ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް، ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ބޮޑެތި ތުހުމަތުތަކެއް ކުރައްވައިފި އެވެ.
ސެޕްޓެމްބަރު 9، ގައި ބާއްވާ ރިޔާސީ އިންތިހާބަށް ނަޝީދުގެ ދަ ޑިމޮކްރެޓްސް އިން ނެރެފައިވާ ކެންޑިޑޭޓް އިލްޔާސް ލަބީބަށް ކެމްޕެއިންކުރަން ގއ. ކޮލަމާފުށީގައި މިއަދު ބޭއްވި ޖަލްސާއެއްގައި ނަޝީދު ވިދާޅުވީ މުއިއްޒު ވެރިކަމަށް ވަޑައިގެންފި ނަމަ ޕީޕީއެމް/ޕީއެންސީގެ ލީޑަރު، ކުރީގެ ރައީސް އަބްދުﷲ ޔާމީނަށް ޖެހިވަޑައިގަންނަވާނީ ހުދު ނަޝީދަށް ވެސް ޖެހިވަޑައިގެންނެވި ހާލުކޮޅު ކަމަށެވެ.
ވެރިކަމުގެ އެއްވެސް ކަމަކަށް ހިޔާލު ދެއްވުމުގެ ފުރުސަތު ޔާމީނަށް އޭރުން ނޯންނާނެ ކަަމަށާއި ޔާމީނުގެ ފުރާނަފުޅަށް ނުރައްކާވާ ހާލަަތަށް ކަންތައްތައް ދާނެ ކަމަށް ވެސް އެމަނިކުފާނު ވިދާޅުވި އެވެ.
"މުއިއްޒުގެ ސަރުކާރެއް އުފެދިއްޖެ ނަމަ، ދެން އޭގެ މިސާލު އިތުރަށް ދުރަކަަށް ދާކަށް ނުޖެހޭނެ މިހިރީ. ދެން ރައީސް ޔާމީނަށް ވާނެ ގޮތް. ބާކީކުރުން، ވެރިކަމުގެ ކަންކަމުން ދުރުކުރުން، އެންމެ ފަހުން އައިސް މަރުގެ ތުންފަތް މައްޗަށް އައުން،" ނަޝީދު ވިދާޅުވި އެވެ.
އެމަނިކުފާނު ތުހުމަތުކުރެއްވި ގޮތުގައި މުއިއްޒުގެ ސަރުކާރެއްގައި ގެއްލުން ވާނީ ހަމަ އެކަނި ރައީސް ޔާމީނަކަށް ނޫނެވެ. މުޅި ރާއްޖެއަށް ވެސް އޭގެ ގެއްލުންވާނެ ކަމަށް އެމަނިކުފާނު ތުހުމަތުކުރެއްވި އެވެ.
"އަދި އަޅުގަނޑުމެން އަތުން ދިވެހި ރާއްޖެ ބީވެގެންދާ މިންވަރަށް ރާއްޖޭގެ ކަންކަން ހައްދުފަހަނައަޅައި ދިއުން. މިމަގަށް އަޅުގަނޑުމެން ދީލާލުން،" ނަޝީދު ވިދާޅުވި އެވެ.
މުއިއްޒަށް ކުރެއްވި ތުހުމަތުތަކާ އެކު ޕީޕީއެމްގެ މެމްބަރުންނަށް ނަޝީދު ގޮވައިލެއްވީ ރިޔާސީ އިންތިހާބުގައި ޑިމޮކްރެޓްސްގެ ކެންޑިޑޭޓް އިލްޔާސް ލަބީބަށް ތާއީދުކުރުމަށެވެ. ޕީޕީއެމްގެ ވޯޓް ހޯއްދަވަން އެމަނިކުފާނު މީގެ ކުރިން ވެސް އެތައް ވާހަކަފުޅެއް ދައްކަވައިފަ އެވެ. މި ކެމްޕޭނުގައި ވަޑަައިގަންނަވާ ގިނަ ރަށްރަށުގައި ޕީޕީއެމްގެ މެމްބަރުން ތިބޭ ތަންތަނަށް އެމަނިކުފާނު ޒިޔާރަތްވެސް ކުރައްވަ އެވެ.
