މިދިޔަ އާދީއްތަ ދުވަހު ރާއްޖެއައި މިއަހަރުގެ އެއް މިލިއަން ފަތުރުވެރިޔާ، އެންޓޮން ޕަވްލޯ ވަނީ އޭނާގެ އުންމީދަކީ އަންނަ އަހަރު ދެ މިލިއަން ވަނަ ފަތުރުވެރިޔާގެ ގޮތުގައި ރާއްޖެ އައުން ކަމަށް އެވެ.
އެއް މިލިއަން ވަނަ ފަތުރުވެރިޔާ މަރުހަބާ ކިޔުމުގެ ގޮތުން ވެލާނާ އިންޓާނޭޝަނަލް އެއާޕޯޓުގައި އޮތް ރަސްމިއްޔާތުގައި ނޫސްވެރިންނާއި ވާހަކަދައްކަމުން އެންޓޮން ބުނީ، އާއިލާއާއިއެކު ރާއްޖެއައި އިރު މިފަދަ އެއްވެސް ކަމެއް ހިޔާލަށް ވެސް ގެނެވިފައި ނުވާ ކަމަށެވެ.
"ވަރަށް އުފާވެއްޖެ. އެއްގޮތަކަށް ވެސް އުންމީދުކުރި ކަމެއް ނޫން މީ. ރާއްޖެއިން ކީ ހޫނު މަރުހަބާއަށް ޝުކުރިއްޔާ. މިއީ ރާއްޖެ އައި ފުރަތަމަ ފަހަރު،" އުފާވެފައި އެންޓޮން ބުންޏެވެ.
އަންނަ އަހަރު ވެސް ރާއްޖެއަށް އަންނަން ބޭނުންވާކަން ފާހަގަކުރަމުން އެންޓޮން ބުނީ އަންނަ އުންމީދަކީ އަންނަ އަހަރުގެ ދެ މިލިއަން ވަނަ ފަތުރުވެރިޔާގެ ގޮތުގައި ރާއްޖެ އައުން ކަމަށެވެ.
"އަންނަ އަހަރު ވެސް ރާއްޖެ އަންނަން މިހާރު ވެސް ބޭނުން. އަންނަ އަހަރު ރާއްޖެ އަންނަ ދެ މިލިއަން ވަނަ ފަތުރުވެރިޔާގެ ގޮތުގައި،" އެންޓޮން ބުންޏެވެ.
އާދީއްދަ ދުވަހުގެ ހެދުނު ބްރިޓިޝް އެއާވޭސް ގެ ފްލައިޓަކުން ރާއްޖެ އައި ރަޝިޔާގެ އެންޓޮން ޕަވްލޯ އަށް މަރުހަބާ ދެންނެވީ ޓޫރިޒަމް މިނިސްޓަރު ޑރ. އަބްދުﷲ މައުސޫމް އަދި މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ) ގެ މެނޭޖިން ޑިރެކްޓަރު ތޮއްޔިބު މުހައްމަދު އެވެ.
ޕަވްލޯ އާއެކު އޭނާގެ ބައިވެރިޔާ އަނަސްތަޝިޔާ ކްލިންސްކީ އަދި އޭނާގެ ދަރިފުޅުވެސް އާދީއްތަ ދުވަހު ރާއްޖެ އަށް އައެވެ. އެ އާއިލާއިން ރާއްޖޭގައި ޗުއްޓީ ހޭދަކުރާނީ ވައްކަރު މޯލްޑިވްސް ރިސޯޓުގަ އެވެ.
ޓޫރިޒަމް މިނިސްޓްރީން އާންމުކުރާ ތަފާސްހިސާބުތަކަށް ބަލާއިރު މި އަހަރު ރާއްޖެއަށް އެންމެ ގިނައިން ފަތުރުވެރިން އައިސްފައިވަނީ އަވަށްޓެރި އިންޑިއާއިންނެވެ. އިންޑިއާގެ ފަހަތުން އުޅެނީ ރަޝިއާ އަދި އިނގިރޭސިވިލާތާއި ޗައިނާ އެވެ.
މި މަހުގެ 12 ވަނަ ދުވަހުގެ ނިޔަލަށް ފަތުރުވެރިން އައިސްފައިވާ އަދަދު:
- އިންޑިއާ - 115،837
- ރަޝިއާ - 115،334
- އިނގިރޭސިވިލާތް - 83،942
- ޗައިނާ - 74،348
- ޖަރުމަނު - 68،484
- އިޓަލީ - 66،007
- އެމެރިކާ - 41،072
- ފްރާންސް -30،916
- ސްވިޓްޒަލޭންޑް - 20،624
- އޮސްޓްރޭލިއާ - 18،088
މިދިޔަ އަހަރާ އަޅާ ބަލާއިރު ރާއްޖެ އަންނަ ފަތުރުވެރިންގެ އަދަދު އުޅެނީ 13.6 އިންސައްތަ ކުރީގަ އެވެ.
