕްރައިވެޓް ލިމިޓެޑް ކިޔާ ކުންފުންޏަކުންނެވެ. އެ ކުންފުނިން ސަޕްލައިކޮށްދިން މުދަލަށް ޕީއެސްއެމްއިން ދައްކަން އެއްބަސްވީ 1،129،224ރ. އެވެ.

ޕީއެސްއެމްއިން އެއްބަސްވުން ހަދާފައި އޮތީ އެ ފައިސާ ތިން ޕޭމަންޓަކަށް ބަހާލައިގެން ދެއްކުމަށެވެ. އެކަމަކު، އޭގެ ތެރެއިން ދެ ޕޭމަންޓެއް ދައްކާފައިނުވާއިރު، ނުދައްކައިވާ ފައިސާގެ އަދަދަކީ 752،816ރ. އެވެ.

އެހެންވެ، ސެޕްޓެމްބަރު 20، 2022 ގައި ބްރިލިއަންޓް ކޮމްޕެނީން ސިވިލް ކޯޓުގައި ދައުވާ ކުރީ، އެ ފައިސާ ދެއްކުމަށް އެންގުމަށާއި އެ ފައިސާ ނުދައްކައި ލަސްކުރުމުގެ ސަބަބުން މާލީ ގޮތުން ލިބުނު ގެއްލުމުގެ ބަދަލެއްގެ ގޮތުގައި 450،000ރ. އާއި ގާނޫނީ ވަކީލަކު ހަމަޖައްސަން ހަރަދުވި 25،000ރ. ނަގައިދޭން އެދި އެވެ.

އެ މައްސަލައިގައި ކުރި ދައުވާއަށް ޖަވާބުދާރީވާން އޮތް މުއްދަތުގެ ތެރޭގައި ޕީއެސްއެމްގެ ފަރާތުން ސިވިލް ކޯޓުގައި ޖަވާބުދާރީވެފައި ނުވެ އެވެ.

އެހެންވެ، އެ ކޯޓުން މިދިޔަ ހޯމަ ދުވަހު އެ ކުންފުނީގެ ޣައިރުހާޒިރުގައި ގާޒީ އަލީ އަބްދުﷲ ހުކުމް ކުރީ ބްރިލިއަންޓް ކޮމްޕެނީއިން ސަޕްލައިކޮށްދިން ތަކެއްޗަށް ނުދައްކައިވާ 752،816ރ. އެއް މަސް ދުވަހުގެ ތެރޭގައި ސިވިލް ކޯޓަށް ދައްކައި ހަލާސްކުރުމަށެވެ.

ގެއްލުމުގެ ބަދަލެއްގެ ގޮތުގައި، 450،000ރ. ނަގައިދިނުމަށް އެދުނު ނަމަވެސް، އެ ގެއްލުން ލިބުނު ގޮތާއި އެ ގެއްލުން ސާބިތުކުރުމަށް އެއްވެސް ލިޔުމެއް ހުށަހަޅާފައި ނުވާތީ ކޯޓުން ނިންމީ އެ ފައިސާ ނަގައިދެވޭނެ ތަނެއް ނެތް ކަމަށެވެ. އަދި ވަކީލަށް ކުރި ހަރަދުގެ ލިޔުންތައް ވެސް ހުށަހަޅާފައިނުވާއިރު، އެ ފައިސާ ނަގައިދެވޭނެ ތަނެއް ނެތް ކަމަށް ވެސް ކޯޓުން ނިންމި އެވެ.

ޕީއެސްއެމް ބިލްޑިންގައި އެގްޒެކެޓިވް ބިއުރޯއެއް ހަދަން 2018 ވަނަ އަހަރު ކުރި މަސައްކަތުގެ އަގު ނުދީގެން އާޓިސަން ޕްރައިވެޓް ލިމިޓެޑް ކިޔާ ކުންފުންޏަކުން ދައުވާ ކުރި މައްސަލައިގައި ޕީއެސްއެމްއިން އެ ކުންފުންޏަށް ދައްކަން ހުކުމް ކުރި 4.5 މިލިއަން ރުފިޔާ ދެއްކެންދެން ޕީއެސްއެމްއިން މާލީ މުއާމަލާތްތައް މަޑުޖައްސާލަން ވެސް ސިވިލް ކޯޓުން މި މަހުގެ 17 ވަނަ ދުވަހު އަމުރުކޮށްފައިވެ އެވެ.

ކޮމެންޓް

ފަހުގެ ޚަބަރު

ވަޒީފާގެ ބިރުދައްކައިގެން އެއްލައްކަ މެންބަރުން ހަމަކޮށްފި

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އަރާފައިވާއިރު، މިއީ ވަޒީފާގެ ބިރުދައްކައިގެންނާއި ރިޝްވަތު ދީގެން ހޯދި އަދަދެއް ކަމަށް ވަނީ ތުހުމަތުކުރެވިފައި. އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި މިދިޔަ އަހަރާ އަޅާބަލާއިރު އެ ޕާޓީގެ މެންބަރުންގެ އަދަދު ވަނީ 26،000 އަށްވުރެ އިތުރުވެފައި.

