ކުރިން މަސައްކަތް ކުރީ "ގައުމު އިސްލާހުކުރުމުގައި" ކަމަށާއި މިހާރު އަދާލަތު ޕާޓީގެ އަމާޒަކީ އިސްލާމީ އުސޫލުން ހިންގާ ވެރިކަމުގެ ނިޒާމެއް އުފެއްދުން ކަމަށް އެ ޕާޓީގެ ލީޑަރު އަދި ހޯމް މިނިސްޓަރު އިމްރާން އަބްދުﷲ ރޭ ވިދާޅުވެއްޖެ އެވެ.
ރައީސް އިބްރާހީމް މުހައްމަދު ސޯލިހަށް ތާއިދުކޮށްފައިވާ އަދާލަތު ޕާޓީން ރިޔާސީ އިންތިހާބުގެ ކެމްޕެއިން ފެށުމަށްޓަކައި އެ ޕާޓީގެ އާންމު މެންބަރުންނާ މަޝްވަރާކުރަން ސޮލައިޓް ކެފޭގައި ރޭ ބޭއްވި ބައްދަލުވުމުގައި އިމްރާން ވިދާޅުވީ ޕާޓީ އުފެދުނު އިރު ފުރަތަމަ ވިސްނުމަކީ ބަޔަކު ވެރިކަމުން ބޭލުމާއި ބަޔަކު ވެރިކަމަށް ގެނައުން ނޫން ކަމަށާއި އަދި ވެރިކަން ވެސް ކުރުމެއް ވެސް ނޫން ކަމަށެވެ. އެ ޕާޓީން ކުރިން މަސައްކަތް ކުރީ ގައުމު އިސްލާހު ކުރުމަށް ކަމަށް އޭނާ ވިދާޅުވި އެވެ.
ނަމަވެސް މިހާރު ބޭނުން ވަނީ އިސްލާމީ އުސޫލުތަކާއި ހަމަތަކުގެ މަތިން ވެރިކަން ހިންގުމުގެ ނިޒާމެއް ރާއްޖޭގައި އުފެއްދުން ކަމަށް އިމްރާން ވިދާޅުވި އެވެ.
"އެކަން ކުރަން ކުރަހާފައިވާ މަގު ވަރަށް ސާފު،" އެ ޕާޓީން އެކުލަވާލާފައިވާ ސްޓްރެޓިކް ޕްލޭނުގެ ވާހަކަ ދައްކަވަމުން އޭނާ ވިދާޅުވި އެވެ.
"އެ މަގާ ހަމައަށް ދަތުރު ކުރެވޭނީ މިއަދުއްސުރެ ފެށިގެން އެ މަގުން ދަތުރުކުރުމުގައި އަޅަންޖެހޭ ފިޔަވަޅުތައް ސާބިތުކަމާއި ހަމަކަމާއެކު އަޅައިގެން ކުރިއަށް ގެންގޮސްގެން. އަޅުގަނޑުމެން މި ތިބީ އެ ދަތުރުގެ މުހިންމު މަރުހަލާއެއްގައި."
އަދާލަތު ޕާޓީ 2005 ވަނަ އަހަރު އުފެއްދިއިރު ތަސައްވުރު ނުކުރާ މިންވަރަށް މިހާރު ޕާޓީ އައިސްފައިވާކަން ފާހަގަ ކުރައްވަމުން އިމްރާން ވިދާޅުވީ ގޮންޖެހުންތަކާއި ހުރަސްތައް ގިރާކޮށް ޕާޓީއަށް އެހާ ހިސާބަށް އާދެވުނީ މުހިންމު އަސާސްތަކެއް ގެންގުޅުމުން ކަމަށެވެ.
ރޭގެ ބައްދަލުވުމުގައި ބައިވެރިވި އަދާލަތުގެ މެންބަރުން.
އެއީ އިހުލާސްތެރި ނިޔަތާއި ރާއްޖެ އިސްލާހުރުމުގެ ހެޔޮ ވިސްނުމާއި މާތްވެގެންވާ އިސްލާމްދީނާއި ގައުމަށް ހިދުމަތް ކުރުމުގެ ވަރުގަދަ އަޒުމު ކަމަށް އިމްރާން ވިދާޅުވި އެވެ.
