ގުދުސް (ޖޫން 19) - ފަލަސްތީނުގެ ހުޅަނގު އައްސޭރީގައި ގާނޫނާ ހިލާފަށް ޔަހޫދީން އާބާދު ކުރުމުގެ ހުއްދަ ދިނުމާ ގުޅޭ އުސޫލު ލުއިކުރަން އިޒްރޭލް ސަރުކާރުން ނިންމުމުން އދ. އިން ފާޑުކިޔައިފި އެވެ.
އދ. އިން މެދުއިރުމައްޗަށް ކަނޑައަޅާފައި ހުންނަ މަންދޫބު ތޯރް ވެނެސްލޭންޑް ވިދާޅުވީ އާދީއްތަ ދުވަހު އިޒްރޭލް ސަރުކާރުން ނިންމި ނިންމުމާ މެދު އިންތިހާއަށް ކަންބޮޑުވާ ކަމަށެވެ.
"ޔަހޫދީން އާބާދު ކުރުމާ ގުޅޭ ގޮތުން 1996 ވަނަ އަހަރުން ފެށިގެން އަމަލު ކުރަމުން އައި އުސޫލަށް ބަދަލު ގެނެސް، ޔަހޫދީން އާބާދު ކުރުމުގެ މަސައްކަތް އަވަސް ކުރަން އުޅޭތީ އިންތިހާއަށް ކަންބޮޑުވޭ،" އޭނާގެ އޮފީހުން ނެރުނު ބަޔާނެއްގައި ބުންޏެވެ.
އިޒްރޭލުން ބުނީ އުސޫލު ލުއިކުރުމުން ހުޅަނގު އައްސޭރީގައި ޔަހޫދީން ދިރިއުޅޭ ހިސާބުތައް ތަރައްގީ ކުރުމުގެ އިދާރީ ކަންކަން އަވަސް ވާނެ ކަމަށެވެ. ހުޅަނގު އައްސޭރިއަކީ އިޒްރޭލުން ވެރިކޮށްގެން އުޅޭ ފަލަސްތީނުގެ ބިމެކެވެ.
އެ ތަނުގައި ޔަހޫދީން އާބާދުކޮށް ޔަހޫދީންގެ ސަރަހައްދުތައް ތަރައްގީ ކުރަނީ ބައިނަލްއަގްވާމީ ގާނޫނާ ހިލާފަށެވެ. ހުޅަނގު އައްސޭރީގައި އިތުރު 4500 ޔުނިޓް ޔަހޫދީން ދިރިއުޅެން ތަރައްގީ ކުރުމަށް އިޒްރޭލުން މިހާރު ދަނީ ތައްޔާރުވަމުންނެވެ.
