ދިރާސާ ކުރުމަށާއި އިޖުތިމާއީ ބޭނުންތަކަށް ފަޅު ރަށްތައް ކުއްޔަށް ދޫކުރެވޭ ގޮތަށް "މަސްވެރިކަމާއި ދަނޑުވެރިކަމާއި އިގުތިސޯދީ ބޭނުންތައް ފިޔަވައި އެ ނޫން ބޭނުންތަކަށް ފަޅު ރަށްރަށް ދޫކުރުމާ ބެހޭ ގަވާއިދު" ޕްލޭނިން މިނިސްޓްރީން އިއްޔެ ގެޒެޓުކޮށްފި އެވެ.
ޕްލޭނިން މިނިސްޓްރީގެ ގަވާއިދުގައިވާ ގޮތުގައި ވަރުވާއަށް ލިޔެދޭ ފަޅު ރަށްރަށާއި، މަސްވެރިކަމާއި ދަނޑުވެރިކަމުގެ ބޭނުމަށް ކުއްޔަށް ދޫކުރެވޭ ފަޅު ރަށްރަށުގެ އިތުރުން ސިނާއީ ރަށްރަށާއި ޓޫރިޒަމް ނޫން ބޭނުންތަކަށް ރަށްތައް ދޫކުރަނީ އެ ގަވާއިދުގެ ދަށުންނެވެ.
މިގޮތަށް ދޫކުރާ ރަށްތަކުގެ ތެރެއިން ކައުންސިލްތަކުގެ އިހުތިސާސްގައި ނުހިމެނޭ ރަށްތަކުގެ ތެރެއިން ދޫކުރެވޭ ފަޅު ރަށްރަށް ކަނޑައަޅާނީ ވަޒީރުންގެ މަޖިލީހުގެ ކޮމިޓީގެ ލަފާގެ މަތިން، ރައީސުލްޖުމްހޫރިއްޔާ އެވެ. މި ރަށްތައް ދޫކުރުމުގެ ޕްލޭނިން މިނިސްޓްރީއަށް ދީފައިވާއިރު ކައުންސިލްތަކުގެ އިހްތިސާސްގެ ތެރޭގައި ހިމެނޭ ރަށްތައް ކުއްޔަށް ދޫކުރަނީ އެ ރަށެއް ނިސްބަތްވާ ކައުންސިލުންނެވެ.
މި ގަވާއިދުގެ ދަށުން ފަޅު ރަށްތައް ދޫކުރެވެނީ ތިން ގޮތަކަށެވެ. އެއީ:
- ބީލަން އުސޫލުން އިއުލާން ކޮށްގެން
- ރަށުގައި ކުރަން ބޭނުންވާ ކަމަކާބެހޭ ތަފުސީލު ރިޕޯޓަކާއެކު ހުށަހެޅުމުން
- ސަރުކާރުގެ އިސްނެގުމަށް، ފަޅުރަށެއް ބަލަހައްޓަން ކައުންސިލަކާ ހަވާލުކުރުން
އިގުތިސޯދީ ނޫން ބޭނުންތަކަށް ދޫކުރާ ފަޅު ރަށްތައް ދޫކުރެވެނީ ގިނަވެގެން 21 އަހަރަށެވެ. އެހެން ނަމަވެސް މުއްދަތު އިތުރުކުރަން ހުށަހަޅައިފި ހާލަތެއްގައި ވަކި ޝަރުތުތަކެއް ފުރިހަމަވާނަމަ ކުލީގެ މުއްދަތު 50 އަހަރަށް އިިތުރުކުރެވެ އެވެ. ހަމަ އެގޮތަށް، ގަވާއިދުގައި އެކަމަށް ކަނޑައަޅާފައިވާ ޝަރުތުތައް ފުރިހަމަ ވާނަމަ، ސަބްލީސްކުރުމާއި ރަށުގެ ލީސް ރަހުނުކުރެވެ އެވެ.
މި ގަވާއިދުން ފަހިވެގެންދާ ކަންކަމުގެ ތެރޭގައި ރަށްރަށަށް ޕިކްނިކް އައިލެންޑްތައް ކަނޑައެޅުން ހިމެނެ އެވެ.