ވޭތުވެދިޔަ މުއްދަތުގައި ތަޖުރިބާކުރި ގޮންޖެހުންތަކުން އަރައިގަނެ ޕާޓީ މިއަދު މިހާ ހިސާބަށް އައިސްފައިވާއިރު، ކުރިއަށް އޮތީ ވެސް މުހިންމު މަސައްކަތެއް ކަމަށް ވެސް އިމްރާން ވިދާޅުވި އެވެ. މިއަދު އެ ޕާޓީ އާއި ގައުމު ވެސް އަނެއްކާ ހުރަސްކުރަމުންދާ މަރުހަލާތަކުގެ ތެރެއިން އައިސްފައި ވަނީ ކޯރެއްގެ އައްސޭރިއަށް ކަމަށާއި "ކުރިމަތީގައި އޮތީ ފުން ކޯރެއް، ނުވަތަ ކަނޑެއް" ކަމަށެވެ. ނަމަވެސް ސާދާ ބަހުން އެކަމުގެ ތަފްސީލެއް ނުދެއްވަ އެވެ.
އަދާލަތު ޕާޓީން ކޮންމެ ރިޔާސީ އިންތިހާބެއްގެ ތެރޭގައި ވިސްނުން ބައްޓަންކުރީ އެ ޕާޓީގެ ގޯލަށް ވާސިލުވުމަށް އެ ވަގުތަކު އަދާކުރެވެން އޮތް ދައުރު އެންމެ ފުޅާ ގޮތެއްގައި އަދާކުރެވޭނެ މަގު ކޮށުމަށްކަން ފާހަގަ ކުރައްވަމުން އިމްރާން ވިދާޅުވީ "އަޅުގަނޑުމެން އިސްލާހީ މަސައްކަތް ކުރުމަށް މަގު ހޯދައި ކޮށުމަކީ އެންމެ މުހިންމު ކަމަކަށް ހަދަން ޖެހޭނެ" ކަމަށެވެ.
އިމްރާން އިތުރަށް ވިދާޅުވީ ދުނިޔެއާ އެކަހެރިކޮށް ދިވެހިންނަށް ނޫޅެވޭނެ ކަމަށާއި އިސްލާމީ ގައުމުތަކުގައި އިސްލާމީ ދުނިޔޭގައި، ސިޔާސީ ހަރަކާތްތަކާއި ސިޔާސީ ޕާޓީތައް މަސައްކަތްކުރާ ގޮތާއި ކުރިއަރާ ގޮތާއި އެ ޕާޓީތަކުގެ ވިސްނުން ބައްޓާކުރާ ގޮތުން ރަނގަޅު ދަރުސްތަކާއި އިބުރަތް ލިބި މަސައްކަތް ބައްޓަންކުރަންޖެހޭ ކަމަށެވެ.
ކުރިއަށް އޮތް ރިޔާސީ އިންތިހާބަކީ އަދާލަތު ޕާޓީ އާއި އިލްމުވެރިންގެ މަސައްކަތުގެ ދުވެލި އެތައް ގުނަޔަށް އިތުރުކުރުމަށް ފުރުސަތު ލިބިގެންދާނެ ކަމަށާއި އެންމެންގެ މަސައްކަތުން ރިޔާސީ އިންތިހާބު ރައީސް ސޯލިހަށް ކާމިޔާބު ކުރެވި، ކުރިއަށް އޮތް ފަސްއަހަރުގެ ތެރޭގައި ﷲގެ ރަހުމަތާއެކު ރާއްޖެ އިސްލާހުކޮށް ހެޔޮ ބަދަލު ގެނައުމަށް އެތައް ފުރުސަތެއް ލިބިގެންދާނެ ކަމަށް އިމްރާން ވިދާޅުވި އެވެ.
ކުރިއަށް އޮތް ދުވަސްތަކުގައި ރިޔާސީ އިންތިހާބުގެ ކެމްޕެއިން ފޯރީގައި ކުރިއަށް ގެންދެވޭނެ ކަމަށާއި ރައީސް ސޯލިހުގެ ޓީމް ވަނީ އެހެން ކެންޑިޑޭޓުންނަށް ވުރެ ފުރިހަމައަށް ތައްޔާރުވެފައިކަން ފާހަގަ ކުރެއްވެވި އެވެ.
