މެމްބަރުންގެ އަދަދު ހަމަނުވެގެން އިލެކްޝަންސް ކޮމިޝަނުން އުވާލަން ނިންމާފައި އޮތް މޯލްޑިވްސް ރިފޯމް މޫވްމަންޓުން ރިޔާސީ ކެންޑިޑޭޓަކު ނެރެން ބާއްވާ ޕްރައިމަރީގައި އެ ޕާޓީގެ ރައީސްގެ މަގާމުގައި ހުންނެވި ފާރިސް މައުމޫން ވާދަކުރައްވަން ފޯމު ހުށަހަޅުއްވައިފި އެވެ.
އެމްއާރުއެމްގެ ޕްރައިމަރީގައި ފާރިސް ވާދަކުރައްވާނެކަން އިއުލާންކުރެއްވީ އެ ޕާޓީން މިއަދު ކުރި ޓުވީޓެއްގަ އެވެ. ފާރިސް ފިޔަވާ އެ ޕްރައިމަރީގައި އެހެން ބޭފުޅަކު ވާދަކުރައްވާކަން އަދި އެނގިފައެއް ނެތެވެ.
އެމްއާރްއެމްގެ ޓިކެޓުގައި ރިޔާސީ އިންތިހާބަށް ވާދަކުރަން ހުށަހަޅާ ފަރާތްތަކުގެ ހުންނަން ޖެހޭ ޝަރުތުތަކަކީ, ޕާޓީގެ މެމްބަރެއްގެ ގޮތުގައި އެއް އަހަރުވުން, ޕާޓީގެ އިގުރާރުގައި ސޮއިކޮށް ހުށަހެޅުން އަދި އިލެކްޝަންސް ކޮމިޝަނުން ކަނޑައަޅާފައިވާ ޝަރުތުތައް ފުރިހަމަވުމެވެ.
އެމްއާރްއެމްގެ ޕްރައިމަރީގައި ވާދަކުރަން ހުށަހަޅަންޖެހެނީ އެމްއާރްއެމްގެ ޓިކެޓުގައި އިންތިހާބަށް ކުރިމަތިލުމަށް އެދޭ ފޯމެވެ. އެ ޕާޓީން ބުނިގޮތުގައި ޕްރައިމަރީ ބާއްވާނީ އަންނަ ހޯމަ ދުވަހު އެވެ. އަދި ވޯޓުލުން ކުރިއަށް ދާނީ އޮންލައިންކޮށެވެ.
އެމްއާރުއެމުން ރިޔާސީ ޕްރައިމަރީއަށް ހުޅުވާލުމަށްފަހު މިއަދު ވަނީ ރައީސް އިބްރާހިމް މުހައްމަދު ސޯލިހު، އެމްޑީޕީއާއެކު ކޯލިޝަން ހެދުމަށް ފޮނުއްވި ދައުވަތު ގަބޫލުނުކުރަން ނިންމިކަން އިއުލާންކޮށްފަ އެވެ.
ޕްރައިމަރީއަށް ހުޅުވާލުމުގެ ކުރިން އިންތިހާބަށް އަމިއްލަގޮތުން ކުރިމަތިލުމަށް ބޭނުންވާ ތާއީދު ސޮއިގެ އަދަދު ހަމަކުރުމަށް ފާރިސް މަސައްކަތް ކުރެއްވިކަން "އަދަދު" އަށް ވަނީ ކަށަވަރުވެފަ އެވެ. ބެލެވޭ ގޮތުގައި އެއީ އެމްއާރުއެމަށް އިންތިހާބުގައި ވާދަނުކުރެވޭ ހާލަތަކަށް ތައްޔާރުވުމުގެ ގޮތުން ކުރެއްވި ކަމެކެވެ.
ގާނޫނުން ލާޒިމްކުރާ މެންބަރުންގެ އަދަދު ހަމަނުވުމުން، އުވާލުމަށް ނިންމާފައިވާ އެމްއާރުއެމުން ރިޔާސީ ކެންޑިޑޭޓަކު ނެރުމަށް މަސައްކަތް ކުރަމުންދާއިރު, ކުރިއަށް އޮތް ރިޔާސީ އިންތިހާބުގައި ކެންޑިޑޭޓަކު ނުނެރެވޭނެ ކަމަށް ސީދާ ބުނަން ނޭނގޭ ކަމަށް އިލެކްޝަންސް ކޮމިޝަނުން ވަނީ ބުނެފަ އެވެ.
"އެމްއާރުއެމް އިން އެބަވޭ އެ ޕާޓީ އުވާލުމަށް ކޮމިޝަނުން ނިންމި ނިންމުން ގަބޫލުނުކުރާނެ ކަމަށް ބުނެ ކޯޓަށް މައްސަލަ ހުށަހަޅާފަ، އެހެންވީމަ ދެން ކޯޓުން ގޮތެއް ނުނިމެނީސް [ރިޔާސީ ކެންޑިޑޭޓަކަށް] ވާދަކުރެވޭނެއޭ، ނުކުރެވޭނެއޭ މިވަގުތު ބުނަން ދަތި،" އީސީގެ ސެކެޓްރީ ޖެނެރަލް ހަސަން ޒަކަރިއްޔާ ވިދާޅުވި އެވެ.
އެމްއާރުއެމް އުވާލި މައްސަލާގައި މައުމޫނާއި އެމަނިކުފާނުގެ ދަރިކަލުން އަދި ޕާޓީގެ ރައީސް އަހްމަދު ފާރިސް މައުމޫން ވަނީ މިއީ އީސީގެ ނިންމުމަކީ ގާނޫނާ ހިލާފު ނިންމުމެއް ކަމަށް ބުނެ ފާޑުވިދާޅުވެފަ އެވެ. އެމްއާރުއެމުން ބުނާ ގޮތުގައި އީސީއިން 3،000 މެމްބަރުން ހަމަކުރުމަށް ދިން މުއްދަތުގައި އެ އަދަދަށް އެ ޕާޓީން ވަނީ ފޯމު ހުށަހަޅައިފަ އެވެ.
އީސީގެ ނިންމުން ބާތިލުކުރުމަށް އެދި ކުރިއަށް އޮތް 30 ދުވަހުގެ ތެރޭގައި ސިވިލް ކޯޓަށް މައްސަލައެއް ހުށަހެޅުމަށް މަސައްކަތް ކުރަމުންދާ ކަމަށް ކޯޓުގައި ބުނެފައިވާތީ، ސިވިލް ކޯޓުގެ އަމުރު ނެރެދީފައިވަނީ 30 ދުވަހަށެވެ. އެ އަމުރު ނެރުނީ މިދިޔަ މޭމަހުގެ 28 ގަ އެވެ. އެ އަމުރު މުރާޖައާ ކުރުމަށް އެދި އީސީއިން ދެފަހަރެއްގެ މަތިން ހުށަހެޅުމުންވެސް ކޯޓުން ނިންމީ މުރާޖައާ ކުރެވެން ނެތް ކަމަށެވެ.
