އިޒްރޭލް ސިފައިންގެ ރައްކާތެރިކަމާ އެކި ޔަހޫދީ ގްރޫޕްތަކުން ފަލަސްތީނުގެ ހުޅަނގު އައްސޭރީގައި ހުރި އަވަށްތަކަށް ހަމަލާދެމުން އެބަދެ އެވެ.
ބުދަ ދުވަހު ހަމަލާ ދިނީ ރާމަﷲ ގެ އުތުރުން އޮންނަ ތުރްމުސާޔާ އަވަށަށެވެ. އެ ތަނުގައި ގެތަކާއި އުޅަނދުތަކާއި ދަނޑުބިންތަކުގައި ހުޅުޖަހައި، މީހަކު މަރާލި އެވެ.
ބަޑި ޖެހުމުގެ ސަބަބުން މަރުވީ އުމުރުން 27 އަހަރުގެ އުމަރް ކެތިން ކަމަށް ފަލަސްތީނުގެ ހެލްތު މިނިސްޓްރީން ބުންޏެވެ. ބަޑިޖެހީ ސިފައިން ކަމެއް ޔަހޫދީންގެ އާއްމުން ކަމެއް ސާފެއް ނޫނެވެ.
ބުދަ ދުވަހުގެ މެންދުރު ކުއްލި ގޮތަކަށް އެ އަވަށަށް ހަމަލާދިން އިރު، އޭގެ ކުރީ ދުވަހު ނަބްލޫސް ކައިރީގައި ހުރި އަވަށްތަކަށް ވެސް ހަމަ އެފަދަ ހަމަލާތަކެއް ދިނެވެ.
ތުރްމުސާޔާ އަވަށުގެ މޭޔަރު ލަފީ އަދީބް ވިދާޅުވީ އެކަމުގައި 400 އަށް ވުރެ ގިނަ ޔަހޫދީން ބައިވެރިވި ކަމަށެވެ. އެއީ އެ އަވަށުގެ ބިމުގައި ޔަހޫދީން ދިރިއުޅެން ގާނޫނާ ހިލާފަށް ހެދި ޝީލޯ ސަރަހައްދުގައި އުޅޭ މީހުންނެވެ.
އޭނާ ވިދާޅުވީ މިއީ ޓެރަރިސްޓު ގްރޫޕަކުން ހިންގަމުންދާ ބޮޑު ގަތުލުއާއްމެއް ކަމަށާއި ހަމަލާތައް އަމާޒުކުރަނީ އެއްވެސް ކުށެއް ނެތް މީހުންނަށް ކަމަށެވެ.
ޔަހޫދީންގެ އަމަލުތައް ގިނަ ގައުމުތަކުން ކުށްވެރިކޮށްފައިވި ނަމަވެސް، އެކަން ހުއްޓުވަން ބައިނަލްއަގްވާމީ މުޖުތަމައުގައި މާ ބޮޑު މަސައްކަތެއް ނުކުރެ އެވެ.