ހިދުމަތުގެ އެންމެ މަތީ ޝަރަފު މުހައްމަދު ރަޝީދާއި އައްބާސަށް

ދައުލަތަށް ހިދުމަތް ކުރުމުގެ އެންމެ މަތީ ޝަރަފު، މުހައްމަދު ރަޝީދު އިބްރާހީމާއި އައްބާސް އިބްރާހީމަށް ވަނީ އަރުވާފައި. މުހައްމަދު ރަޝީދަށް މި ޝަރަފު އެރުވީ ދީނީ ރޮނގުން ކުރެއްވި ހިދުމަތްތަކަށް ކަމަށްވާއިރު، އައްބާސް އިބްރާހީމަށް މި ޝަރަފު އެރުވީ ދިވެހިބަހާއި އަދަބިއްޔާތުގެ ދާއިރާއިން.

އާންމުންގެ ތަނަވަސްކަން ހުއްޓުވަނީ ރާއްޖެ ނިކަމެތިކުރުން: ނަޝީދު

ރަސްމާލެ މަޝްރޫއު އީގަލް ހިލްސް ކުންފުންޏާ ހަވާލުކުރުމާ ދެކޮޅަށް އެމްޑީޕީން ކުރާ މަސައްކަތަކީ އާންމު ރައްޔިތުންނަށް ލިބެން އޮތް ތަނަވަސްކަން ހުއްޓުވައި ރާއްޖެ ނިކަމެތިކުރުމަށް ޖަހާ މަޅިއެއް ކަމަށް ނަޝީދު ވިދާޅުވި.

ޖޭޕީ، އަދާލަތު، އެމްޑީއޭ އަދި އެމްއެންޕީން މެންބަރުން ވަކިވަނީ

އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި ޖޭޕީ، އެމްޑީއޭ، އަދާލަތު އަދި އެމްއެންޕީން ގިނަ އަދަދެއްގެ މެންބަރުން ވަނީ ވަކިވެފައި. މީގެ ބަދަލުގައި ސަރުކާރު ހިންގާ ޕީއެންސީއާއި އިދިކޮޅު އެމްޑީޕީގެ މެންބަރުންގެ އަދަދު ބޮޑުތަނުން އިތުރުވި. އެންމެ ގިނަ މެންބަރުން ވަކިވީ ޖޭޕީން ކަމަށްވާއިރު، އެންމެ ގިނަ މެންބަރުން އަލަށް ގުޅުނީ ޕީއެންސީއާ

އިސްތިއުނާފު ލަސްވާ މައްސަލައިގައި ޖޭއެސްސީ ހާޒިރުކުރަނީ

ޖަލު ހުކުމް ތަންފީޒުކޮށް ނިމޭއިރުވެސް އިސްތިއުނާފު މަރުހަލާ ނުނިމޭ މައްސަލައަށް ގާނޫނީ ހައްލެއް ހޯދުމަށް ޖޭއެސްސީ މަޖިލީހުގެ ޖުޑިޝަރީ ކޮމިޓީއަށް ހާޒިރުކުރުމަށް ވަނީ ފާސްކޮށްފަ. އިސްތިއުނާފު މައްސަލަތައް ނިންމަންޖެހޭ ވަކި މުއްދަތެއް ގާނޫނުގައި ނެތުމުގެ ސަބަބުން ކުށްވެރިންގެ އަސާސީ ހައްގުތައް ގެއްލެމުންދާކަން މެންބަރުން ފާހަގަކުރެއްވި.

"ބިން ދީ ދީނާއި މިނިވަންކަން ގެއްލުވާ ވެރިޔަކު އަދި މި ނޫނީ ނާދޭ"

ބޭރު މީހުންނަށް ބިން މިލްކުކުރެވޭ ގޮތަށް ސަރުކާރުން ނިންމާފައިވާ ނިންމުމަކީ ރާއްޖޭގެ ދީނީ ވަހުދަތާއި މިނިވަންކަމަށް އޮތް ބޮޑު ނުރައްކަލެއް ކަމަށާއި މި ނިންމުމުގެ ސަބަބުން ރާއްޖޭގެ ބިންތަކުގެ މިލްކުވެރިކަން އެހެން ދީންތަކުގެ މީހުންނަށް ލިބިދާނެ ކަމުގެ ބިރު އޮތްކަން ފާހަގަކުރައްވައި، ގައުމު ދިފާއުކުރުމަށް ނުކުތުމަށް ޖަމީލު ގޮވާލައްވައިފިއެވެ.

ސުޕްރީމް ކޯޓުގެ ފަނޑިޔާރުންނަށް އޮނަރަބަލް ކިޔަން އަންގައިފި

ސުޕްރީމް ކޯޓުގެ ފަނޑިޔާރުންނާ މުހާތަބުކުރާއިރު "އޮނަރަބަލް" ކިޔުމަށް ޖޭއެސްސީން ރަސްމީކޮށް އަންގައި ސާކިއުލާއެއް ވަނީ ނެރެފައި. މި ބަދަލާއެކު ފަނޑިޔާރުންގެ ނަމުގެ ކުރިއަށް "އަލްއުސްތާޒް" ބޭނުންކުރުން ހުއްޓާލަން ޖެހޭއިރު، މިއީ މީގެ ކުރިން އަމަލުކުރަމުން އައި އުސޫލަށް ގެނައި ރަސްމީ ބަދަލެއް.

Newsletter

Get the latest news delivered straight to your inbox