މިއަހަރުގެ މިހާތަނަށް ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ ގައުމުތަކުގެ ލިސްޓުގެ ތިން ވަނަ އަށް ޗައިނާ އަރައިފި އެވެ.
ޓޫރިޒަމް މިނިސްޓްރީން އާންމުކުރި ތަފާސްހިސާބުތަކުގައި ވާގޮތުން، މި މަހުގެ ދެވަނަ ދުވަހުގެ ނިޔަލަށް ޖުމުލަ 1،086،074 ފަތުރުވެރިން ވަނީ ރާއްޖެ އައިސްފަ އެވެ. މިއީ މިދިޔަ އަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންނާ އަޅާ ބަލާއިރު 13.7 ޕަސެންޓުގެ އިތުރުވުމެކެވެ.
ތަފާސްހިސާބުތައް ދައްކާ ގޮތުގައި, މިދިޔަ އަހަރުގެ އޮގަސްޓް ދެވަނަ ދުވަހާއި ހަމައަށް ރާއްޖެއަށް ޒިޔާރަތް ކުރީ 955،502 ފަތުރުވެރިންނެވެ. 2021 ވަނަ އަހަރު މި މުއްދަތުގައި 621،956 ފަތުރުވެރިން ޒިޔާރަތް ކުރި އެވެ.
ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ 10 ގައުމު ހިމެނޭ ލިސްޓުގެ އެންމެ ކުރީގައި އޮތީ ރަޝިޔާ އެވެ. ދެ ވަނައަށް އިންޑިއާ އޮތް އިރު ޗައިނާ ވަނީ 94،476 ފަތުރުވެރިންނާއިއެކު މި ލިސްޓުގެ ތިން ވަނަ ހޯދާފަ އެވެ.
ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ 10 ގައުމު
- ރަޝިއާ - 128،404
- އިންޑިއާ - 123،151
- ޗައިނާ - 94،476
- އިނގެރޭސިވިލާތް - 90،897
- ޖަރުމަނު - 73،318
- އިޓަލީ - 69،771
- އެމެރިކާ - 44،649
- ފްރާންސް - 32،714
- ސްވިޒަލޭންޑް - 22،453
- އޮސްޓްރޭލިއާ - 19،537
މި މަހުގެ އެއްވަނަ ދުވަހު ރ. ކުޑަކުރަތުގައި ވަނީ އައު ރިސޯޓެއް ވެސް ހުޅުވާފަ އެވެ. "އަމަރި ރާޔާ" ރިސޯޓު ހުޅުވައިދެއްވީ ޓޫރިޒަމް މިނިސްޓަރު ޑރ. އަބްދުﷲ މައުސޫމް އެވެ. އޯއެންވައިއެކްސް ހޮސްޕިޓާލިޓީ ގުރޫޕުން ހިންގާ މި ރިސޯޓުގައި 187 ވިލާ ހުރެ އެވެ.
އަމަރި ރާޔާ މޯލްޑިވްސް ހުޅުވުން -- ފޮޓީ: ޓޫރިޒަމް މިނިސްޓްރީ
ފަތުރުވެރިކަމަށް މިހާރު ރާއްޖޭގައި 1،257 ތަނެއް ހިންގަމުންދެ އެވެ. އެއީ 172 ރިސޯޓާއި 911 ގެސްޓްހައުސް އާއި 161 ސަފާރީގެ އިތުރުން 13 ހޮޓަލެވެ. މި ތަންތަނުގައި ފަތުރުވެރިން ބޭނުންކުރަން ހުރި އެނދުގެ އަދަދަކީ 61،564 އެވެ.
