ކުރީގެ ރައީސް މައުމޫން އަބްދުލްގައްޔޫމުގެ އެމްއާރުއެމް އިން ކުރިއަށް އޮތް ރިޔާސީ އިންތިހާބުގައި ކެންޑިޑޭޓަކު ނުނެރެވޭނެ ކަމަށް ސީދާ ބުނަން ނޭނގޭ ކަމަށް އިލެކްޝަންސް ކޮމިޝަނުން ބުނެފި އެވެ.
ގާނޫނުން ލާޒިމްކުރާ މެންބަރުންގެ އަދަދު ހަމަނުވުމުން، އުވާލުމަށް ނިންމާފައިވާ އެމްއާރުއެމުން ރިޔާސީ ކެންޑިޑޭޓަކު ނެރުމަށް މަސައްކަތް ކުރަމުންދާ މި ދަނޑިވަޅުގައި، "އަދަދު" އިން ސުވާލު ކުރުމުން އީސީގެ ސެކެޓްރީ ޖެނެރަލް ހަސަން ޒަކަރިއްޔާ ވިދާޅުވީ، މި ހާލަތުގައި އެމްއާރުއެމްގެ ކެންޑިޑޭޓަކަށް ވާދަކުރެވޭނެކަން ނުވަތަ ނޫންކަން ދަންްނަވަން ދަތި ކަމަށެވެ.
"އެމްއާރުއެމް އިން އެބަވޭ އެ ޕާޓީ އުވާލުމަށް ކޮމިޝަނުން ނިންމި ނިންމުން ގަބޫލުނުކުރާނެ ކަމަށް ބުނެ ކޯޓަށް މައްސަލަ ހުށަހަޅާފަ، އެހެންވީމަ ދެން ކޯޓުން ގޮތެއް ނުނިމެނީސް [ރިޔާސީ ކެންޑިޑޭޓަކަށް] ވާދަކުރެވޭނެއޭ، ނުކުރެވޭނެއޭ މިވަގުތު ބުނަން ދަތި،" ޒަކަރިއްޔާ ވިދާޅުވި އެވެ.
އެމްއާރުއެމް އުވާލި މައްސަލާގައި މައުމޫނާއި އެމަނިކުފާނުގެ ދަރިކަލުން އަދި ޕާޓީގެ ރައީސް އަހްމަދު ފާރިސް މައުމޫން ވަނީ މިއީ އީސީގެ ނިންމުމަކީ ގާނޫނާ ހިލާފު ނިންމުމެއް ކަމަށް ބުނެ ފާޑުވިދާޅުވެފަ އެވެ. އެމްއާރުއެމުން ބުނާ ގޮތުގައި އީސީއިން 3،000 މެމްބަރުން ހަމަކުރުމަށް ދިން މުއްދަތުގައި އެ އަދަދަށް އެ ޕާޓީން ވަނީ ފޯމު ހުށަހަޅައިފަ އެވެ.
އީސީގެ ނިންމުން ބާތިލުކުރުމަށް އެދި ކުރިއަށް އޮތް 30 ދުވަހުގެ ތެރޭގައި ސިވިލް ކޯޓަށް މައްސަލައެއް ހުށަހެޅުމަށް މަސައްކަތް ކުރަމުންދާ ކަމަށް ކޯޓުގައި ބުނެފައިވާތީ، ސިވިލް ކޯޓުގެ އަމުރު ނެރެދީފައިވަނީ 30 ދުވަހަށެވެ. އެ އަމުރު ނެރުނީ މިދިޔަ މޭމަހުގެ 28 ގަ އެވެ. އެ އަމުރު މުރާޖައާ ކުރުމަށް އެދި އީސީއިން ދެފަހަރެއްގެ މަތިން ހުށަހެޅުމުންވެސް ކޯޓުން ނިންމީ މުރާޖައާ ކުރެވެން ނެތް ކަމަށެވެ.
އެމްއާރުއެމުން ރިޔާސީ ކެންޑިޑޭޓެއްގެ ގޮތުގައި އެ ޕާޓީގެ ރައީސް ފާރިސް މައުމޫން ނެރުމަށް ވާންޖެހޭ ތައްޔާރީތައް އެ ޕާޓީގެ އެކްސޯ މެންބަރުން ކުރަމުންދާކަން، އެމްއާރުއެމްގެ އިސް އޮފިޝަލަކު ވަނީ "އަދަދު" އަށް ކަށަވަރުކޮށްދީފަ އެވެ.
އެ އޮފިޝަލު ވިދާޅުވީ، ކޯޓުގައި މިހާރު އޮތް މައްސަލައަށް ގޮތެއް ނުނިމުނަސް، ރިޔާސީ އިންތިހާބުގެ ކަންކަމުގައި ބައިވެރިކުރުވުމަށް އެދި އީސީއަށް މިހާރު ސިޓީއެއް ފޮނުވާފައިވާނެ ކަމަށެވެ. އީސީގެ އެސްޖީ، ޒަކަރިއްޔާ ވިދާޅުވީ އިންތިހާބުގެ ކަންކަމުގައި، ހާއްސަކޮށް އިންތިހާބަށް ލަފާދޭ ކޮމިޓީގައި އެމްއާރުއެމް ނުހިމެނީ އެ ޕާޓީ އުވާލުމަށް އީސީއިން ނިންމާފައިވާތީ ކަމަށެވެ.
އެމްއާރުއެމް އަކީވެސް މި ސަރުކާރު ހިންގާ ކޯލިޝަނުގެ ބައިވެރިޔެކެވެ. ކުރިއަށް އޮތް ރިޔާސީ އިންތިހާބުގައި އެމްޑީޕީއާއެކު ކޯލިޝަން ހެދުމަށްވެސް އެމްއާރުއެމަށް ރައީސް އިބްރާހިމް މުހައްމަދު ސޯލިހު ދައުވަތު އެރުވި އެވެ. ނަމަވެސް، އެ ޕާޓީން މިހާތަނަށް އެ ދައުވަތަށް ރަސްމީ ޖަވާބެއް ދީފައެއް ނުވެ އެވެ.
ރިޔާސީ އިންތިހާބުގައި ވާދަކުރުމަށް އެދި ކެންޑިޑެސީ ފޯމު ހުށަހެޅުމުގެ ފުރުސަތު އިއްޔެ ހުޅުވާލާފައިވާއިރު، އެ މުއްދަތު ހަމަވާނީ އޮގަސްޓު ފަސް ވަނަ ދުވަހުގެ މެންދުރުފަހު 2:00 އަށެވެ.
