ކޭޕާކް ރެސިޑެންސްއިން އެޕާޓްމެންޓު ވިއްކުމުގެ ތެރެއިން މަކަރު ހަދައި އޮޅުވާލި މައްސަލާގައި ތުހުމަތު ކުރެވޭ ހަމްބޯ ކުންފުނީގެ މައިނޯރިޓީ ހިއްސާދާރު ހަސަން މަމްދޫހު (މަންޑޭ) ދޫކޮށްލުމަށް ހުޅުމާލެ ކޯޓުން އަމުރުކޮށްފި އެވެ.
އެ މައްސަލައިގައި ކޯޓު އަމުރެއްގެ ދަށުން މަމްދޫހު ހައްޔަރުކޮށް، އެންމެ ފުރަތަމަ އޭނާގެ ބަންދަށް 15 ދުވަހުގެ މުއްދަތެއް ޖެހި އެވެ. އެ 15 ދުވަހަށް ފަހު މިދިޔަ ބުރާސްފަތި ދުވަހު ވަނީ ބަންދަށް އިތުރު 10 ދުވަސް ދީފަ އެވެ. އެ މުއްދަތު ހަމަވީ މިއަދަށެވެ.
މިއަދު ހުޅުމާލެ ކޯޓަށް އޭނާގެ ބަންދާ މެދު ގޮތެއް ނިންމަން ހާޒިރުކުރުމުން ދޫކޮށްލަން ވަނީ އަމުރުކޮށްފަ އެވެ. މި ކަން ފުލުހުން ޔަގީންކޮށްދެ އެވެ. ދޫކޮށްލަން އަމުރުކޮށްފައިވަނީ ކޯޓަށް ހާޒިރުވާން އެންގުމުން ހާޒިރުވުމަށާއި، ރަށުން ބޭރަށްދާނަމަ ހުއްދަ ނަގައިގެން ނޫނީ ނުދެވޭނެ ކަމަށް ޝަރުތުކޮށްފަ އެވެ.
މަންޑޭ ހައްޔަރުކުރުމުގެ އަމުރެއް ކޯޓުން ނެރުނީ، ފުލުހުންގެ އެދުމަށް މަންޑޭގެ ޕާސްޕޯޓު ހިފެހެއްޓުމަށް ކުރި އަމުރު ބާތިލްކޮށް، އޭނާއަށް ވަގުތީ ގޮތުން ރާއްޖޭން ބޭރަށް ދިއުމުގެ ހުއްދަ ދިންތާ އެއް ދުވަސް ފަހުންނެވެ. އެ އަމުރުގެ މައްސަލަ މިހާރު އޮތީ ހައި ކޯޓުގައި އިސްތިއުނާފުކޮށްފަ އެވެ.
ކޭޕާކު ޕްރޮޖެކްޓުގެ މަސައްކަތް ކުރަނީ ކޮރެއާގެ ހަމްބޯ ކުންފުންޏާ ގުޅިގެން އުފެއްދި ހަމްބޯ މޯލްޑިވްސްއިންނެވެ. އެ ކުންފުނީގެ 95 ޕަސެންޓު ހިއްސާ އޮންނަނީ ޗައިނާ ރައްޔިތެއް ކަމަށްވާ ޖިން ޝީ ހޫގެ އަތުގަ އެވެ. މަންޑޭގެ އޮންނަނީ ކުންފުނީގެ ފަސް ޕަސެންޓު ހިއްސާ އެވެ.
ހަންބޯ ކޮރެއާއިން ނެރުނު ބަޔާނުގައި ފުލެޓުތައް ގަނެވިއްކުމުގެ އެއްބަސްވުމުގައި މަންޑޭ ސޮއިކޮށްފައި ވަނީ، މައި ހިއްސާދާރު ޖިން ޝިހޫގެ ސޮއި ފޯޖުކޮށްގެން މަންޑޭގެ ވިޔަފާރި ޕާޓްނަރު ޖައިޝަން ސައީދަށް ދިން ކަމަށް ބުނާ ގަރާރެއް ބޭނުންކޮށްގެން ކަމަށް ތުހުމަތުކޮށްފައިވެ އެވެ. ރައްދުގައި މަންޑޭ ނެރުނު ބަޔާނުގައި މަކަރާއި ހީލަތް ހެދުމުގެ ތުހުމަތު ކުރީ މައި ހިއްސާދާރަށެވެ.
