އަންނަ ސެޕްޓެމްބަރު މަހު ރާއްޖޭގައި ބާއްވާ ރިޔާސީ އިންތިހާބު ކަވަކުރާ ނޫސްވެރިންނާއި މޮނިޓަރުން، އިލެކްޝަންސް ކޮމިޝަން (އީސީ) އިން ކުރިއަށް ގެންދާ ހޭލުންތެރިކުރުމުގެ ސެޝަނެއް ފުރިހަމަކުރަން ޖެހޭ ގޮތަށް އެކޮމިޝަނުން ހެދި އުސޫލު ބަދަލުކޮށްފި އެވެ.
ރިޔާސީ އިންތިހާބާ ބެހޭ ކޮމިޓީން މިއަދު ބޭއްވި ބައްދަލުވުމުގައި އީސީގެ ނައިބު ރައީސް އިސްމާއީލް ހަބީބު ވިދާޅުވީ ނޫސްވެރިންނާއި މޮނިޓަރުންނަށް ތަމްރީނެއް ދޭ ވާހަކަ ކުރިން ބުނި ނަމަވެސް އެއީ ހޭލުންތެރިކުރުމުގެ އެންމެ ސެޝަނެއް ކަމަށެވެ. އެހެން ނަމަވެސް, އެއީ ތަމްރީނެއް ކަމަށް ކުރިން ވިދާޅުވެވުމުން އެކަން ބޮޑު މައްސަލަކަށް ވެފައިވާ ކަމަށް އޭނާ ވިދާޅުވި އެވެ.
"ގާނޫނަށް ގެނައި އިސްލާހުގައި [އިސްލާހުގެ ބިލުގައި] އެބައި ބޮޑަށް ހިމަނާފައި މި އޮތީ. އެހެންވީމާ އެ އިސްލާހު ފާހެއް ވެސް ނުވި. ދެން މަޖިލިސް މިހާރު ޗުއްޓީގައި މިއޮތީ. މިހާރު އަޅުގަނޑުމެންގެ ގަވާއިދަށް އަޅުގަނޑުމެން ގެނައި ބަދަލަކީ ނޫސްވެރިންގެ ގޮތުގައި އޮބްޒާވަރުންގެ ގޮތުގައި ކުރިމަތިލައްވާ ފަރާތްތަކުން ސުލޫކީ މިންގަނޑު އެބޭފުޅުންނަށް އެނގިވަޑައިގަންނަވާ ކަމަށް އެބޭފުޅުން އިގުރާރުވެވަޑައިގަތީމާ އެބޭފުޅުންނަށް ހުއްދަދޭނީ. އެގޮތަށް މި ނިންމީ،" ހަބީބް ވިދާޅުވި އެވެ.
އެއީ އޭނާ ވިދާޅުވި ގޮތުގައި ނޫސްވެރިންނާއި އޮބްޒާވަރުންނަށް ލިބޭ ވަރަށް ބޮޑު ލުޔަކަށް ވާނެ އެވެ.
ނޫސްވެރިންނާއި އޮބްޒާވަރުން އަދި ކެންޑިޑޭޓުންގެ މަންދޫބުންނަށް ފަސޭހަތްކޮށްދޭން އީސީން ގެނައި އަނެއް ބަދަލަކީ އެކަންކަމަށް ކުރިމަތިލާން ފިޒިކަލް ފޯމުލާން ޖެހޭ ގޮތަށް އޮތް އޮތުން ބަދަލުކުރުމެވެ. ހަބީބް ވިދާޅުވީ މިހާރު އެ ހުރިހާ ކަމަކަށް ވެސް އޮންލައިންކޮށް ފޯމް ފުރޭނެ ކަމަށެވެ.
ކޮމިޝަނުން ބޭނުން ވަނީ އިންތިހާބުގެ ކަންތައްތައް ހިނގާ ނުހިނގާ ގޮތް ބެލުމުގައި ނޫސްވެރިންނާއި އޮބްޒާވަރުންގެ ދައުރު ވަރަށް ފުޅާކޮށް އޮންނަން ކަމަށް ވެސް އޭނާ ވިދާޅުވި އެވެ.
އިންތިހާބުތައް ކަވަކުރާ ނޫސްވެރިންނާއި މޮނިޓަރުން އީސީން ކުރިއަށް ގެންދާ ތަމްރީނެއް ފުރިހަމަކުރާ ގޮތަށް ގާނޫނަށް ބަދަލު ގެންނަން އީސީން އުޅުމުން ރައްޔިތުންގެ މަޖިލީހުގެ ބައެއް މެމްބަރުން އޭރު އެކަމަށް ވަރަށް ބޮޑަށް ފާޑުވިދާޅުވި އެވެ.
