އިޒްރޭލުން ޖެނިން ސިޓީއަށް ދިން ހަމަލާތަކުގައި މަރުވި މީހުންގެ ޖަނާޒާގެ ތެރެއިން ފަލަސްތީނުގެ ރައްޔިތުން ސަރުކާރާ ދެކޮޅަށް އަޑުއުފުލައިފި އެވެ.
ދެ ދުވަސް ވަންދެން ޖެނިން ސިޓީއަށް ހަމަލާ ދިނުމުން ބޮޑެތި ގެއްލުންތަކެއް ލިބުނެވެ. ފަލަސްތީނުގެ 12 މީހުން މަރުވެ، 100 އަށް ވުރެ ގިނަ މީހުންނަށް އަނިޔާވި އެވެ.
އިޒްރޭލުގެ ހާހަކަށް ވުރެ ގިނަ ސިފައިން ބައިވެރިވި ހަމަލާ ފެށީ ދަންވަރުގެ ވަގުތު ޑްރޯންތައް ބޭނުންކޮށްގެން ޖެނިން ސިޓީގެ އެކި ހިސާބުތަކަށް ބޮން އަޅައިގެންނެވެ.
އޮޕަރޭޝަނުގެ ތެރެއިން އިޒްރޭލް ސިފައިންގެ އެކަކު މަރުވި އެވެ.
މަރުވި މީހުންގެ ޖަނާޒާގައި ބައިވެރިވުމަށް ފަލަސްތީން ސަރުކާރުގެ ތިން އިސް ލީޑަރުން ދިޔަ ނަމަވެސް، އާއްމުން ވަނީ އެ މީހުން އެ ތަނުން ފޮނުވައިލާފަ އެވެ.
ހުޅަނގު އައްސޭރީގައި ގާއިމްވެފައި އޮންނަ ފަލަސްތީނުގެ ސަަރުކާރަކީ އެއްވެސް ބާރެއް ނެތް އަދި ރައްޔިތުންގެ އިހުސާސްތަކާ ދުރު ލީޑަރުންތަކެއް ހިންގާ ސަރުކާރެއް ކަމަށް އާއްމުން ބުންޏެވެ.
އިޒްރޭލުގެ ހަމަލާގައި ފަލަސްތީނުގެ 150 މީހުން ހައްޔަރުކުރި އެވެ. މަރުވި އެންމެންނަކީ ވެސް އިސްލާމިކް ޖިހާދު އަދި ހަމާސްގެ މެމްބަރުން ކަމަށް އިޒްރޭލުން ބުނެ އެވެ.
އެކަމަކު އެ ދެ ގްރޫޕުން ބުނީ މެމްބަރުންގެ ތެރެއިން މަރުވީ ފަސް މީހުން ކަމަށެވެ. ދެން ބާކީ އެންމެންނަކީ އާއްމު ރައްޔިތުންނަށް ވާއިރު، ތިން ކުދިން ވެސް ހިމެނެ އެވެ.
