ހަމްބޯ ކޮރެއާއިން ހުޅުމާލޭގައި އިމާރާތްކުރަމުން އަންނަ ކޭޕާކް ރެސިޑެންސް ވިއްކުމުގެ ތެރެއިން މަކަރު ހަދައި އޮޅުވާލި މައްސަލާގައި ތުހުމަތުކުރެވޭ ހަމްބޯ ކުންފުނީގެ މައިނޯރިޓީ ހިއްސާދާރު ހަސަން މަމްދޫހުގެ ޕާސްޕޯޓު ދޫކޮށް އޭނާ ރާއްޖޭން ބޭރަށް ދިޔުމަށް ކްރިމިނަލް ކޯޓުން 45 ދުވަހުގެ ހުއްދައެއް ދީފި އެވެ.
ކްރިމިނަލް ކޯޓުން ކުރިން އޮތީ، ފުލުހުން އެދިގެން މަމްދޫހުގެ ޕާސްޕޯޓު ހިފެހެއްޓުމުގެ އަމުރެއް ނެރެދީފަ އެވެ. އެ އަމުރު މުރާޖައާ ކޮށްދިނުމަށް އެދި މަމްދޫހުގެ ފަރާތުން އެދުނީ، ރާއްޖޭން ބޭރުގައި ހުރި އޭނާގެ އާއިލާއާ ބައްދަލުކޮށް އާއިލާގެ ބައެއް ޒަރޫރީ ކަންކަން ހަމަޖައްސަން އޮތުމުން ކަމަށް ބުނެ އެވެ.
ކްރިމިނަލް ކޯޓުގެ ރަޖިސްޓްރާ ސެކްޝަންގެ ލީގަލް އޮފިސަރު އާމިނަތު ނަސްފާ "އަދަދު" ނޫހަށް ވިދާޅުވީ ޒަރޫރީ ހާލަތަށް ރާއްޖޭން ބޭރަށް ފުރުމުގެ ހުއްދަ ކޯޓުން ދިން ނަމަވެސް އެ ޓްރެވެލް ޑޮކިއުމަންޓް ދޫކުރަން ވާނީ 45 ދުވަހުގެ މުއްދަތަކަށް ކަމަށް ކޯޓު އަމުރުގައި ބަޔާންކޮށްފައިވާ ކަމަށެވެ.
"45 ދުވަސް ވުމުގެ ކުރިން، އެ ދަތުރު ނިންމުމަށް ފަހު، ރާއްޖެ އައިސް، ކޯޓަށް އެންގުމަށް އަމުރުކޮށްފައި ވާނެ،" ނަސްފާ ވިދާޅުވި އެވެ.
މަމްދޫހުގެ ޕާސްޕޯޓު ހިފަހައްޓަން ނެރުނު އަމުރު ބާތިލު ކުރި މައްސަލަ ހައި ކޯޓުގައި އިސްތިއުނާފު ކުރުމަށް އެދޭނެ ކަމަށް ފުލުހުން ބުންޏެވެ.
ކޭޕާކު ޕްރޮޖެކްޓުގެ މަސައްކަތް ކުރަނީ ކޮރެއާގެ ހަމްބޯ ކުންފުންޏާ ގުޅިގެން އުފެއްދި ހަންބޯ މޯލްޑިވްސްއިންނެވެ. އެ ކުންފުނީގެ 95 ޕަސެންޓު ހިއްސާ އޮންނަނީ ޗައިނާ ރައްޔިތެއް ކަމަށްވާ ޖިން ޝީ ހޫގެ އަތުގަ އެވެ. މަމްދޫހުގެ އޮންނަނީ ކުންފުނީގެ ފަސް ޕަސެންޓު ހިއްސާ އެވެ.
ހަންބޯ ކޮރެއާ އިން ނެރުނު ބަޔާނުގައި ފުލެޓުތައް ގަނެވިއްކުމުގެ އެއްބަސްވުމުގައި މަމްދޫހު ސޮއިކޮށްފައި ވަނީ، މައި ހިއްސާދާރު ޖިން ޝިހޫގެ ސޮއި ފޯޖުކޮށްގެން މަމްދޫހުގެ ވިޔަފާރި ޕާޓްނަރު ޖައިޝަން ސައީދަށް ދިން ކަމަށް ބުނާ ގަރާރެއް ބޭނުންކޮށްގެން ކަމަށް ތުހުމަތުކޮށްފައިވެ އެވެ.
ރައްދުގައި މަމްދޫހު ވެސް ބަޔާނެއް ނެރުނެވެ. އޭގައި މައި ހިއްސާދާރަށް އެތައް ތުހުމަތެއް އޭނާ ކޮށްފައިވެ އެވެ. މަޝްރޫއު ހިންގާފައިވަނީ މީހުން އަތުން ނެގި ފައިސާއިން ކަމަށާއި، މަކަރާއި ހިލާތް ހެދީ މައި ހިއްސާދާރު ކަމަށެވެ. ނަމަވެސް ސޮއި ފޯޖުކުރުމުގެ ތުހުމަތަށް މަމްދޫހުގެ ބަޔާނުގައި ޖަވާބުދީފައެއްނުވެ އެވެ.
ކޯޓު އަމުރަކާއެކު އިމިގްރޭޝަނުން މަމްދޫހުގެ ޕާސްޕޯޓު ހިފަހައްޓައި، މައްސަލައިގެ ތަހުގީގު ފުލުހުން ފަށާފައިވަނީ ހަންބޯ ކޮރެއާގެ ބަޔާނަށް ފަހުގައި އެ މައްސަލަ ތަހުގީގު ކޮށްދިނުމަށް އާބަންކޯއިން ފުލުހުގައި އެދުމުންނެވެ.
