އިޒްރޭލުން ގާނޫނާ ހިލާފަށް ވެރިކޮށްގެން އުޅޭ ހުޅަނގު އައްސޭރީގެ ޖެނިން ސިޓީގައި ހޯމަ ދުވަހު ފެށި އަސްކަރީ އޮޕަރޭޝަނެއްގައި ފަލަސްތީނުގެ އަށް މީހުން މަރާލައިފި އެވެ.
އެ ސިޓީގެ އިމާރާތްތަކަށް ވައިގެ ހަމަލާދީ، އަސްކަރީ އުޅަނދުތައް މަގުތަކަށް ނެރިގެން ފެށި އޮޕަރޭޝަނުގައި މަރުވި މީހުންގެ ތެރޭގައި ތިން ކުޑަކުދިން ވެސް ހިމެނެ އެވެ.
ފަލަސްތީނުގެ ހެލްތު މިނިސްޓްރީން ބުނީ 50 މީހުންނަށް އަނިޔާވި ކަމަށެވެ. އަނިޔާވި ބައެއް މީހުންގެ ހާލު ގޯސްކަމުން މަރުވާ މީހުންގެ އަދަަދު އިތުރުވާނެ ކަމަށް ބެލެވެ އެވެ.
އޭގެ އިތުރުން ސިއްހީ ފަރުވާދޭ ޕެރެމެޑިކްސްއަށް ވެސް ބައެއް ހިސާބުތަކަށް ދަތުރު ކުރުމަށް އިޒްރޭލް ސިފައިން ހުރަސް އަޅާތީ ފަރުވާ ލަސްވެގެން މީހުން މަރުވުން ވެސް އެކަށީގެންވެ އެވެ.
ޖެނިން ގަވަމަންޓް ހޮސްޕިޓަލްގެ އޮފިޝަލަކު ބުނީ 2002 ވަނަ އަހަރުގެ ފަހުން މިހާ ގިނަ އަދަދެއްގެ ބަޔަކަށް ސީރިއަސް އަނިޔާވެގެން އެއް ފަހަރާ ގެނެސްފައި ނުވާ ކަމަށެވެ.
އިޒްރޭލުގެ ސިފައިން ޕެރެމެޑިކްސްއަށް އަމާޒުކޮށް ބަޑި ޖެހި ކަމަށް ފަލަސްތީނުގެ ރެޑް ކްރެސެންޓުން ބުނާ އިރު، އަލް އަރަބީ ޓީވީން ބުނީ ނޫސްވެރިންނަށް އަމާޒުކޮށް ބަޑި ޖަހައި ތަކެއްޗަށް ގެއްލުންދީފައިވާ ކަމަށެވެ.
ހޯމަ ދުވަަހު ހެނދުނު އިޒްރޭލް ސިފައިން ނެރުނު ބަޔާނެއްގައި ބުނީ ޖެނިން ސަރަހައްދުގައި ބޮޑު އޮޕަރޭޝަނެއް ހިންގަނީ ހާހަކަށް ވުރެ ގިނަ ސިފައިންގެ ބައިވެރިވުމާ އެކު ކަމަށެވެ.
ޖެނިންގައި އުޅޭ އެންމެ ބޮޑު އަސްކަރީ ގްރޫޕަކީ 2021 ގައި އުފެދުނު ޖެނިން ބްރިގޭޑްސް އެވެ. އެ ގްރޫޕުން ބުނީ އިޒްރޭލް ސިފައިންނަށް ރައްދު ދޭނެ ކަމަށެވެ.
