އަލަށް ތަރައްގީކޮށް ހުޅުވާފައިވާ އަމީނީ މަގުގެ ސަރަހައްދުތަކުގައި ގަވާއިދާ ހިލާފަށް ޕާކުކޮށްފައި ހުރި ވެހިކަލްތައް އެތަނުން ނަގަން ތިން ދުވަހުގެ މުހުލަތެއް ދިނުމަށް ފަހު ޓޯކުރަން ފަށާނެ ކަމުގެ އިންޒާރު ފުލުހުން ދީފި އެވެ.
ފުލުހުން ބުނީ އަމީނީ މަގުގައި ގަވާއިދާ ހިލާފަށް އުޅަނދުތައް ޕާކުކޮށްފައި ހުރުމުގެ ސަބަބުން ޓްރެފިކް ތޮއްޖެހި އެ މަގުން ހިނގާ މީހުުންނަށާއި ދުއްވާ އުޅަނދުފަހަރަށް ދަތިވާކަން ފާހަގަވެފައިވާ ކަމަށެވެ.
އެ ކަން ހައްލުކުރުމުގެ ގޮތުން މިއަދުން ފެށިގެން ތިން ދުވަހުގެ މުއްދަތަކަށް ބެލުމަށްފަހު އުޅަނދުތައް ޓޯކުރުމުގެ މަސައްކަތް ފަށާނެ ކަމަށް މިއަދު ކުރި ޓްވީޓެއްގައި ފުލުހުން ބުންޏެވެ.
އަމީނީ މަގު ތަރައްގީކުރުމުގެ މަޝްރޫއުގެ ދަށުން އެ މަގުގެ ބޮޑު ބައެއްގައި ތާރު އަޅާ މިހާރު ވަނީ އާންމުންނަށް ހުޅުވާލާފަ އެވެ. އެއާއެކު ހުޅުވި ސަރަހައްދުގެ އެއް ލޭނުގައި ހަތަރު ފުރޮޅުލީ އަދި ދެ ފުރޮޅުލީ އުޅަނދުތައް ޕާކުކުރަން ފެށިކަން ވަނީ ފާހަގަވެފަ އެވެ. އެއާއެކު އާންމުން ދަނީ އެފަދައިން ޕާކުކުރާ ފަރާތްތަކަށް ފާޑުކިޔުން އަމާޒުކުރަމުންނެވެ.
އަމީނީ މަގު ޒަމާނީ ފެންވަރަށް ތަރައްގީ ކުރުމުގެ ގޮތުން ތާރު އަޅައިގެން އެ މަގު ހެދުމުގެ މަސައްކަތް އާރުޑީސީން ފެށީ މިދިޔަ އަހަރު އޯގަސްޓު، 30، ގަ އެވެ. މި މަސައްކަތް އެ ކުންފުންޏާ ހަވާލު ކުރީ 210 ދުވަސް ތެރޭގައި ނިންމާ ގޮތަށެވެ. އެހެންކަމުން މެއި 28، 2023 އަށް އެ މުއްދަތު ހަމަވާނެ އެވެ.
ނަމަވެސް, އެ މުއްދަތަށް މަސައްކަތް ނުނިމޭނެ ކަމަށް ވިދާޅުވެ ޕްލޭނިން މިނިސްޓަރު މުހައްމަދު އަސްލަމް މިދިޔަ މަހު މަޖިލީހުގައި ވިދާޅުވީ އަމީނީ މަގުގެ މަސައްކަތް ނިމޭނެ ކަމަށް މިހާރު ބެލެވޭ ތާރީހަކީ އަންނަ ސެޕްޓެމްބަރު މަހުގެ 27 އަށް ކަމަށެވެ.
މިހާތަނަށް ތާރު އަޅާ, އާންމުންނަށް ހުޅުވާލާފައި ވަނީ ފުރަތަމަ ތިން ސެގްމެންޓު އެކަންޏެވެ. އެ މަސައްކަތް އަވަސް ކުރުމަށް އެމްޓީސީސީއާ ހަވާލުކޮށްގެން ތާރު އެޅުމަށްފަހު އާންމުންނަށް ހުޅުވާލީ މިދިޔަ މާޗް ހަ ވަނަ ދުވަހު އެވެ. އެއީ ސްޓެލްކޯއާ ހަމައަށެވެ.
އެއަށްފަހު ދެން އޮތީ ރޯދައިގެ ކުރިން އިމާދުއްދީން ސްކޫލާ ހަމައަށް ތާރު އަޅާ ނިންމާލާ ގޮތަށެވެ. ނަމަވެސް, އެ މަސައްކަތް ލަސްވެ, އޭޕްރީލް މަސް ތެރޭގައި ނިންމާލާނެ ކަމަށް ކަމަށް ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވި އެވެ.
ޖުމްލަ 15 ސެގްމަންޓަކަށް ބަހާލައިގެން އަމީނީ މަގު ހެދުމަށް އާރުޑީސީއާ ހަވާލުކޮށްފައި ވަނީ 84 މިލިއަން ރުފިޔާއަށެވެ.
