އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫގެ ހިތުގެ ތެޅުން ރަނގަޅު ކުރަން ޕޭސްމޭކަރެއް ލައްވަން ނިންމައިފި އެވެ.
ނަަތަންޔާހޫގެ އޮފީހުން ނެރުނު ވީޑިއޯ ބަޔާނެއްގައި އޭނާ ބުނީ ޕޭސްމޭކަރު ލެއްވުމަށް ސާޖަރީ ހަދާނީ އާދީއްތަ ދުވަހުގެ އިރާކޮޅު ކަމަށެވެ.
"މީގެ ހަފުތާއެއް ކުރިން އަޅުގަނޑުގެ ހަށިގަނޑުގައި މޮނިޓަރިން ޑިވައިސެއް ހަރުކުރި. މިއަދު ހަވީރު އެ ޑިވައިސްގެ ރަނގަބީލު އަޅަން ފެށި. އެހެންވީމާ، އަޅުގަނޑުގެ ހަށިގަނޑަށް ޕޭސްމޭކަރެއް ލައްވަން ޖެހޭ. އެކަން ކުރަން ޖެހެނީ ވީ އެންމެ އަވަހަކަށް މިރޭ،" ހޮނިހިރު ދުވަހުގެ ރޭ ނެރުނު ބަޔާނުގައި ބުންޏެވެ.
އުމުރުން 73 އަހަރުގެ ނަތަންޔާހޫ ވިދާޅުވީ ސާޖަރީއަށް ފަހު އާދީއްތަ ދުވަހުގެ މެންދުރު ފަހު ހޮސްޕިޓަލުން ދޫކޮށްލާނެ ކަމަށް ޑޮކްޓަރުން އެންގި ކަމަށެވެ.
އޭނާގެ އޮފީހުން ބުނީ އެކަން ކުރާނީ ތޭލް ހަޝޯމާގައި ހުންނަ ޝެބާ މެޑިކަލް ސެންޓަރުގައި ކަމަށެވެ. މީގެ ހަފުތާއެއް ކުރިން ޖުލައި 15 ގައި ވެސް ނަތަންޔާހޫ އެ ތަނުގައި އެޑްމިޓު ކުރި އެވެ.
އެ ފަހަރު ބުނީ އެޑްމިޓުކޮށްގެން ފަރުވާ ދޭން ޖެހުނީ މާ ބޮޑަށް ޑީހައިޑްރޭޓްވެ، ބޯ އަނބުރާތީ ކަމަށެވެ. ޓެސްޓުތަކުން މައްސަލައެއް ފާހަގަނުވި ކަމަށް ވެސް ބުންޏެވެ.
އެކަމަކު ބައެއް ނޫސްތަކުން އޭރު ބުނީ ނަތަންޔާހޫގެ މެޔަށް ތަދެއް އަރާތީ އުޅުނު ކަމަށެވެ. އެކަމަކު އެއްވެސް ރަސްމީ ފަރާތަކުން އެކަށް ކަށަވަރުކޮށްނުދެ އެވެ.
