ހުޅަނގު އައްސޭރީގެ ނަބްލޫސްގައި ހޮނިހިރު ދުވަހު ހިނގި ނުރައްކާތެރި އެކްސިޑެންޓެއްގައި ފަލަސްތީނުގެ ގައިދީންގެ ކަންކަމާ ގުޅޭ މިނިސްޓަރު ގަދްރީ އަބޫ ބަކުރު އަވަހާރަވެއްޖެ އެވެ.
ވަފާ ނިއުސް އެޖެންސީން ބުނީ އެ ހާދިސާގައި އިތުރު ދެ މީހުން މަރުވި ކަމަށެވެ.
ހުޅަނގު އައްސޭރީގެ ބައެއް ކަންކަން ކޮންޓްރޯލް ކުރާ ފަލަސްތީން ސަރުކާރުގެ މިނިސްޓަރަކަށް އުމުރުން 70 އަހަރުގެ އަބޫ ބަކުރު އައްޔަނުކުރީ 2019 ގަ އެވެ.
އޭނާ އަވަހާރަވުމާ ގުޅިގެން ފަލަސްތީނުގެ ރައީސް މަހްމޫދު އައްބާސް ވަނީ ހިތާމަ ފާޅުކުރައްވައި، އޭނާގެ އާއިލާއަށް ތައުޒިޔާ ފޮނުއްވައިފަ އެވެ.
އަބޫ ބަކުރަކީ ގަދަރުވެރިކަމާ އެކު ގައުމުގެ ހައްގުގައި މަސައްކަތް ކުރެއްވި ބޭފުޅެއް ކަމަށާއި ފަލަސްތީނުގެ ހައްގުތައް އަބަދުވެސް ދިފާއުކުރެއްވި ކަމަށް މަހްމޫދު އައްބާސް ވިދާޅުވި އެވެ.
