ލިޔެކިޔުން ހަމަނުވެގެން، އުވާލަން އިއުލާނުކުރި ރާއްޖޭގެ 1989 ޖަމިއްޔާގެ ނަން އޮތް ލިސްޓުގެ ތެރޭގައި ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ހިމެނިއްޖެ އެވެ.
މި ލިސްޓާ އެކު، ޔޫތު މިނިސްޓްރީގެ އިއުލާނުގައި ބުނެފައިވަނީ މިއީ 2022 ވަަނަ އަހަރުގެ ނިޔަލަށް ވިދިވިދިގެން ދެ އަހަރުގެ އަހަރީ ރިޕޯޓް ހުށަހަޅާފައި ނުވާތީ ނުވަތަ ހިންގާ ކޮމެޓީ ރަޖިސްޓްރީ ކޮށްފައިނުވާ 1989 ޖަމިއްޔާ ޖަމިއްޔާ ކަމަށެވެ.
ވީއޭއެމްގައި މިހާރު އޮތް މުހައްމަދު ރަނޭޝް (ރަނޭ)ގެ ލީޑަޝިޕް އައި ފަހުން، އަހަރީ އާންމު ޖަލްސާ ބާއްވާފައިނުވާތީ އަންނަނީ ފާޑުކިޔުން އަމާޒުވަމުންނެވެ.
ޔޫތު މިނިސްޓްރީގެ އިއުލާނުގައި ފާހަގަކޮށްފައިވާގޮތުގައި، މި ޖަމިއްޔާތަށް އުވާލާ ލިސްޓުގައި ހިމަނާފައިވަނީ ތަކުރާރުކޮށް ދިން ފުރުސަތުތަކުގައި ވެސް ބޭނުންހިފާފައިނުވާތީ އެވެ. ލިސްޓުގައި ނަން އޮތް ޖަމިއްޔާއެއް އުވާލުން ހުއްޓުވުމަށް އެދޭ ފަރާތަކަށް އެ ފުރުސަތު އެބައޮތެވެ. އެއީ، އެ ޖަމިއްޔާގެ މެންބަރަކަށް ނުވަތަ މަސްލަހަތު އޮތް ތިން ވަނަ ފަރާތަކަށް ޖަމިއްޔާތަކުގެ ރަޖިސްޓްރާ އަށް ލިޔުމުން ހުށަހަޅައިގެންނެވެ. އެ ފުރުސަތު ދީފައި އޮތީ އަންނަ ސެޕްޓެމްބަރު މަހުގެ 24 ވަނަ ދުވަހު 14:00 އަށެވެ.
ވީއޭއެމްގެ މިހާރު އޮތް ލީޑަޝިޕުން އަހަރީ އާންމު ޖަލްސާ ބާއްވާފައިނުވާތީ، ކޮމިޝަނާ އޮފް ސްޕޯޓްސް އިން ވަނީ އެ އެސޯސިއޭޝަނާ މަޝްވަރާ ކުރުމަށް ފަހު، އަހަރީ އާންމު ޖަލްސާ ބާއްވައިގެން ކުރިއަށްދާން ޖެހޭނެ ގޮތުގެ ޓައިމްލައިނަކާ މެދު ވެސް އެއްބަސްވެފަ އެވެ. އެ ގޮތުން، އެއްބަސްވެވުނު ޓައިމްލައިންތަކުގެ މުއްދަތު ފަހަނައަޅައި ދިޔައިރު، ވެސް ކަންކަމަށް ހައްލެއް ނުލިބި، ޔޫތު މިނިސްޓްރީން އާންމުކުރި އުވާލާ ޖަމިއްޔާތަކުގެ ލިސްޓުގެ ތެރެއަށް ވީއޭއެމްގެ ނަން އައީ އެވެ.
