އެމްޑަބްލިއުއެސްސީ ދިވެހި ޕްރިމިއާ ލީގުގައި މިއަދު ހަވީރު ކުޅެން އޮތް މެޗަށް ކްލަބް ވެލެންސިއާ އިން ހާޒިރުވި ނަމަވެސް ރޯގާގެ އަސަރު ޓީމަށް ކުރުމާ އެކު، މެޗު ކުޅެވެން ނެތުމުން މާޒިޔާ ސްޕޯޓްސް އެންޑް ރެކްރިއޭޝަނަށް މެޗު ލިބިއްޖެ އެވެ.
މިއަދު ހަވީރު ހަތަރެއް ޖަހާއިރު ފަށަން ހަމަޖެހިފައި އޮތް މެޗަށް، ވެލެންސިއާ ވަނީ ދަނޑަށް ހާޒިރުވެފަ އެވެ.
އެކަމަކު، އެފްއޭއެމްގެ ޖެނެރަލް ސެކްރެޓަރީ، ހުސެއިން ޖަވާޒް (ޖަވާ)، މީޑިއާ އަށް ދިން މައުލޫމާތުގައި ވިދާޅުވެފައިވަނީ، ދަނޑަށް ވެލެންސިއާ އިން ހާޒިރުވި ނަމަވެސް އެ ޓީމުން އަންގާފައިވަނީ މި ވަގުތު މާލެ ސަރަހައްދުގައި ފެތުރެމުންދާ ރޯގާގެ އަސަރު ޓީމަށް ކޮށްފައިވާ ކަމަށެވެ.
"ނަމަވެސް މެޗު ފެށުމާ މިހާ ކައިރިވެފައި ވަނިކޮށް މި ގޮތަށް އަންގާފައިވާތީ މި މެޗު ވެލެންސިއާ އިން ފޯފެއިޓް ކޮށްފައިވާ ކަމަށް، މުބާރާތުގެ ކޮމިޓީ މި މެޗު މުބާރާތުގެ ގަވާއިދާ އެއްގޮތަށް މާޒިޔާ އަށް މެޗު ލިބުނު ކަމަށް ނިންމާފައެވެ،" ޖަވާ ވިދާޅުވި އެވެ.
މިކަމާ ގުޅިގެން ވެލެންސިއާ އިން ވެސް ވަނީ ބަޔާނެއް ނެރެފަ އެވެ. ވެލެންސިއާގެ ބަޔާނުގައި ބުނެފައިވަނީ މެޗަށް 11 ކުޅުންތެރިން ހަމަކުރެވޭގޮތްނުވި ކަމަށާއި އޭގެ ސަބަބަކީ މާލޭގައި ފެތުރެމުން އަންނަ ރޯގާގެ ސަބަަބުން ގިނަ ކުޅުންތެރިންތަކެއް ބަލިވުމުން ކަމަށެވެ.
މި ވަގުތަކީ ހަލުވިކަމާ އެކު ރޯގާ ފެތުރެމުންދާ ދަނޑިވަޅަކަށްވާތީވެ، ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވެސް މީހުން އެއްވެ، އުޅޭ ގޮތަށް ހަރަކާތްތައް މަދުކުރަން އަންގާފައިވާ ވަގުތަކަށް ވާތީ، ވެލެންސިއާ އިން މި މެޗު ފަސްކުރަން ވެސް އެފްއޭއެމްގައި އެދިފައިވާނެ ކަމަށް ވެލެންސިއާގެ ބަޔާނުގައި ވަނީ ބުނެފަ އެވެ.
އެހެން ނަމަވެސް އެފްއޭއެމް އިން ނިންމީ މި މެޗު ފެށެން އެހާ ކައިރިވެފައިވަނިކޮށް ވެލެންސިއާގެ އެ ހުށަހެޅުން އައުމާ އެކު މުބާރާތުގެ ގަވާއިދާ އެއްގޮތަށް ކުރިއަށްދިއުމަށެވެ. އެހެންވެ، މާޒިޔާ އަށް މެޗު ލިބުނު ކަމަށް ނިންމީ އެވެ.
މި މެޗުގެ ތިން ޕޮއިންޓާ އެކު މާޒިޔާ އެއް ވަނައިގައި އޮތީ، ހަ މެޗުން 18 ޕޮއިންޓާ އެކު އެވެ. ދެ ވަނައިގައި އޮތް އީގަލްސް އަށް ވަނީ ފަސް މެޗުން 13 ޕޮއިންޓް ލިބިފަ އެވެ. ލީގު ތާވަލު ފުލުގައި ވެލެންސިއާ އޮތީ ހަ މެޗުން ޕޮއިންޓެއް ނުލިބެ އެވެ.
