މިއަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު 1،050،661 އަށް އަރައިފި އެވެ.
ޓޫރިޒަމް މިނިސްޓްރީއިން އާންމުކޮށްފައިވާ ތަފާސް ހިސާބުތަކުން ދައްކާ ގޮތުން މިއީ މިދިޔަ އަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންނާ އަޅާ ބަލާއިރު 13.4 ޕަސެންޓު އިތުރު އަދަދެކެވެ.
ފާއިތުވި އަހަރުގެ މި މުއްދަތުގައި ރާއްޖެ އައީ 926،275 ފަތުރުވެރިންނެވެ. 2021 ވަނަ އަހަރުގެ މި މުއްދަތުގައި ޒިޔާރަތްކޮށްފައި ވަނީ 593،956 ފަތުރުވެރިންނެވެ.
ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ 10 ގައުމު ހިމެނޭ ލިސްޓުގެ އެންމެ ކުރީގައި އޮތީ ރަޝިޔާ އެވެ. ދެ ވަނައަށް އިންޑިއާ އޮތް އިރު ތިން ވަނަގައި އޮތީ އިނގިރޭސިވިލާތެވެ. ހަތަރު ވަނައިގައި ޗައިނާ އޮތް އިރު، އަންނަ އޮގަސްޓު މަހުގެ ފުރަތަމަ ކޮޅު މި ލިސްޓުގެ ތިން ވަނަ އަށް ޗައިނާ އަރާނެ ކަމަށް ލަފާކުރެވޭ ކަމަށް ޓޫރިޒަމް މިނިސްޓްރީއިން ބުނެ އެވެ.
އޭގެ އިތުރުން އެ ލިސްޓުގައި ޖަރުމަނު، އިޓަލީ، އެމެރިކާ، ފްރާންސް، ސްވިޒަލޭންޑްގެ އަދި އޮސްޓްރޭލިއާ ވެސް ހިމެނެ އެވެ.
މިއަހަރުގެ މިހާތަނަށް އެންމެ ގިނައިން ފަތުރުވެރިން ޒިޔާރަތްކުރީ ފެބުރުއަރީ މަހެވެ. ފެބުރުއަރީ މަހު އެކަނި ވެސް 177،914 ފަތުރުވެރިން ޒިޔާރަތްކުރި އެވެ.
ފަތުރުވެރިކަމަށް މިހާރު ރާއްޖޭގައި 1،256 ތަނެއް ހިންގަމުންދެ އެވެ. އެއީ 172 ރިސޯޓާއި 910 ގެސްޓްހައުސް އާއި 161 ސަފާރީގެ އިތުރުން 13 ހޮޓަލެވެ. މި ތަންތަނުގައި ފަތުރުވެރިން ބޭނުންކުރަން ހުރި އެނދުގެ އަދަދަކީ 61،554 އެވެ.
