ޕަބްލިކް ސާވިސް މީޑިއާ (ޕީއެސްއެމް)ގެ އެގްޒެކެޓިވް ބިއުރޯ ހަދަން މަސައްކަތުގެ އަގު ނުދީގެން އާޓިސަން ޕްރައިވެޓް ލިމިޓެޑުން ދައުވާ ކުރި މައްސަލައިގައި ޕީއެސްއެމްއިން އެ ކުންފުންޏަށް ދައްކަން ހުކުމް ކުރި 4.5 މިލިއަން ރުފިޔާ ދެއްކެންދެން ޕީއެސްއެމްއިން މާލީ މުއާމަލާތްތައް މަޑުޖައްސާލަން ސިވިލް ކޯޓުން އަމުރުކޮށްފި އެވެ.
ޕީއެސްއެމްގެ ބިލްޑިންގައި 2018 ވަނަ އަހަރު އެގްޒެކެޓިވް ބިއުރޯއެއް ހަދަން އާޓިސަން ޕްރައިވެޓް ލިމިޓެޑާ ހަވާލުކޮށް އެ މަސައްކަތް ނިމުމުން އެ ކުންފުނިން ފޮނުވި އިންވޮއިސްއަށް ޕީއެސްއެމްއިން ފައިސާ ނުދައްކާ ކަމަށް ބުނެ އެ ކުންފުނިން ދައުވާ ކުރި މައްސަލައިގައި ސިވިލް ކޯޓުން ހުކުމް ކުރީ އެ ކުންފުންޏަށް 4.5 މިލިއަން ރުފިޔާ ދިނުމަށެވެ.
އެ ހުކުމާ އެއްގޮތަށް ފައިސާ ނުދައްކާ ކަމަށް ބުނެ އާޓިސަންއިން ވަނީ ސިވިލް ކޯޓަށް ހުކުމް ތަންފީޒު ކުރުމުގެ މައްސަލައެއް ހުށަހަޅައިފަ އެވެ.
ސިވިލް ކޯޓުގެ އަމުރުގައި ވަނީ ކޮންމެ މަހަކު ޕީއެސްއެމް ހިންގުމަށް 8،000،000ރ. ހަރަދުވާ ކަމަށް ޕީއެސްއެމްއިން ކޯޓަށް ފޮނުވި ސިޓީގައި ބަޔާންކޮށްފައިވާ ކަމަށެވެ. އެހެންނަމަވެސް، ކޯޓުން ބެލި ބެލުމުން އެ އަދަދާ ގާތްކުރާ އަދަދަށް ވެސް ޕީއެސްއެމްގެ ބޭންކް އެކައުންޓްތަކުގައި ފައިސާ ނެތް ކަމަށް އަމުރުގައިވެ އެވެ.
އެ ހަރަދުތައް ކުރުމަށް ޕީއެސްއެމްއަށް ފައިސާ ލިބޭނީ ކޮން ފަރާތްތަކުން ކަމާއި އެ ފައިސާ ލިބެނީ ކޮން ވަސީލަތްތަކެއް މެދުވެރިކޮށް ކޮން ގޮތަކުން ކަމާއި މާލީ ހާލަތުގެ ތަފްސީލުތައް ވަޒަންކުރުމަށްފަހު އަންނަ ބުރާސްފަތި ދުވަހުގެ 12:00 ގެ ކުރިން ކޯޓަށް ފޮނުވުމަށް އަމުރުކޮށްފައިވެ އެވެ.
އެ މައްސަލައިގައި ދަރަނި ހަލާސްކުރެވެންދެން ނުވަތަ ކޯޓުން އެހެން ގޮތެއް އަންގަންދެން ޕީއެސްއެމްގެ މިލްކިއްޔާތުގައި ހުރި އެއްވެސް މުދަލެއް ޝަރީއަތުގެ ހުއްދަނެތި ނުވިއްކުމަަށާއި އެ މުދަލެއް ތިންވަނަ ފަރާތަކަށް ބަދަލުވެދާނެ ފަދަ އެއްވެސް މުއާމަލާތެއް ނުކުރުމަށް އަންގާފައިވެ އެވެ.
ޕީއެސްއެމްއިން އާޓިސަންއަށް ފައިސާ ދައްކަން ދެކޮޅު ހެދީ އެ ކުންފުނިން ފޮނުވި އިންވޮއިސްތަކަކީ ކުރި މަސައްކަތާ އެކަށީގެންނުވާ ވަރުގެ ބޮޑު އަގުތަކެއް ކަމަށް ބުނެ އެވެ. އަދި އެކަން އޮޑިޓުން ވެސް ދައްކާ ކަމަށް ވެސް ކުރިން ބުނެފައިވެ އެވެ. އޭގެ އިތުރުން، އެ މަސައްކަތް އެ ކުންފުންޏާ ހަވާލުކުރީ ވެސް އޭރު ޕްރޮކިއުމަންޓް އުސޫލުތަކާ ހިލާފަށް ކަމަށް ވެސް ބުނެފައިވެ އެވެ.
