އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫއަށް ކުއްލި ސިއްހީ މައްސަލައެއް ދިމާވެ، އެޑްމިޓުކޮށްގެން ފަރުވާ ދީފި އެވެ.
އެހެން ނަމަވެސް ރިޕޯޓުތައް ބުނާ ގޮތުން މާ ސީރިއަސް މައްސަލައެއް ދިމާނުވެ އެވެ. ހޮސްޕިޓަލުގައި އެޑްމިޓުކުރީ ޑީހައިޑްރޭޓްވެ ބޯ އަނބުރާތީ އެވެ.
އުމުރުން 73 އަހަރުގެ ނަތަންޔާހޫއަކީ އެންމެ ގިނަ ދުވަހު އިޒްރޭލުގައި ވެރިކަަން ކުރަމުންދާ ލީޑަރެވެ. އޭނާ ބޯ އަނބުރަން ފެށީ ޗުއްޓީގައި އުޅެނިކޮށް މާ ބޮޑަށް ހޫނުވެގެން ކަމަށް ރިޕޯޓުތައް ބުނެ އެވެ.
އިޒްރޭލުގެ ނޫސްތަކުން ބުނީ އެޑްމިޓުކުރީ ޝެބާ ހޮސްޕިޓަލުގައި ކަމަށެވެ. ޗެނަލް 12 ޓީވީން ބުނީ މެއަށް ތަދު އެރި ކަމަށެވެ. އެކަމަކު ރަސްމީ އިދާރާއަކުން އެކަން ކަށަވަރުކޮށްދީފައެއް ނުވެ އެވެ.
ނަތަންޔާހޫގެ އޮފީހުން ބުނީ ޓެސްޓުތަކުން އެއްވެސް ކަމެއް ގޯސް ކަމަށް ނުދައްކާ ކަމަށާއި އިތުރު ޓެސްޓުތަކެއް ވެސް ހަދަމުންދާ ކަމަށެވެ.
ސިއްހީ މައްސަލައެއް ދިމާވެ، ނަތަންޔާހޫއަށް ޒިންމާ އަދާނުކުރެވޭ ނަމަ މަގާމުގެ މަސްއޫލިއްޔަތާ ހަވާލުވާނީ ކާކު ކަމެއް ސާފެއް ނޫނެވެ.
މީގެ ކުރިން 2006 ގައި ބޮޑު ވަޒީރު އެރިއެލް ޝެރޯންއަށް ސްޓްރޯކެއް ޖެހުމުން މަސްއޫލިއްޔަތުތަކާ ހަވާލުވީ ޑެޕިއުޓީ ބޮޑު ވަޒީރު އިހޫދް އޮލްމާޓް އެވެ.
ނަތަންޔާހޫ ގައުމުން ބޭރަށް ދަތުރު ކުރައްވާ އިރު، މިހާތަނަށް މަސްއޫލިއްޔަތުތަކާ ހަވާލުވެފައި ވަނީ ޖަސްޓިސް މިނިސްޓަރު ޔަރިވް ލެވިން އެވެ.
