ރަބާތް، މޮރޮކޯ (ޖޫން 23) - އިޒްރޭލުން ގުޅުން ގާއިމްކޮށްފައިވާ އަރަބި ގައުމުތަކާއި އިޒްރޭލާ ދެމެދު ބާއްވަން އުޅުނު ބައްދަލުވުން ފަސްކޮށްފި އެވެ.
ބައްދަލުވުން ބާއްވަން ހަމަޖެހިފައި އޮތީ މޮރޮކޯގަ އެވެ. އެ ގައުމުން ބުނީ ބައްދަލުވުން ފަސްކުރީ ހުޅަނގު އައްސޭރީގައި ލޭއޮހޮރުވުން އިތުރުވެފައި ވާތީ ކަމަށެވެ.
ފޮރިން މިނިސްޓަރު ނާސިރް ބުރީތާ ވިދާޅުވީ ހާލަތު ހަމައަކަށް އެޅުމުން ފަހުގެ ތާރީހެއްގައި ބައްދަލުވުން ބޭއްވުމަށް އުއްމީދު ކުރައްވާ ކަމަށެވެ.
އިޒްރޭލާ ގުޅުން ގާއިމްކުރި އަރަބި ގައުމުތަކާއި އިޒްރޭލާ ދެމެދު އަހަރީ ބައްދަލުވުމެއް ބާއްވަން ނިންމައި، މި އަހަރަށް ތާވަލުކުރީ އޭގެ ދެ ވަނަ ބައްދަލުވުމެވެ.
މި އަހަރުގެ ބައްދަލުވުން ކުރިން ބާއްވަން އޮތީ އެޕްރީލް މަހުގެ ތެރޭގަ އެވެ. އެކަމަކު އޭރު ވެސް އިޒްރޭލާއި ފަލަސްތީނާ ދެމެދު ހަމަލާ އިތުރުވެ ބައްދަލުވުން ފަސްކުރީ އެވެ.
މިދިޔަ އަހަރުގެ ބައްދަލުވުމުގައި އިޒްރޭލުގެ ފޮރިން މިނިސްޓަރާއި ބަހްރެއިން، މިސްރު، ޔޫއޭއީ އަދި މޮރޮކޯގެ އެންމެ އިސް ޑިޕްލޮމެޓުން ބައިވެރިވި އެވެ.
މޮރޮކޯއިން އިޒްރޭލާ އެކު ގުޅުން ގާއިމްކުރީ އެމެރިކާއިން އުފެއްދި އަބްރަހަމް އެކޯޑްސްގެ ދަށުން ޑިސެމްބަރު 2020 ގަ އެވެ. މޮރޮކޯ ސަރުކާރުގެ އެ ނިންމުމާ މެދު ގިނަ ރައްޔިތުން ނުރުހެ އެވެ.
