ގުދުސް (ޖޫން 24) - ހުޅަނގު އައްސޭރީގައި އުފެދިފައި އޮތް ހަމަނުޖެހުން ހުއްޓުމެއް ނެތި ކުރިއަށްދާ ކަމަށް އިޒްރޭލާއި ފަލަސްތީނުން ބުނެފި އެވެ.
ހޮނިހިރު ދުވަހު ޗެކްޕޮއިންޓެއްގައި ބަޑި ޖަހައި ފަލަސްތީނުގެ މީހަކު މަރާލި އިރު، ޔަހޫދީން ދަނީ ފަލަސްތީން މީހުން ދިރިއުޅޭ ހިސާބުތަކަށް ހަމަލާދެމުންނެވެ.
މިދިޔަ ހޯމަ ދުވަހުން ފެށިގެން ހިނގަމުންދާ ހަމަނުޖެހުމުގައި އިޒްރޭލުގެ ހަތަރު މީހުން މަރުވެފައިވާ އިރު ފަލަސްތީނުގެ 16 މީހުން މަރުވެފައިވެ އެވެ.
އިޒްރޭލުން ބުނީ ހޮނިހިރު ދުވަހު ގުދުސްގެ އުތުރުން ގަލަންދިއާ ޗެކްޕޮއިންޓުގައި ބަޑިޖަހައި މަރާލީ "ސަލާމަތީ ފައުޖުތަކަށް އަމާޒުކޮށް ބަަޑިޖެހި މީހެއް" ކަމަށެވެ.
ފަލަސްތީނުގެ އަލް އަގްސާ މާޓިއާޒް ބްރިގޭޑުން ބުނީ މަރުވީ އެ ގްރޫޕްގެ މެމްބަރަކު ކަމަށެވެ. ފަލަސްތީނުގެ ވަފާ ނިއުސް އެޖެންސީން ބުނީ އެއީ އުމުރުން 18 އަހަރުގެ އިސްހާގް އަލް އަޖްލޫނީ ކަމަށެވެ.
އޭގެ އިތުރުން ހޮނިހިރު ދުވަހު ޔަހޫދީން ހަމަލާދިނީ އުއްމު ސަފާ އަވަށުގައި އުޅޭ ފަލަސްތީން ރައްޔިތުންނަަށެވެ. ގާ އުކައި ހުޅުޖެހުން ފަދަ އަމަލުތައް އެ މީހުން ހިންގި އެވެ.
ހުޅަނގު އައްސޭރިއަކީ 1967 އިން ފެށިގެން އިޒްރޭލުން ހިފައިގެން އުޅޭ ފަލަސްތީނުގެ ބިމެކެވެ. ގާނޫނާ ހިލާފަށް އެ ބިން ވެރި ކުރުމަށް ކުރާ މަސައްކަތުގެ ތެރެއިން މިހާރު 490،000 އަށް ވުރެ ގިނަ ޔަހޫދީން ހުޅަނގު އައްސޭރީގައި ދިރިއުޅެ އެވެ.
